Ches crêpes ch'ti à l’bière.

Lundi 2 février 2009 1 02 /02 /Fév /2009 12:04

Ches crêpes ch'ti à l’bière.

Chalut mes gins ! Com’ j’archois souvint des maiyes qui m’demind’tent chi j’n’peux pon mette des archettes d’timps in timps, j’vais profiter de ch’jour d’el Chandeleur pou t’donner m’archette d’crêpes mais ch’ti, ch’est à dir’te faites aveuc d’el bière ! Com’ ches crêpes tradichionnelles, te pourras t’in chervir auchi bin chucrées qu’chalée…

Avint de v’nir su l’archette, in va rapp’ler qu’el Chandeleur, ch’est l’quarintième jour après Noël et, qu’à l’origine, ch’étot l’présintachion de ch’t’infint Jésus. Ch’est très rapid’mint dev’nu l’fiête d’ches candelles, d’ù qu’ch’nom i vient. L’soir, à minuit, in alleumot ches bougies. A’ch’t’heure, in connôt l’Chandeleur pou ches crêpes. Alles symboliss’tent, d’après ch’forme ronte, l’disque solaire qui évoqu’te ch’t’artour de ch’printimps après l’hiver. Pou chertains, ch’est auchi lié à l’superstichion. In effet, te dos faire sauter eune crêpe d’el main drote in t’nant eune pièche d’el main gauche. Ch’est suppossé t’am’ner l’prospérité pindint toute l’année. Pou ches gins d’el terre, in gard’te l’première crêpe qu’in met dins eune armoire et, ainchi, ches prochaines récoltes alles s’ront abondintes.
Ch’est pon tout cha, mais cha creusse gramint d’parler d’el Chandeleur, alors in va pacher à ches cosses chérieusses et direc’chion l’cuissine ! J’in vos d’jà qui ch’préchipite su mappy pou aller querquer un plin. Mes gins, t’arviens su m’pache d’abord. T’auras tout ch’timps, après, pou treuver, chez ti, l’pièche d’ù qu’te n’mets jamais ches pids. Vingt dius ! j’espèr’te que, com’ dins cheule pub, is n’von’tent pon d’minder quo ch’est eune poêle.
Ch’est diffichile d’te donner ches quintités pach’que ch’est vraimint proporchionnel à tin appétit et ch’nompe d’gins qui sont assis à tape. Alors j’vais partir su eune moyenne d’inviron chinq crêpes pou chint grammes d’farine aveuc eune crêpière d’vingt-chinq cintimètes d’diamète. Te vos, après ch’est com’ in math, te f’ras eune règue d’tros.

Pou 25 crêpes inviron :

500 grammes d’farine.

5 œufs (d’poules ; chi te mets d’autruches, te multiplies au moins par quinsse.)

5 cintilites d’huile (t’évites l’huile d’olife chi te veux qu’ches gins is in ming’tent.)

25 cintilites d’lait.

1 tiot peu chuque et eune pinsée d’chel.

Bière blonte prévoir 1 lite (te finiras ch’qui ress’.)

Te mets t’farine dins eune jatte et te fais un cratère dins ch’mitan. Te mets tes œufs, sins ches coquilles, bin sûr’te. Te rajoutes l’huile, ch’lait, l’chuque et l’chel et te comminches à touller ch’mélinche in incorporint ch’farine peu à peu. I faut qu’t’aies un apparel homogène ou éviter ches grumieaux. Inchuite, te mets d’el bière, un peu à l’fos, tout in continuint d’touller. I faut allonger ch’pâte jusqu’à obtenir eune préparachion fluide. Ch’t’idéal, ch’est d’laicher arposser pindint eune heure avint d’commincher à cuir’te.
Au momint d’el cuichon, t’artoulles pou vir chi cha n’est pon trop épais. Chinon, t’armets d’el bière chi te n’as pon tout bu intre deusse. Tu peux rajouter un tiot cop d’ieau auchi. Te mets t’poêle ou t’crêpière à cauffer. I faut bin graicher cheule crêpière alors, chi te n’sais pon commint, ch’est très simpe. Te mets un morcieau d’burre dins un linche propre in coton ou dins eune feulle d’papier absorbint. Com’ cha, te peux frotter su toute l’churfache intre chaque crêpe. Pou les maint’nir à ch’caud pindint toute l’cuichon, ch’t’idéal, ch’est d’mette eune achiette su eune casserole aveuc un peu d’ieau d’dins et d’mette à fu doux. Te n’auras pus qu’à y dposser ches crêpes eune à eune.

Allez, mes gins, à ch’boulot et qu’cha saute ! Bion appétit ches galaffres !