Chalut mes gins ! Cha pourrot prech’que pacher inaperchu dins toutes ches nouvielles, mais ch’est eune véritape batalle qui ch’jue su ch’Net. Cha pourrot ch’app’ler ch’ju d’euch cat et d’el souris, mais cha va bin pus loin. Ch’est eune véritape guerre d’ches nerfs qui est linchée d’ù qu’tous ches cops is sont permis.

Quo qu’ch’est cor’ que ch’t’histoire ? Cha vient d’eune constatachion d’ches conseillers d’euch Web, d’euch gouvern’mint. In effet, is ch’sont aperchus qu’ches internautes is allotent gramint pus vit’ qu’eusses pou arlayer eune informachion. Cheul’mint, ch’est très chouvint hostile à l’politique d’min Nicolas. In ch’in s’rot bin douté tout seu. Quind ches gins is sont contints, ch’est bin rar’te qu’is aill’tent l’dir’te. Quind is ne l’sont pon, is in rajoutent eune couche. Ch’est com’ cha qu’in fait ches rumeurs et qu’cha fait l’tour d’el France in moins d’timps qu’i n’faut pou l’écrir’te.

Chaque fos qu’is ont voulu faire eune communication offichielle su ch’toile, ches communautés d’blogeurs is ont crié à l’propaginte et cha a fait pire qu’miux. Alors commint qu’in peut faire ? Ch’est bin l’question qui a été possée, in début d’euch mos, à ches conseillers d’euch Web. Mes gins, is ont eune réponche : Ch’est qu’pou agir conte tous ches blogs et ches rumeurs hostiles, i n’faut pon l’dir’te. Ch’est à dire, te n’démens pon in f’sint un blog offichiel ou eune pache d’communicachion su un réseau chochial. Te ravises tout quo qui ch’pache, mais sins ête vue. Donc, te d’viens ch’Rambo du Web dins eune bielle t’nue d’camouflache. Ah ! I ress’ eune trossième cosse à faire et nin d’ches moindres. Te v’là propulché ch’grind gourou d’Internet et te n’as pus qu’à ram’ner ches brebis égarées vers tin bion pâturache.

Ch’est ainchi, par eximpe, qu’aveuc ch’conflit qui opposse ch’ministère de l’arquerche, quind te tapos « inseignints-quercheurs » dins ches moteurs d’arquerche, te quéos su ches chites hostiles, com’ « sauvons l’arquerche ». Avint même ches chites offichiels qui echpliquotent d’quo qu’alle est faite cheule réforme. Alors, pou essayer d’ram’ner ches cliqueux fous dins ch’drot qu’min, ches gins d’euch ministère is ont acaté dichcrèt’mint ches liens pou ête plachés in tiête d’liste. Te peux vérifier par ti-même, te quées su ches points gouv.fr avint tout l’ress’ ! Ch’est vrai, qu’in général, quind te querches quéque cosse, te comminches par quo qu’te treuves dins ch’t’haut d’liste…

Tout cha, mes gins, cha n’est pon réjouichint. Ch’est d’el manipulachion pure et simpe. In toute imparchialité, i faut bin arconnaîte que ch’est ni pus, ni moins, qu’el réponche d’euch berger à l’bergère. Te vos qu’j’avos raison d’parler d’brebis quéques lines pus haut ! Cha m’a donné matière à réfléchir et j’em sus dit qu’in n’allot pon tarder à vir ches faux blogs su ch’toile, pou « informer offichiell’mint » sins in avoir l’air. Cha ne s’rot pon étonnint, nin pus, qu’in fache l’même cosse quind un politique i aura sin imache in chute lipe ; pou n’pon dir’te in berne. Cha va vit’ dev’nir un d’ches bazars sins nom ! Alors, com’ in est ichi pou n’pon ch’printe à chérieux, cha m’a donné eune idée. J’in ai parlé à min inquêtriche, Bridget Columbo, pou qu’in puiche d’jà avoir des indiches qui permettrotent d’savoir chi in a affaire à un vrai-faux blog. In n’in a chosi un, par ch’t’hasard du clic…

Ch’blog d’Nicolas, ch’vie, sin oeufre, tout in imache. Eune bielle pache d’présintachion aveuc, in première photo, eune schène d’el vie d’tous ches jours. Min Nicolas i est aveuc sin chac à roulettes in train d’faire sin marché. Harnaiqué d’eune jolie chalopette su un pull roughe. Carlita alle est juss’ à côté d’li et alle ch’cocaïne… Pardon, mes gins, j’sus in train d’m’imberlificoter. J’voulos dir’te alle ch’extasie d’vint un stand d’concombres com’ chi alle n’in avot jamais vu d’euch vie. Cha n’est pon simpe pou mi, j’n’ai pon été in ouiquen à ch’Mexique, invitée par un baron d’el drogue. Alors, j’mélinche un peu.

Ch’deussième photo. Ch’est toudis ches deusse-lal. Is sont à l’terrache d’un café. Cha arsimpe à un troquet dins eune tiote ville d’provinche. In peut lir’te ch’t’inseigne « Au fou quête ». Chertain’mint que ch’patron d’bistro i a un chins très dév’loppé d’euch ju d’miots, mais pon gramint ch’ti d’el grammaire, pou n’pon savoir que quête ch’est féminin. Ch’est vrai auchi, à ch’décharche, que « à la folle quête », cha fait gramint pinser à un imployé d’chez Michou, qui pache dins l’salle, pou d’minder à ches clients d’mette eune obole, pou ches bionnes œufres.

Trossième photo. Ch’est ches vacinches. Nicolas et Carla à l’plache. Vingt dius ! Cheule mer alle n’est nin vraimint bleue. In dirot qu’cha a été pris su eune plache dins ch’Nord ! Chi, ch’est bin cha. I y a ches détals qui n’tromp’tent pon. In peut vir des pare-vints in tichu aveuc des piquets in bos. In arrière plin, in vot même des dunes. Pis, vu ch’t’hauteur, cha n’arsimpe pon à ch’dune d’euch Pilat ! Min Nicolas, t’auros pu mette eune léginde chous l’photo. Commint qu’te veux qu’in d’vine d’ù qu’ch’est !

Quoque, mes gins, j’croe qu’j’ai parlé trop vit’… Pach’que su l’photo chuivinte, ch’est toudis eusses in vacinches. Is sont in train d’minger autour d’eune tape pliante. J’ne jur’ros pon, pach’que cha a été pris d’assez loin, mais in dirot bin que, dins ches achiettes, i y a des noulles. Ch’est chertain’mint Carlita qui a concocté eune chpéchialité italienne. Attinds ! J’n’rêf’te pon. J’vos eune inseigne dins l’fond. In dirot bin un perroquet d’chus. Cha y est, mes gins ! Cha a été pris à Bray-Dunes à ch’campinge d’euch Perroquet ! 

Bion, cha m’a l’air d’ête vrai tout cha. Is sont com’ tertous apparemmint. J’n’ai rin vu d’bling-bling là-d’dins. Cha dot ête tous ches autes chites qui ont des photos-montache… J’auros bin ravisé eune aute pache aveuc ti, voire un aute chite, mais j’ai cor’ eune cosse importinte à t’dir’te avint qu’in ch’quitte. Mi, j’n’ai pon eu b’soin d’payer pou ch’moteur d’arquerche. Quind te tapes Marie Toutoule chous Google, j’sus à l’première line ! Ch’est grâche à ti et à tous ches lecteurs d’France, d’Belgique, d’euch Québec, d’Algérie et même d’Chine ! Chertain’mint d’ailleurs auchi, mais ch’is n’euch fon’tent pon connaîte, j’n’peux pon l’savoir. Alors, ch’est l’momint de m’el dir’te ! Et quel meilleu jour qu’à’ch’t’heure, mes gins, pach’que cha fait un in que j’sus intrée dins t’vie. Cha fait un in qu’j’raconte mes avintures. Cha fait un in qu’j’comminte ches actualités aveuc m’vision d’ches cosses. Rin qu’pou in rir’te, pach’que l’vie alle est chuffisammint triss’ ! Cha fait un in qu’gramint is m’invoi’tent des messaches pou m’incourager et m’félichiter. Merchi tertous ! Ch’est l’saint Patrick, j’bos pon d’bière, mais te peux faire péter eune roteusse, voire eune boutelle d’whisky, j’arrife…