Chalut mes gins ! Quind in arrife à ch’mitan d’euch mos d’march, in pinse auchitôt qu’in s’ra bientôt à ch’printimps. Ches ojieaux is cantent, ches premières fleurs alles comminchent à sortir d’tierre. Ch’est auchi ch’t’époque d’ù qu’in ch’dit qu’in va donner un bion cop d’lessivache à toute ch’baraque. Ch’est ch’ménache d’printimps ; ch’ménache in grind…

J’n’sais pon chi ch’est cha qui a inspiré min Nicolas, ch’Ro des Francs, et Angela, Grinte Prêtrèche d’el fiête d’el bière, mais ches deusse-lal is ont déchidé d’faire du ménache dins ches paradis fich’caux. D’jà, pouquo in appell’te cha un paradis ? Ch’est un indrot, un pays même, d’ù qu’tin argint i pach’te inaperchu d’ches gins d’ches impôts. Te peux arrifer aveuc eune malle pleine d’billets, et pon ceusses de ch’Monopoly, t’as ch’binquier qui n’dit rin. Bion, i est contint de t’vir, quind même ! Churtout quind te l’oufres. I est auchi heureux d’mouiller sin dogt et d’commincher à compter toutes ches imaches. Ch’est auchi un paradis pach’que, même chi ch’t’argint i est sale, in deusse cops d’pschitt, in li donn’te eune bionne allure et ti, te paches pou monsieur Propre et pou un anche à ch’paradis ! Ichi, dins ches binques, ch’est l’inverche. Quind te veux déposer quéques billets, in t’echplique qu’i n’y a pon d’caiche ou qu’i faut v’nir intre telle heure et telle heure. Parel, quind t’as b’soin d’printe tes imaches. Te dos printe rindez-vous. Ch’est vraimint l’infer d’récupérer sin pognon !
Quind t’as gramint d’pépettes, ch’est l’paradis, chertes, mais ch’est auchi pach’que te veux filouter ch’fich’que. Te veux contrer cheule loi d’ches vasses communicints. In effet, chi cha rinte dare-dare chez ti, te sais qu’eune partie alle va arsortir auchitôt pou ches impôts. In ch’attach’te vit’ à ches imaches-lal. D’autint qu’t’in as jamais deusse parelles, puich’que ches numéros is sont tertous différints ! Alors, te veux mette un limiteu d’débit su ch’robinet qui aliminte ch’Trésor Public. Seul’mint, cheule loi d’ches vasses communicints, i faut bin qu’alle ch’appliqu’te quind même ! In n’arfait pon ches fondamintaux d’el physique. Pou que ch’nivieau i sot maint’nu coûte que coûte, in n’oufre pus d’euch côté d’ches gins com’ nou’z’autes. Et cha no coûte ch’que cha no coûte, ch’est l’infer !
Avint cheule réunion de ch’G20, eune grinte partie d’ches paradis fich’caux is ont déchidé d’ramoner d’vint leu porte, pou éviter d’avoir des problèmes par l’chuite. In effet, ch’groupe d’ches vingt i veut infliger des sinc’chions à tous ches pays dont l’système bincaire i est, com’ qui dirot, un peu obscur. I veut même faire une nouvielle liste noir’te d’ches pays dins l’monte d’ù qu’in peut cor’ faire quo qu’in veut aveuc ch’pognon. Bin intindu, à l’aute biout d’euch monte, in s’in fout grafe ! Ch’est churtout ches paradis in Europe qui ont peur. Chi ches autes pays is boycottent ches r’lachions, pou eusses, d’un paradis, cha va vit’ d’vnir un infer. Auchi, d’pis quéques jours, l’Belgique (zéro point), l’Luxembourg (two points) et l’Liechtenstein (à tes chouhaits, ten points !) ont déchidé d’juer ch’ju.
Chéquinche émochion, mes gins. Ravise ch’vol d’euros dins un rayon d’lune. Ch’est bieau, hein, tous ches billets arpliés en V com’ ches ailes d’ches ojieaux. Is ont eune bielle invergure ches chinq chints. Pis i n’y a pon gramint d’tiots chinquinte. Cor’ moins pus tiots. Fin d’l’émochion, artour à ch’réalité ! Pach’que j’ai bin l’imprechion qu’in va achister à eune grinte migrachion d’billets d’binque. T’in as eune partie qui va aller ch’dorer l’pilule à ches Seychelles. Pis eune aute à ches Bermudes, offshore. Pardon, mes gins, j’voulos dir’te of course, mais cha ress’ dins ch’t’echprit, offshore, alors tout i va bin. J’n’te parl’te même pon d’ches îles crocodiles. Nin, ch’est pon cha. Alligator ? Nin, zut ! Ch’est caïman l’même cosse in tout cas ! T’armarqu’ras, par l’même occasion, qu’in n’treuv’te pon d’paradis fich’cal su l’binquisse. In craint chertain’mint l’fonte. Puich’qu’in dit qu’l’argint i brûl’te ches dogts, i y a un risque.
Ress’ deusse cas à vir. Ch’est Monaco et Andorre. Com’ in l’sait (prech’que) tertous, min Nicolas i est coprince d’Andorre aveuc ch’t’Evêque d’Urgell d’Echpagne. Nin, nin, nin ! J’n’ai pon dit que ch’étot l’tiot prince, min Nicolas ! Quoqu’i déchine gramint d’moutons, mais is sont tertous tondus. I les appell’te ches Français… Prince, cha fait auchi gramint goûté. Quoque, fourré à ch’chocolat, noir’te tévéa chinq-chinq, évid’mint, in l’arconnôt bin lal. Bref, j’arviens in Andorre, qui est auchi un paradis chi te veux rimplir tin frigo, pach’que ch’est cor’ moins quer qu’ches discounters. Is ont déchidé de l’ver che s’cret bincaire avint l’fin d’l’année. Donc, i n’va pus ress’ter qu’Monaco in Europe.
Mes gins, après Prince, v’là Monaco. In va finir par croir’te que j’fais d’el pub pou Lu ! Mi, j’n’y peux rin chi, à Monaco, i y a auchi un Prince. Sin Altèche Chérénichime Albert, grind frère d’vint l’éternel d’un ouragan, i est à ches abonnés absints, pou l’momint, et i fait l’sourde orelle. Pouquo ? I est p’t-ête occupé à treuver eune nouvielle copine qui li f’ra un tiot quinquin. Cha li f’ra cor’ eune pinchion alimintaire d’pus. A forche, i va ch’artreuver directeur d’un hôtel aveuc toutes ches pinchions complètes, mais cha n’no ravise pon ! Mi, j’ai bin eune echplicachion. Ch’est un rocher, Monaco. Ouf, Suchard, cha n’est pon Lu ! A forche d’creuser pou faire ches coffres-forts, ch’est dev’nu un vrai gruyère. J’auros pu dir’te un vrai emmental mais après Suchard, j’voulos ress’ter in Suisse. D’autint qu’is ont d’jà fait ch’ménache, eusses ! Pou l’instint, tout i va bin à Monaco. In a bourré ches coffres d’billets et d’lingots et tout i tient in plache. Mais chi Albert i lèv’te che s’cret bincaire, cha va vit’ ch’vider. Ches fondachions alles risqu’tent d’in printe un cop et Monaco i cour’te un grind dinger !

V’là, mes gins. Cha ress’ quind même abstrait pou l’commun d’ches mortels, ches paradis fich’caux. In s’rot pus dins l’catégorie d’ù qu’ch’est l’infer pou boucler ch’fin d’mos. Alors, j’avos invie d’terminer par eune canchon, mais j’em sus dit que, contrair’mint à Christophe, in n’connaitrôt jamais ches paradis perdus, pach’que, ch’est bin connu, mes gins, un d’perdu, disse d’artreuvés !