Chalut mes gins ! Vingt dius ! In intind gramint d’miots qui fâch’tent cheule s’maine. Pourtint, ch’est des miots qui, jusqu’à’ch’t’heure, n’avotent jamais écorché mes orelles. Chertain’mint ches tiennes nin pus. Quo qu’ch’est qui ch’pach’te ? In est in train d’réécrir’te ches définichions d’ches dic’chionnaires ?

Ch’est vrai quo. Chi j’te dis parachute doré. Te n’m’in coll’tes pon eune dins m’guiffe pach’que j’ai été impolie aveuc ti. Parel chi j’te dis stock-opchions. Te n’pinses pon nin pus à un gros miot. Te prinds par eximpe « bonus ». Quind t’intinds ch’miot, te n’as pon invie d’aller vir chi ch’trottoir d’in fache i est pus au solel que ch’ti su ch’quel t’es. Chouvint, même, cha veut dir’te que te vas avoir un cadieau. Ch’est plutôt agréape d’avoir un bonus. Ch’est un tiot qué cosse in pus que te n’avos pon prévu. J’n’sais pon pou ti, mais d’pis quéques jours, quind j’intinds bonus, j’in attrap’te des boutions partout. In fait d’pis toudis, j’cros bin que j’n’ai jamais compris l’chins. I faut réécrir’te ch’définichion. Bonus : nom mach’culin. Un bonus est un très gros paquet d’pépettes qu’in donn’te à ches dirigeants d’un groupe ou d’eune sochiété. Par conte, cha n’est pon du tout parel à ti, quind t’acates un produit et qu’te treuves un cadieau d’dins. Imagine cha. Te fais partie d’ches dirigeants d’eune boîte. Pou min eximpe, in va dir’te qu’alle ch’appell’te Crédit à Gris Cols. Ch’est un nom invinté, mes gins. J’auros pu dir’te Sochiété Géniale. Un nom i in vaut un aute, ch’est juss’ pou illuch’trer.
Bref, j’arviens à min echplicachion. T’as un traval vraimint arachint. Cha n’est pon toudis fachile d’gagner t’vie et tin boulot i n’est pon pachionnint. Alors, in a invinté un truc qui permet d’te chtimuler. Ch’est ch’fameux bonus. In va dir’te, pou faire simpe, que ch’est com’ un treissième mos. Sauf que, ichi, cha s’rot pus com’ chi te gagnos à ch’t’Euro Millions tous ches ins. Seul’mint, ches données alles ont été perturbées. T’as gramint perdu d’blé à causse de cheule crisse qui est pachée par lal. T’as quind même fait des pépettes, mais t’in as moins fait qu’prévues. Alors, cha y est ! Te fais eune grosse déprime, pach’que t’avos d’jà tout prévu pou dépincher tin pactole. Tin budget i étot bouclé, quo ! Pis t’avos promis à t’femme qu’alle irot pacher des vacinches d’rêfes grâche à tin bonus. Pon quech’tion d’annuler et d’li dir’te que te vas faire d’euch campinge à Bray-Dunes. Alle f’rot eune tiête d’chix pids d’long et cha t’min’ros d’avintache. Qu’est-che qui pourrot bin t’armonter ch’moral ? Pach’que ch’est pon l’tout. Quind te déprimes, te n’es pus efficache à ch’traval. Te risqu’tes cor’ d’perte un peu pus. Cha te f’rot déprimer d’pus bielle. Te comminches à raconter tes misères. I parôt qu’cha choulache. Pou cha, te vas vir l’seu qui connôt tous ches armètes miracles…
Docteur Nicolas, cha n’va pon. M’sochiété alle ch’est fait un gros bobo et ch’est l’début d’eune grosse hémorragie. Tout cha, ch’est à causse d’ches méchints américains. Mi, cha m’déprime grafe, Docteur. I faut qu’te donn’tes un armète de qu’val pou qu’in arrife à arrêter ch’flot. Pis auchi, pou qu’j’arrife à artourner à ch’traval com’ avint. Ch’Docteur Nicolas i n’veut pon nin pus que t’boutique alle meurt. I a calculé qu’cha allot mette cor’ pus d’brein. Alors, i prescrit eune dosse d’tros milliards d’euros pou qu’te mettes un pinch’mint et qu’te sortes d’cheule déprime. Ch’est bin connu, quind in a ch’moral, in guérit miux !
V’là ! Te rintes à t’boutique, t’as prech’que artrouvé l’sourire. Cha va mette du bieurre dins ches épinards mais cha continue à ête l’crisse. I faut dont pinser à faire des économies. Te sais que ch’Docteur Nicolas i n’arf’ra pon eune nouvielle prech’cripchion d’chi tôt. Ch’pinch’mint i coll’te mais cha ress’ ouvert. In n’est pon prêt à vir eune bielle chicatriche qui n’laich’ra qu’un vague chouv’nir. Cha t’ronche ches sings, mais te vas d’voir mette à l’cour soichinte-quinsse imployés pou faire des économies. T’arcalcul’tes tin budget pou arrifer à l’boucler aveuc ches nouvielles données d’crisse. T’es arrifé à rogner trinte-deusse millions d’euros.
Tout i va bin, seul’mint in buque à l’porte d’tin burieau. Alle ch’oufre avint même qu’te dises un miot. Ch’est t’femme aveuc des paquets plein ches bras. Alle a dû pacher l’après-midi à juer à pretty woman et te t’artreuves aveuc eune carte rouche. D’un cop, v’là qu’te déprimes eune nouvielle fos. Déprime… Des primes ! Millard ! Ch’est vrai cha ! Heureuss’mint qu’t’as réuchi à grappiller trinte-deusse millions. I n’faut pon oublier qu’ch’est l’mos d’euch bonus pou ti et ches proches collaborateurs. Qu’t’as chinquinte et un millions à sortir d’ches caiches ! Pou l’peu, t’as failli t’artreuver aveuc eune schène d’ménache in pus, chi t’avos dû annoncher Bray-dunes à t’femme…

Mes gins, j’n’sais pon pou ti, mais dins m’démonstrachion, i y a qué cosse qui n’va pon. In met soichinte-quinsse perchonnes déhors pou faire trinte-deusse millions d’économie. Pis, in in dépinche chinquinte et un pou quéques perchonnes qui ont conduit l’boutique à l’catastrophe. Pou cha, i a fallu qu’in mette tertous l’main à l’poque pou treuver tros milliards. Pach’qu’i n’faut pon rêfer, mes gins. L’Docteur Nicolas i n’fait pon d’miracle ! Te veux que j’te disse qué cosse, j’cros que j’n’ai toudis rin compris à ch’miot bonus !