Chalut mes gins ! In va cor’ ress’ter dins l’echprit musique. I parot qu’cha adouchie ches mœurs, ch’est bin qu’ch’in dit. Dins un monte d’ù rin n’tourn’te rond, i n’faut pon s’in priver. Pourtint, chi t’as eu l’occassion d’raviser cheule chérémonie d’ches Music Awards, j’n’sais pon chi in a ches mœurs vraimint adouchis. Mi, j’pouch’ros même l’bouchon à dir’te que cha m’a misse tout in foufelle mais pon dins l’bion sins ! Cha, in l’a su que ch’étot ch’dissième anniversaire. Disse ins d’chérémonies d’ù qu’chint pou chint d’ches gins qui ont gagné un Award is fon’tent cor’ simblint qu’is n’ch’y attindotent pon ! Pou te dir’te, mes gins, que ch’est vraimint dins l’improvisachion totale, j’vais t’faire eune « lecture » d’ches imaches…

In premier, in t’annonche l’catégorie dont in va armette ch’prix. Ch’est toudis l’même, un grind NRJ in doré et in relief ! Très grind chic su eune queminée. Ch’est du métal, cha n’fond pon à l’caleur. Pis, chi t’es pus intellectuel, i faut qu’te t’débroulles pou in gagner deusse. Com’ cha, cha fait cherre-lifres ! Inchuite, in fait v’nir deusse ou tros pipoles qui fon’tent l’clown aveuc un brin d’humour improvisé. Chi, in sait qu’ch’est vraimint improvissé car is sont tous in train d’lir’te l’prompteur et com’ i y in a gramint qui, par coquett’rie, is n’ont pon mis ches lunettes, is sont bin obliger. Après, in t’proposse ches nommés. Cha fait des années d’ù qu’in t’arbat ches echgourdes aveuc ches nominés, pou ches disse ins, in a gramint bin briefer tertous. I n’y in a pon un qui ch’est gouré. Tertous i étot nommé et pon nominé !
T’as l’voix off qui t’les monte aveuc un esstrait d’leux canchons, pis in arvient à ches présintateurs chosis. In peut faire eune parinthèsse pou dir’te que ch’est l’fruit du hasard. I faudrot ête vraimint moqueux d’gins pou dir’te qu’is sont nommés, gagnants ou qu’is ont qué cosse à vinte ! Ch’est vrai cha ! Pouquoi in ne d’mind’te pon à Marcel l’boucher, li auchi, i a des boudins à vinte ! Mes gins, ch’est l’momint, ch’est l’instint. « Et le gagnant est… »
Ch’est ichi qu’in va pouvoir printe conscienche d’toute cheule spontanéité. D’habitute, pou faire durer l’suspense, in invoie ches batt’mints d’tambour. Ichi, is sont cor’ in projet qu’t’as d’jà l’canchon du gagnant qui démarr’te ; avint même que l’aute i finiss’te d’dir’te sin nom ! Pis, parel pou ch’caméra qui n’querque pon eune s’conde. Dins toute cheule foule, alle a d’jà treuvé ch’cibe et te vos ch’guiffe in gros plin. Tindis qu’t’intinds l’fin d’sin nom… A l’acoute de sin nom, just’mint, l’vainqueur i a ches zis tout écarquillés par l’surprisse : « Commint, ch’est mi qui ai gagné ch’prix ? Vraimint, j’n’m’y attindos pon… »
L’nouveautié d’l’année, ch’étot dins l’présintachion. In a fait appel à Nikos Imagasse. I n’a pon eu trop d’mau à faire sin numéro, puich’que ch’est com’ l’Star’Ac. In promochionn’te avint tout TF1^er et toutes ches émichions à l’gloire d’el culture. NJR auchi, qui l’ress’ d’l’année critique TF1^er pou ches mêmes programmes. Et com’ ches deusse-lal is sont co-producteurs d’Cléopâte, in profite pou leu faire gagner ch’prix du meilleu groupe/duo/troupe français d’l’année. Cha, is von’tent avoir gramint d’mau à rintabilisser Rabbi Jacob su schène, alors i n’faut rin négliger pou l’promo pharaonique d’Cléopâte !
Pou Nikos, in a prévu deusse cadieaux. Cha a dû li faire plaiji. Cha f’sot huit ins qu’i rêvot d’avoir Mylène Farmer à l’Star’Ac, mais alle n’avot jamais voulu y aller. Ichi, com’ alle savot qu’alle avot gagné un prix, alle est v’nue. Ch’est pon dur’te à d’viner, mes gins ! Quind alle n’gagn’te rin, alle n’est pon lal. Alors, chi alle a accepté d’rincontrer Nikos, in pouvot ête sûr’te qu’alle avot gagné qué cosse ! And ze ouineur iz Nikos qui essay’te d’arracher tros ou quate miots à Mylène qui vient d’canter, pardon chuchurrer sin nouvieau tite. Pis, ch’est confirmé, alle a bin fait de v’nir. Pach’que, quinsse minutes après, ch’est alle qui est meilleu album français d’l’année ! Incroyape ! Dir’te qu’chertains is n’crotent pon à ches coïncidinches…
Deussième cadieau pou Nikos, eune arvinche ! Après l’grind artour d’Britney Ressort, pardon j’voulos écrir’te Spears, dins l’Star’Ac et eune prestachion qui a valu gramint d’moqu’ries des gins, Nikos i a été vingé in direct. I annonche Britney, in intind ch’canchon et ch’vox mais alle a gramint chingé. Eune grinte noir’te alle a pris ch’plache. Intre deusse, i y a eu eune obamanisachion d’el canteusse. Nikos i jue l’churprisse. Ch’est churprisse-churprisse ? Nin ! Ch’est auchi un cop d’ches Canadiens, mais ch’ti-lal i ch’appell’te Anthony Kavanagh ! Tout compte fait, mes gins, in a eu auchi un cadieau. Pach’que play-back pou play-back, j’ai pus querre à vir un comique barracké in talon aiguille qu’eune tiote alcoolo in play-back !
Ches organissateurs is n’avotent juss’ pon prévu un truc : Quind Nikos i est dins ches paraches, in peut ête sûr’te qu’i va ch’pacher un truc dingue et vraimint imprévu pou l’cop. Ichi, is ont fait fort. In annonchant « I kiss the girl » d’Kate Perry com’ canchon internationale d’l’année. Is aurotent dû ch’douter qu’in invoyant « Disturbia » d’Rihanna, i y ait, commint dir’te, eune coulle dins ch’potache… D’autint qu’alle n’étot pon lal, Rihanna. Ch’étot un bion indiche quind même. In pus, quind t’as eune canchon dont in pourrot traduir’te ch’tite par « déring’mint » avoue, mes gins, qu’cha prête à rir’te. Et qui i étot in déring’mint ? A’ch’t’heure, in n’sait pon commint ches deusse canteusses alles von’tent faire pou partager l’trophée. Quinsse jours chez l’eune, quinsse jours chez l’aute… Pou l’année prochaine, i faudra un peu moins d’improvisachion !

Avint qu’in ch’quitte, mes gins, i faut qu’j’fasse un clin d’oeul à Julien Doré, qui avot vraimint invie de ch’trophée doré. Cha li est paché chous l’nez ! Pourtint, i a vraimint dépaché ches limites in ch’montrint dins un justaucorps, in cuir, su eune chorégraphie à ches tiots oignons. Ouais, mais l’prochaine fos, i pins’ra à Kamel Ouali et i aura eune chince in pus, pou n’pon dir’te assurée !

Mes gins, in finissint ch’t’artique, j’em rinds compte que j’auros pu écrir’te cha ches autes années ou pou l’plupart d’ches émichions d’chérémonie. Pourtint, j’te jur’te que mi, ch’est improvissé total. Ch’matin, in me l’vint, je n’savos vraimint pon quo qu’j’allos bin t’raconter…