Chalut mes gins ! Commint qu’ch’est qu’te vas à’ch’t’heure dins un monte d’ù qu’tout i a chingé d’pis ch’t’investiture ? Quo ? Te n’vos pon l’différinche aveuc avint. Bah, mi nin pus ! In tout cas, aveuc tout ch’armue-méninches qu’in a fait à cheule tévé, mi, cha m’a travallé toute l’nuit. J’em sus couquée in pinsint américain et j’ai rêfé in inglais ! Forchémint, te m’connos, mes gins. Mi, je n’peux pon rêfer com’ tertous ! Nin ! I faut qu’min echprit i fache des plins à n’in pus finir. Et v’là t’y pas que j’em sus artreuver dins l’pieau d’Michelle, ch’Première Dame…

Min Barack i n’in finissot pon d’parler. Sin dichcours, j’le connaissos par cœur. A forche d’li avoir fait répéter pindint des jours d’long. J’comminchos à treuver l’timps interminape, ichi, su ches marches in plein courint d’air ! J’li auros bin dit d’aller gramint pus vit’ mais i fallot que j’garde un sourire affiché. I y avot gramint d’caméras qui étotent in train d’filmer et i fallot faire attinchion. Ch’est qu’in aurot pu mau interpréter l’moinde d’mes mouv’mints et l’moinde chuchot’mint ! Pis, min echtomac i comminchot à ch’rapp’ler à min bion chouv’nir. « Dégroulle-te, min Barack ! » que j’pinsos fort’mint dins m’tiête. « Mi, j’n’vais pon t’nir pus long et j’vais faire eune hypo in direct d’vint ches caméras ! Pache un paragraphe ou deusse, is n’y verron’tent tertous que du fu ! »
Bin, nin ! I a fallu qu’i discour’te jusqu’à ch’point final sins oublier eune virgule. I a même bafoullé un tiot cop. I savot à ch’fond d’li que tout ch’bieau parlache i allot ête gramaint diffichile à mette in oeufre. Pis, ch’étot l’émochion sûr’mint. Mi, cha m’creusot plutôt, ches émochions. Et lal, j’avos m’dosse in grind ! Infin, in étot quind même arrifé jusqu’à l’tape à ch’Capitole. Mes amis de ch’monte, l’prochaine fos, j’mettrai des barres d’céréales dins min chac. Pach’que j’avos bieau avoir ch’t’echtomac dins ches talions, cha n’étot pon ch’t’intrée qui m’donnot l’invie d’minger. Nin ! J’redoutos même ch’t’instint d’ù qu’j’allos d’voir boir’te ch’première gorgée ! Mais quelle idée i avot eue lal min homme ? Tout cha pou faire com’ l’aute. Ch’étot vraimint pon cool ! Te t’imagines, ti’z’aute, eune mer in miniature dins eune achiette creusse, aveuc ches fruits d’mer qui flottent au gré d’ches vagues qu’em ceuillère alle faisot… Beurk !
Quind in est eune nouvielle Première Dame, i faut printe su so. Cha n’étot pon l’mer à boir’te, mais juss’ eune achiette creusse. Auchi, j’avos fini m’choupe in echpérint que ch’verre d’Sauvignon blinc i allot m’armette ch’t’echtomac dins l’bion sins. Après, cha allot miux. Même chi in aurot dû faire appel à un traiteur français plutôt qu’à un inglais. Pach’que ch’canard et ch’faisan, ch’étot corréque, mais cheule echpèche d’confiture, qu’in a chervie aveuc, ch’étot pon terripe ! Pis, ches patates douches, ch’est bin, mais j’auros préféré un bion cornet d’frites. Heureuss’mint qu’ch’est pon li qui fait l’cuissine à l’baraque, pach’que j’s’ros cor’ pus dins ches galas d’bienfaisinche pou éviter ches menus. Après, mes amis de ch’monte, in a eu un bion dessert : un gâtieau aux peummes aveuc d’el cannelle et eune boule d’glache. Pis, ch’étot chimpagne ! Californien, of course, in n’peut pon ch’permette d’boir’te du vrai chimpagne français. Cha l’aurot foutu mau d’vint tous ches compatriotes !
Min Barack i n’in finissot pon d’parler. Cor et cor’… Ch’t’heure alle tournot. Cha n’étot pon l’tout, mais i fallot après qu’in fache l’tour d’ches bals qu’in donnot. Pach’qu’i étot in train d’oublier sin planninge. Pourtint ch’est li qui avot déchidé d’aller couquer à minuit pétint. J’dis pétint pach’qu’i m’avot fait rigoler in disint : « A minuit, un supo et au lit ! L’lind’mainà ch’potron-minet, j’ai rindez-vous aveuc ches hommes d’l’ombe. Ches gins d’el CIA… » Cha, i n’minquot pon d’humour, min Barack, dir’te qu’i donnot rindez-vous à ches gins d’l’ombe, à ch’alvé du solel… Infin, i ch’étot déchidé à l’ver l’cimp et in étot arrifé dins ch’premier bal. In aurot dû un peu répéter ches pas d’dinche. Pach’qu’in étot gramint rouillé aveuc l’valche. A l’baraque, in acoutot pus ches canteurs souls.
In attindint, mi, à forche d’tourner in rond, cha m’saoulot ! Pis, Barack, cha f’sot tros fos qu’i m’marchot su ches pids. « Fais gaffe à tes cannes, min chuque ! » que j’li avos chuchurré à l’orelle. « L’prochaine fos, te m’acout’ras. Ch’est pon pou rin que j’t’ai proposé d’faire appel à ch’pus grind chorégraphe français pou qu’in révisse ches pas ! Pourtint, ch’est un bion, ch’Kamel Ouali. I aurot même réuchi à faire dincher Cléopâte, à ch’qu’i parôt ! » Mes amis de ch’monte, te n’d’vin’ras jamais quo qu’i m’a répondu min boute-in-train d’mari : « Ch’est pach’que te voulos faire momie égypchienne qu’t’as mis eune rope blinche jusqu’à ches pids ? » Quo qu’te veux que j’li réponde à part : « Nin ! Mi, j’ai fait com’ ti, aveuc tin arpas historique. In a armonté ch’timps, bin mi auchi ! Bye-bye, l’couleur, j’em sus misse in noir’te et blinc ! » Ch’étot toudis com’ cha après des émochions parelles. In ch’lâchot un peu. Toute cheule préchion alle redeschindot tout duch’mint à ch’fur et à m’sure que ches tours d’pistes is ch’additionnotent.
Et de huit, et de neuf… Infin, in arrivot à ch’dernier bal ! Ouf ! In allot bintôt pouvoir rintrer à ch’baraque dins quéque timps. Pis, lal, ch’étot pon cor’ gagné qu’in dormira com’ des chouches. J’n’sais pon pou ti, mais quind in chinge d’lit, l’première nuit, cha n’est pon parel. In n’artreuve pon ches tiots creux d’ù qu’in ch’sint bin et cha perturb’te ch’sommel. Churtout pou mi, car j’avos com’ qui dirot un tiot problème in pus ! J’avos bieau ête gramint mate d’cheule journée et d’cheule fièfe de ch’mardi soir, j’avos gramint d’mau à digérer m’choupe. Commint que j’peux t’esspliquer cha, mes amis de ch’monte ? Mi, j’étos in train d’faire eune valche, mais ches fruits d’mer is étotent plutôt rock’n’roll à l’intérieur. Is f’sotent eune boum improvissée mais pon su ch’même tempio ! J’in choupchonnos même un d’vouloir ête ch’Ro d’el piste et d’faire du tralala…
In étot infin dins cheule limoussine blindée su ch’quemin de l’artour. Vingt duis ! J’avos bieau cherrer ches fèches, cha dev’not gramint dur’te. Pis, lal, j’ai eu eune pinsée qui m’a fait com’ un frichon dins ch’dios. In un instint, j’voyos l’schène. J’arrivos su ch’perron, ch’perchonnel i m’ouvrot l’porte. Bion, mes amis de ch’monte, cha n’est pon tint que j’avos peur que ches toilettes alles soent occupées. Nin ! vu l’nompe qu’i y avot, cha aurot bin été l’diape. Mais ch’est churtout que j’voyos l’distinche à parcourir ! Pach’que ch’est pon ches couloirs qui minquotent et qu’in pouvot fachil’mint ch’y perte ! D’autint que j’n’connaissos pon cor’ parfait’mint l’topographie d’ches lieux. Et ce, même chi in avot eu eune visite guidée aveuc ch’viux Daboliou…

Ch’est chertain’mint cha qui m’a réveillé brutal’mint, mes gins. Toudis i est que j’em sus artreuvée assisse su min lit aveuc eune invie préchinte. Cha n’t’est jamais arrifé, ti’z’aute, d’rêfer d’avoir b’soin d’faire qué cosse. Cha t’sort d’tin sommel et t’as vraimint invie. Un rêfe interactif, in quéque chorte ! Ou un signal d’alarme pou qu’te n’oublies pon, ch’est ti qui vos. Infin, cha n’dot pon ête tout rosse, tous ches jours, l’vie d’eune Première Dame. Pis, mi, j’cros bin que j’em pach’rai d’moules-frites, ch’soir, aveuc m’copine Bridget Columbo. In ch’f’ra livrer des pizzas sins fruits d’mer, dins l’cas d’ù qu’cha s’rot un rêfe prémonitoire…