Chalut mes gins ! J’ai bin réfléchi à quo qu’j’allos dir’te à’ch’t’heure. Pach’que cha m’aurot été gramint fachile d’arbondir su min artique préchédint pou en faire eune chuite. Chi te n’as pon tes orelles bouchées, t’as dû intinte, com’ mi, qu’ches parachutes dorés is continu’tent à querre d’partout. Bin, chi in arçoit un tas d’billets, ch’est sûr’te, in n’va pon ch’in plainte, mais ch’est nin su ti et mi qu’cha quée ! In attindint, ches sommes alles donn’tent ch’tournis. A croir’te qu’is fon’tent tertous un concours à ch’ti qui aura ch’pus grosse prime !

Te vos, cha n’est vraimint pon dur’te cor’ faire un sujet lad’chus, mais j’in avos pon invie. Alors quo d’aute à ch’mette chous l’dint ? L’chômache, nin… In va déprimer tout ch’ouiquen ! Ouais, mes gins, in est vinderdi et j’ai déchidé qu’in l’comminch’rot bin. Par eune nouvielle qui fait sourir’te. J’croyos qu’cha n’allot pon ête fachile à démucher, mais ch’étot chins compter su ches concurrints d’ches grinds comiques. J’ai nommé : ches politiques. Messache perchonnel à Titine d’Lille et à Sœur Ségo : I faudrot p’t-ête vo y armette, ches files, à dir’te n’importé quo, pach’que ch’est cor’ d’euch même que j’vais parler…
And ze ouineur is min Nicolas, Ro d’ches Francs ! Ch’est nin d’em faute, mes gins. I n’arrête pon in ch’momint. I n’arrête pon d’bouger, mais cha, cha n’ching’te pon gramint. I n’arrête churtout pon d’raconter ch’conte et cha, cha fait miux min affaire. Pach’que j’sus toudis à l’acoute d’ches tiotes phrasses pou qu’in ch’régal’te insimpe. Pis, com’ cha vient d’eune dépêque d’AFP, in peut ch’y fier. Is ont des grintes orelles et is intind’tent tout. Cha ch’pache lors d’un cocktail que min Nicolas i a organisé l’lind’main d’sin dichcours à Saint-Quentin. Ouais, mes gins ! Pindint qu’ti, te bosses pus pou gagner toudis parel, ches députés d’UMP is étotent invités à un cocktail à ch’t’Elysée!
Juint à eune chorte d’quechtions-réponches, min Nicolas i a déclaré : « J’comprinds qu’ch’est gramint dur’te pou ti, mais l’crisse cha rind ch’liberté pach’qu’in n’réfléchissot pus avint. » J’ai alleumé min décodeur chpécial et v’là quo qu’i in est arsorti : « Quind in est dins l’brein, in fait preufe d’astuche et in arvient à ch’bion système D ! » A m’mote, cha n’est pon vraimint eune bêtisse. Chi cha quéhot tous ches mos chins qu’in ait b’soin d’bouger sin popotin, in aurot gramint moins d’chouchis à ch’faire. Chertain’mint auchi, pon b’soin d’réfléchir à l’fachon d’boucler ches fins d’mos.
Aute phrasse : « Ch’périote alle est formidape pach’qu’in ch’tourn’te vers no, ches politiques. » Ichi, mes gins, j’cros qu’in a mis un n’sait quo dins sin verre d’jus d’oranche. Treuver ch’périote formidape, ch’est étranche ! Youpi, ch’est la crisse ! Youpi, in est dins ch’brein ! Yo meufs et yo men d’France, ch’est mi Sarkogourou. Cha, ch’est pach’qu’i ch’adrèche auchi à ches binlieues. In l’a d’jà vu insimpe. In est ch’providinche qui va sortir ch’monte de l’apocalypche ! Mais ch’est qu’i est gramint fort ch’jus d’oranche. In pus, qu’in ch’tourn’te vers ches politiques, j’n’sais pon chi cha va vraimint no sauver. In n’a pon fini d’aller printe des cours d’perfec’chionn’mint aveuc Philippe Lucas, à Dunkerque, pou améliorer ch’brache coulée…
In vrac, in peut auchi treuver « Rétablir ch’t’imache d’el France in agichint su ches tros hindicaps : ches trinte-chinq heures, ches grèfes et ch’fich’calité. » Bion résumé d’el France ! Cor’ eune aute « Su ch’bouclier fich’cal, prinds-me bin in photo ! M’capachité à arculer n’est pon d’un millimète ! » Min décodeur i m’a sorti un truc pon pochipe : J’n’boug’te pus, ch’est pou l’photo ! A m’mote, i dot ête in raque. J’n’sais pon quo qu’t’in pinses, mais cha n’dot chertain’mint pon vouloir dir’te cha ! A propos d’euch partache d’ches profits, que Laurence Parisot alle n’a pon l’désir d’évoquer, i dit : « In n’peut pon faire boir’te un âne qui n’a pon soif. » J’cros qu’Laurence alle appréchiera. Ch’est gramint fachile d’dir’te qu’alle n’a pon soif. Ch’est p’t-ête eune excusse pach’qu’alle n’a pon été invitée à ch’cocktail, alle !
In va pacher quéques phrasses. Ch’est qu’i étot in forme min Nicolas ! I étot uniqu’mint aveuc ches amis. Cha devot l’chinger d’ches chifflets et d’ches bousculates. Pis, l’jus d’oranche, ch’est plein d’vitamines ! I dot mette l’concheil d’el pub in applicachion et minger chinq fruits et légumes par jour. Pouquo j’dis cha ? Pach’que ches fruits, in l’occurrinche, cha l’a inspiré gramint. I a déclaré : « J’em fais taper d’chus mais j’ai l’banane… » Vingt dius ! Ch’est lal qu’in vot qu’i n’est pon ch’ti, chinon i aurot dit qu’i avot l’frite ! In tout cas, mi, quind in m’parl’te d’banane, cha m’fait gramint sourir’te. Ch’est plein d’chous-intindus. D’jà qu’i a eune réputachion… Infin, i a quind même d’el concurrinche aveuc régime complet ! Pardon, j’em sus gourée, j’voulos écrir’te DSK…

Toudis il est, mes gins, que cha m’a mis auchitôt eune canchon in tiête. Alors, j’auros pu faire eune salate d’fruits, jolie, jolie, jolie, mais min chox i a été d’printe eune canchon d’Lio…

J’ai la banane ! (Parodie toutoulesque de Banana Spit)

Depis qu’in est in crisse

A travers ch’monte

Ouh la la

Je n’ai vraimint pus l’timps

Pus eune seconte

Ouh la la

Faut treuver des idées

Et des fécontes

Ouh la la, ouh la la la la [X2]

[arfrain]

Cros-me, je pète eul forme

Armonté com’ in quatorsse

Min moral est toudis in hausse

Ch’est incroyape, ch’est énorme

[X2]

J’ai la banane, j’ai la banane, d’minde à Carla, oh !

J’ai la banane, j’ai la banane, d’minde à Carla !

Aveuc toutes ches grèfes

Et ches conflits

Ouh la la

Je n’ai vraimint pon l’timps

Rechter au lit

Ouh la la

Faut sortir le pays

De cheule quienlit

Ouh la la, ouh la la la la [X2]

[arfrain]

Faire tous ches bieaux dichcours

Ti, cha t’épuisse

Ouh la la

Mais faut treuver l’truc pour

sortir d’el crisse

Ouh la la

Je n’fais vraimint pon pour

Que cha t’les brisse

Ouh la la, ouh la la la la [X2]

[arfrain]

J’ai la banane, j’ai la banane, d’minde à Carla, oh !

J’ai la banane, j’ai la banane, d’minde à Carla !   Ad lib…

Et v’là l’verchion originale par Lio :