Chalut mes gins ! Commint qu’cha va in ch’début de s’maine ? Bin, j’espèr’te. In annonche ch’t’artour d’euch printimps alors, cha va aider. Chi t’as quind même ch’moral dins ches bach’kets, j’vais tout faire pou te l’armonter ch’pus haut pochipe. In tout cas, mi, j’in connos au moins eune qui n’dot pon ête à ch’miux d’euch forme à’ch’t’heure. Ch’est l’grinte déprime…

J’ai prech’que invie d’commincher par eune tiote canchon du ginre : « J’ai b’soin qu’in aime, mais perchonne i ne comprind che que j’espèr’te et que j’attinds. Qui pourrot me dir’te qui je suis ? Et j’ai bin peur toute ma vie d’ête incomprisse. Car à’ch’t’heure :  je me chins mal aimée. Je sus la mal aimée… » Ouais, mes gins, j’espèr’te que te vas avoir eune pinsée émue pou ma Titine d’Lille, qui est pachée chez Michel Drucker, diminche. Chi alle a vu ches indiches d’acoute, alle dot ête in pleine déprime. Te parl’tes ti ! T’artreuver com’ cha linterne rouche aveuc un virgule neuf millions de tévéchpectateurs, quind Carlita alle a fait tros millions et qu’Bernadette Chirac alle in a fait pus d’chix… J’n’te parl’tes même pon d’Sœur Ségo qui avot fait auchi chix millions ! Te parl’tes d’eune tuile qu’alle a archue su ch’tiête. J’n’ai même pon peur d’ches miots, ch’est toute l’toiture qui est v’nue aveuc ! Commint qu’cha ch’fait ? Tous ches gins is ont dû printe à ch’miot ch’tite et ch’dir’te : « Viv’mint diminche prochain » et chinger d’chaîne…
Pourtint, min Michel Drucker i avot mis ch’paquet pou ardorer ch’blason d’Titine d’Lille. Ch’est vrai cha, tertous i li tir’te d’chus à boulet rosse. Pardon, j’voulos dir’te rouche. Par conte, j’m’excusse pou ch’miot boulet. Ch’est pon d’em faute, ch’est cheule echpréchion qui est com’ cha ! Titine, chi te m’intinds…  Bref, in li avot maquillé un sourire qui n’a pon dichparu d’toute ch’t’émichion. Alle est apparue bin différinte de ch’qu’in dit d’alle. Pourtint, cha a fait un bide. L’indiche d’acoute i a sinti ch’Maroilles ! L’faute à qui ? A ch’solel ? Ch’est sûr’te, in avot pus invie d’aller faire un tour que d’raviser ch’tévé. Infin, in n’a pon fini d’lir’te des tiotes phrasses car, à n’in pon douter, Sœur Ségo alle dot ête armontée com’ in quatorsse. Ches frisettes alles ont dû arv’nir toutes seu et j’l’intinds d’jà, tout in l’vint ches bras à ch’chiel, intonner un « alle-ch’est-plin-tée ! » revinchard !
Cha fait quind même deusse fos in moins d’eune s’maine. Te li as pris ch’plache à ch’Zénith, mais t’as oublié d’printe un coach, ti ! In dirot que ch’sort i ch’acharn’te conte ti. Mi, j’inverros un détective pou savoir. Chi te veux, j’vais in parler à min inquêtriche Bridget Columbo. Cha n’m’étonn’rot pon que Sœur Ségo alle a fait fabriquer eune poupée vaudoue à tin effigie. Dès qu’alle a eune minute, alle dot faire d’euch plinté d’aiguilles. Pis, alle n’a pon peur d’bin tourner com’ chi alle mélingeot eune vinaigrette !
J’te l’dis, mes gins, alle n’a pon tell’mint pinsé à ch’ménagère d’pus ou moins chinquinte ins. Cheule qui fait ch’bionheur de ch’t’Audimat. Cha minquot grafe d’tiots loulous pou armonter ch’t’indiche d’acoute. Tiens, su TF1, in avot l’drot à ch’biel Harry. Même quind i t’annonche un drame ou eune catastrophe, t’es scotché(e) à tin écran. I dot bin y avoir eune raison… In pus, alle in a un chous l’main : Min Benoît Hamon. Ch’est vrai qu’i est bello ch’ti-lal. Ch’est même alle qui a dit qui plaisot gramint à ches femmes ; qu’alles soient jonnes ou vieilles ! Bah, Titine, t’auros echplosé ches compteurs ch’i étot v’nu fait eune tiote canchon d’crooner pou t’faire eune churprisse…
Ah ! Ch’est vrai. J’confonds d’émichion. Cha n’étot pon chacrée soirée, cha a même été l’inverche ! Pis, allez, j’vais osser, ch’i avot fait ches Chippendale, même Michel Drucker i n’aurot pon réuchi à vir jusqu’à d’ù i aurot grimpé cheule bébiête d’Audimat ! In a eu l’drot à Jean-Pierre coffe. Avoue qu’cha n’coffe pon parel pou ch’t’imbianche ! Je n’te dis pon merchi d’avoir fait ches carbonates flamintes. Cha m’a caché grafe m’baraque. In effet, cha fait d’jà plusieurs fos qu’mes lecteurs is veul’tent que j’leu donn’te m’archette. Pis, te sais ch’que ch’est. I y a forchémint eune actualité qui boul’verch’te min planning. Eune actualité, cha n’attind pon. Cha n’est pon com’ ches carbonates, cor’ meilleu récauffées ! A un momint donné, j’ai cru qu’in étot arv’nu in arrière dins ch’timps. Imagine eune s’conde quéqu’un qui jue aveuc ch’zappette et qui quée su ti in train d’cuissiner. I aurot pu chertain’mint croir’te qu’in propossot eune nouvielle formule d’cheule « cuissine d’ches Mouch’quetaires » aveuc Maïté…

Ch’est nin grafe tout cha ! Mi, j’sus lal pou t’armonter ch’moral, m’Titine. J’n’vais pon faire un nouvieau tite com’ « Martine fait l’cuissine », mais j’vais plutôt résumer tout cha aveuc eune canchon ! Ouais, cor’ eune. Bah, ch’est l’printimps, cha m’donn’te invie d’canter. Partint su ch’préchepte bin connu qui dit qu’i vaut miux in rir’te que d’in braire, i y a un tite qui t’va com’ un gant. Malgré tous ches efforts pou paraître chous tin meilleu jour. In sait qu’te n’as pon fait dins l’dintelle d’Calais pou cha. Eune émichion d’variétés aveuc Michel Drucker, cha n’dot pon ête coton. Te n’as pon dû t’chintir dins l’ouate, nin pus. Alors, ch’est la ouate, cha m’a inspiré : « ch’est la poiche. »

Tu buques su play pou l’version karaoké !

Désastreusse

Cha va cor’ faire rir’te l’aute moqueusse

Ch’t’émichion fabuleusse

Ch’est eune idée foireusse

Apparemint j’sus malchinceusse

J’sus la moins chinceusse de ches meneusses

[arfrain :]

Chez Michel Drucker

J’voulos pon ête austère

Juint ches boutes in train

Aveuc gramint d’intrain

Ch’est la poiche

Chez Michel Drucker

Che fut eune vraie misère

Ch’t’indiche part in pouchière

J’ai pris eune claque chévère

Ch’est la poiche

Pon boudeusse

J’laiche cha à l’aute rêveusse

Alle visse toudis ma plache

Et alle multiplie ches craches

Mi j’m’in fous j’m’in balinche

Sauf d’avoir un Audimat trop minche

[arfrain]

Ch’est la poiche (x4)

Que j’dos faire pou qu’in me prenn’te pus à chérieux

Qu’in oublie cheule imache de ch’nain qu’in nomm’te grincheux

Même pon aimée in cuissinière

J’auros dû faire des moules marinières

[arfrain] ad lib…