Chalut mes gins ! Cha y est ! I fallot bin qu’cha arrife un jour, ch’est l’fin d’euch monte. J’diros même pus, ch’est l’Apocalypche ! In va arv’nir à ch’préhistoire d’un cop. Auchi, mi, j’ai pris d’jà ches d’vints. J’sus allée faire ches commichions pou t’nir un sièche. A’ch’t’heure, cha va miux. J’ai fait min stock d’stylos, cal’pins à chpirale, timbres. J’ai auchi acaté eune doussaine d’clacheurs pou mette tous mes documints d’dins. L’tout i va aller dins un placard aveuc un gros cad’nas à combinaison… 

Ti, t’es in train de t’dir’te : « Marie Toutoule alle fait la comique ! Alle ch’imagin’te qu’in n’a pon armarqué qu’in étot ch’premier avril ! Pis, in général, ch’est tout quo qu’i faut pou minger et pou boir’te qu’in prévoie. » Ch’est lal d’ù qu’te t’gour’tes, mes gins, pach’que ch’est à tin manicraque informatique qu’in veut ch’attaquer ! Alors, finis ches maiyes, in va arv’nir à ch’courrier tradichionnel. Quind te diras à quéqu’un qu’te vas li invoyer un maiye, i faudra que te bouges tin popotin pou aller jusqu’à l’pochte. Pis, ne t’attinds pon à avoir eune réponche dins ches minutes qui chuiv’tent. Nin ! Te peux compter dins l’meilleu d’ches cas, un jour pou y aller, un jour pou arv’nir. A condichion qu’ches heures d’arl’vée alles quéent pile-poil. Chinon, t’as d’jà eune journée d’pus dins l’guiffe ! Pis, chi te quées su un mouv’mint d’grèfe, chi ch’est pochipe, cha mettra un chertain timps, com’ i disot Fernand Raynaud !
J’ai fait d’el plache su min burieau pou mette min cal’pin. Mes artiques, j’s’rai obligée d’les écrir’te d’chus. Cha s’ra moins pratique pou ti de v’nir m’lir’te. In s’ra obligé d’faire ch’queue su min trottoir. Cha s’ra chacun à sin tour. Par conte, pou ches commintaires, j’pourros t’réponte in dirèque. Quo qu’ch’est cor’ que ch’t’histoire ? I chircul’te d’pis quéques s’maines un virus informatique qui annonche un méga bazar dins ches manicraques et qui ch’déclinch’rot ch’premier avril. Cha trinsform’rot tin apparel à maiyes in zombie. Toutes ches informachions confidinchielles, t’oublies. Chi t’as pris eune photo d’ti in t’nue d’Eve ou d’Adam, te risqu’tes d’avoir t’guiffe un peu partout. Et quind j’dis t’guiffe, ch’est pou faire court. A m’mote, cha m’étonn’rot qu’in ait arfait ch’cadrache ! Cha, ch’est pou ch’côté pon bin méchint, mais cha va pus loin. Tous ches manicraques infectés par Conficker, ch’est sin nom, is bombard’ront ch’ouèbe d’spams et pourriels jusqu’à chaturer ch’réseau. Pou tin informachion, un pourriel, ch’est un courriel pourri, ch’est à dir’te un maiye infecté.
Alors, te dos t’posser l’quechtion à deusse chint chinquinte mille dollars. Ch’est la récompinche que Microsoft i va donner à ch’ti qui arrife à treuver l’trache du méchint bindit qui a fabriqué ch’virus. Ch’est pou dir’te ch’is prenn’tent cheule menache à chérieux ! Ch’i n’y a pus rin qui va, in s’ra tertous immerdé, mais li auchi ! Bin, nin, pach’que, just’mint, ch’est, com’ qui dirot, eune diverchion. Pindint ch’timps-lal, li, i ira trinquill’mint à la pêque à ches informachions et à ches codes d’accès ! Pou informachion, ches militaires d’el marine françaisse is ont d’jà été infectés i y a eune quinssaine d’jours. In affirm’te que cha n’a pon menaché l’sûr’té de ch’t’Etat. Cha, in sait bin qu’in France, in est protégé com’ perchonne. J’te rappell’te que même ches nuaches radioactifs is n’pach’tent pon ches frontières ! In attindint, ches chpéchialistes informatiques is t’arcommind’tent eune bionne hygiène d’tin bébé. Pardon, j’voulos dir’te d’tin PéChé ! Te dos li chinger ches couches deusse fos par jour… Nin, j’rigol’te ! Te dos avoir tin anti-virus et Windows à jour ! Chi te n’fais pon trop du n’importé quo su ch’ouèbe, te d’vros éviter ch’pir’te !
Te dos auchi éviter d’oufrir un maiye louche. Ch’est quo un maiye louche ? Ch’est vrai, in in archoit gramint. Tous ches jours, te d’viens millionnaire in un clic. Pou ches hommes, is peuv’tent allonger leu instrumint rin qu’in allongeant des pépettes. Et pus ch’liache alle est épaiche, pus in t’met des cintimètes ! Pis, ch’est auchi l’foire à ches bionnes affaires permanintes. Ches montes à prix caché. Ches logichiels disse fos moins quers, et même ches pilules bleues qui t’fon’tent vir ch’vie in rosse… Nin, rin d’tout cha ! Ch’est quind t’as eune pièche jointe qu’i faut faire gramint attinchion…
Churtout, mes gins, te n’éteins pon tin manicraque brutal’mint ! Qué malheur ! Cha t’s’rot fatal… Te n’pourros pon lir’te l’chuite d’min artique ! Ch’est pou détinte ch’t’atmosphère pach’que j’sais que, dès qu’in parl’te virus, t’as gramint d’gins d’ù qu’ch’est l’panique à bord ! D’toute fachon, cha n’est pon ch’premier. L’dernier in date a été pou ch’t’élection à Obama. Après tout, ch’est p’t-ête un bieau pichon d’avril, qui sait ! Te n’vas pon m’dir’te que te n’y as pon pinsé auchi. Un ver l’jour du pichon d’avril. Pis, un ver qui vaut deusse chint chinquinte mille dollars, cha dot être pou l’pêque à ch’gros, voire à ches gros babaches…
Com’ in est jamais trop prudint, chi te n’es pon sûr’te d’el sinté d’tin manicraque, te peux toudis aller télécharger un tiot logichiel chez Microsoft qui permet d’bloquer cheule chalop’rie. Vingt dius ! Ch’est in parlache de chaque chpire, mais te t’in fous. Te cliques su ch’verchion Windows qu’t’as. Cha oufre eune aute feniêtre. Te chosis français com’ parlache et inchuite te cliques su télécharger.  Quind ch’est fini, te n’as pus qu’à double-buquer su ch’truc qui arsimpe à « Windows…KB…FRA » et roul’te ma poulette…
Oups ! Ch’est clachique ! J’in vos qui querch’tent après ch’truc ! Ch’est malin… Quind t’as cliqué su télécharger, i te d’mindot d’ù qu’ch’est qu’te voulos l’mette… Te n’as pus qu’à arfaire cheule manip pou savoir d’ù qu’ch’est qu’i est !

Mes gins, chi t’es toudis lal, ch’est qu’tout i va bin pou ti et tin bazar informatique. Alors, in n’a pus qu’à aller mette d’euch pichon dins ches dios et à ch’dir’te à l’prochaine fos, chi cha n’est pon l’Apocalypche informatique…
http://www.microsoft.com/technet/security/Bulletin/MS08-067.mspx