Chalut mes gins ! Est-che qu’in peut aborder tous ches sujets, même ches pus grafes, mais aveuc eune approche légère, in va dir’te ? Ch’est l’question que j’em posse d’pis hier. D’autint qu’ch’est un sujet que j’m’étos promis de n’jamais aborder pach’que ch’est cor’ pire que lorch’que te parl’tes d’politique à tape. Pis, j’em sus dit, qu’après tout, chi in arrife à rigoler d’ches politiques quind is fon’tent des pitreries, i n’y a pon d’autes miots. I n’y a pon d’raisons qu’in n’puiche pon faire l’même cosse aveuc ches religieux ! D’autint qu’cha n’est pon mi qui ai comminché…

Ches bieaux jours is sont arrifés. Ch’est l’momint, ch’est l’instint d’ù qu’ches gins, qui ont des carettes décapotapes, is von’tent raviser chi l’mécanique alle n’est pon bloquée. Cha va décapoter grafe ch’ouiquen ! Ches queveux dins l’vint, in va parcourir ch’bielle cimpagne. Ch’est auchi l’printimps. L’chève alle monte dins ches arpes. Ch’est un bion timps pou conter fleurette à tin amoureux ou tin amoureusse dins cheule bielle décapotape, à l’intrée d’euch chous-bos. D’essayer ches sièches pou raviser chi in arrife cor’ à les mette in posichion couchette. Chertains is von’tent faire ch’cop d’el panne d’essinche. Quoque, ch’t’année, in n’ait pus gramint d’pépettes pou faire ch’plein. Bref, ch’est eune périote d’ù qu’te t’chins tout ragaillardi. Pis ch’paysache bucolique, cha t’inspir’te ! Lal, ch’est l’inverche, te n’oublies pon. T’as intérêt à t’capoter ! In n’sait pon d’ù qu’tin gourdin à tiête quercheusse i est allé traîner. Pis, cha marche auchi dins l’aute chins. In n’sait pon dins quo qu’te vas l’ringer !
Cha, ch’étot min paragraphe pou rapp’ler ches princhipes élémintaires. Pis, pou t’dir’te que, com’ tous ches ins, ch’est l’ouiquen du Sidaction. Te treuv’ras ches coordonnées ind’chous. A’ch’t’heure, chi ch’est vraimint trop dur’te pou chouv’nir de ch’t’intérêt d’el capote, j’peux t’el faire in canchon : « Capote dins ches prés, protèche, protèche. Capote dins ches prés, protèche d’ches MST… » In règue générale, te peux rimplacher prés par tous ches autes indrots, i n’y a pon d’restric’chion ! Pis, com’ t’es prévoyant, j’sus sûr’te que t’as acaté eune boîte d’dousse !
A’ch’t’heure, in va parler d’euch sujet qui fâche et j’n’ai pon invie d’el faire chi benoîtement qu’cha ! Alors, j’vais auchi rapp’ler ches princhipes d’basse. Quind in a un chertain âche, voire un âche chertain. Disons qu’in a gramint traîné dins ches rayons et qu’in a larg’mint dépaché ch’date pérempchion, i faut faire attinchion ! In Afrique, ça cauffe ! I y a gramint d’solel et cha n’est pon eune bionne idée d’sortir décapoté ! A doube tite, d’ailleurs. Puich’qu’in n’oublie pon qu’ch’est ches Africains qui pay’tent ch’pus lourd tribut à cheule épidémie d’euch SIDA. Auchi, min Benoît XVI, t’auros miux fait d’mette eune ombrelle aud’chus de t’tiête avint d’raconter des carabistoulles ! Ti, auchi, i faut qu’te sortes couvert chous l’solel ! Parinthèsse pou ch’ti qui n’el saurot pon. In n’lit pon ixvéi, mais seisse ! Cha n’veut pon dir’te qu’i vient d’euch seissième à Paris. Nin, li, i vit à ch’Vatican, dins un palache doré, très loin d’ches réalités d’el vie. L’preufe in est, qu’i y a quéques s’maines, i a déclaré que ch’t’épanouich’mint d’el femme i étot dû à l’invinchion d’el machine à laver ch’linche ! I a gramint zappé d’trucs intre cheule première machine à laver et à’ch’t’heure…
Alors, mes gins, quo qu’i li est arrifé ? In va armonter ch’timps pou vir insimpe ches quéques heures avint d’atterrir in Afrique. In li a fait ches bagaches. Te n’cros quind même pon qu’i va les faire tout seu. Nin, i a d’euch perchonnel pou cha. Pindint ch’timps-lal, min Benoît i chirote un tiot cop d’vin bin frais dins l’quiétute d’ches pièches climatisées d’sin palache. I faut dir’te qu’i ress’ toudis d’euch rabe d’vin d’mèche. Alors, i n’faut pon gâcher. Pis, sin cauffeur i sonn’te tros tiots cop. Ch’est sine pou dir’te qu’i l’attind d’vint. Benoît i monte dins cha papamobile. Alle est climatisée auchi. Heureuss’mint, d’ailleurs, pach’que, vu l’churfache d’vitre, i s’rot vit’ cuit. Enchuite, l’cauffeur i va l’déposser juss’ à ch’bas de ch’t’avion pou partir in Afrique. Climatisé auchi, bin intindu.
« Ladies and Gentlemen, ch’grosse biête à z’ailes in prov’ninche d’euch Vatican i pointe l’biout d’sin nez. Attinchion tertous, i va atterrir. Te dégages l’piste et fissa chi te n’veux pon arsimper à un inchecte su un pare-brisse ! In rappell’te à ches passachers qu’i est interdit d’laicher sin mulet su l’aire d’déposse rapite…» Ch’t’avion i ch’posse. Lal, mes gins, t’as ch’perchonnel d’bord qui oufe ches portes. V’là eune echplicachion. Ch’est parel à ti, quind te fais d’el cuissine à ch’four. Quind t’oufres brutal’mint ch’porte pou raviser à l’intérieur, t’arçois eune claque d’caleur in plein su t’guiffe ! Min Benoît, ch’est parel. Cha l’a tout tourneboulé. Ch’est toudis parel quind in fait eune rupture d’eul chaîne d’euch frod. In te l’as toudis dit !

Ch’est ainchi, mes gins, que ch’qui apparôt com’ eune bielle conn’rie, et j’pèsse mes miots, i sort d’el bouque d’euch viux. Ch’est un minque d’rechpect d’em part, ch’est vrai, mais quind in t’sort : « In n’pourra pon régler ch’problème d’euch SIDA aveuc l’distribuchion d’préservatifs et, qu’à ch’contraire, ch’t’utilisachion alle aggravot ch’problème. » I m’simpe que ch’est li qu’i a comminché à minquer d’rechpect invers tertoutes et tertous ! A bion acouteu…

http://www.sidaction.org/