Chalut mes gins ! I y a un bion biout d’timps qu’in n’a pon parlé d’canchons insimpe. Alors, j’auros très bin pu t’expliquer que ch’première châine d’tévé alle veut faire eune émichion du ginre Star’ac mais aveuc ches gamins. Eune sorte d’école d’ches fans relookée. Ch’est l’preufe que cha n’est pon l’imaginachion qui minque ! Mais, in verra p’t-ête cha quind j’in sauros pus. In attindint, te sais que, mi, j’sus toudis à l’acoute d’tout mais, com’ ti, chertain’mint, j’ai des canchons fétiches que j’ai querre à acouter d’timps in timps pach’qu’alles m’rappell’tent qué cosse ou quéqu’un. Pus général’mint, pach’qu’in a l’impréchion qu’alles ont été écrites pou ti…

Alors, quind j’ai lu ch’matin qu’min Nicolas i allot ête in visite à Vesoul, cha m’a auchitôt fait rigoler. J’imaginos bin l’schène aveuc Carlita et ch’ti-chi qui arprenot l’canchon d’Jacques Brel. Forchémint, i n’pourra pon canter qu’i n’veut pus vir Paris. Ch’est lal qu’alle est ch’baraque, même chi ch’est eune locachion pou chinq ins. Mais in artreuve bin ch’t’echprit d’el canchon quind in l’observ’te faire tous ches zigzags aveuc un discours chaque fos. « J’ai voulu voir ches profs, j’ai causé à ches profs. J’ai voulu voir Vesoul, j’ai causé à Vesoul. J’ai vu ches urgintistes, j’leu ai fait min discours. Rassuré l’étudiant aveuc un aute discours. Qué que sot che pays, leu sert min baratin. A côté d’mi Barrack i s’ra pus qu’un pantin. Com’ toudis… Mais mi, je te le dis, je n’irai pon pus loin. Mais je te préviens, je n’irai pon à Lille. D’ailleurs, j’ai horreur de ch’fromache qui pu’te. De toutes ches moules-frites. Et de cheule reine Titine… »
Mes gins, i faut bin que j’te l’avoue, j’n’em sus pon arrêtée lal. Pach’que min Nicolas i n’dot pon ête l’seu à avoir ch’canchon fétiche. Alors, chi in querque un peu, ch’est fachile d’savoir quo qu’ch’est qu’in peut leu attribuer. Par eximpe, Rachida et ches grosses baguousses : « Mi, j’dors aveuc, j’in rêfe toute l’nuit. Is sont ma Mecque et m’seu folie. Quind j’les ravise toutes ches fachettes, tallées in rosse ou in naviette. J’ai com’ un frisson dins min dios. Ch’est min point faibe, ch’est min credio. J’sus eune porteusse de diamints. J’in mets su mes dogts, ch’est charmint. J’sus eune porteusse de diams, j’sus eune porteusse de diams, j’sus eune porteusse de diamints ! »
Min Xavier Darcos, li, ch’est l’canchon d’Pierre Perret « ches infints, foutez-leu l’paix » : « L’étudiant quind i fait des ratures, ch’est qu’i faut réformer l’orthographe. L’étudiant qui met ches murs in peinture, ch’est qu’i faut interdire ches aérographes. L’étudiant qui fait grèfe à sin âche, ch’est pou foute l’brein dins m’programme. L’étudiant qui s’ra pon bin sache, méfie-te d’euch artour d’flammes. Etudiants foutez-me la paix. Ch’est pon fachile d’ête un ministe à timps complet. Etudiants, mi j’ai querre à ti’z’aute. A’ch’t’heure, j’alleume ch’loupiote. In fait eune pausse,  j’me sins tout in compote… »
Du côté de Ségo, ch’est Marie-Paule Belle : « Lorch’que je sus arrifée dins cheule capitale, j’auros voulu devenir eune femme fatale. Mais j’avos un mari qui étot un boulet, pas d’agint pou faire eune carrière. Gramint trop de handicaps, ch’est galère. Je ne sus pon checrétaire. Qué misère, qué misère ! Pourtint j’ai brassé du vint, oui vraimint, oui vraimint ! J’ai fait des bizarreries, des ân’ries, des ân’ries. Tout cha à cosse d’une ch’timie, qui va finir in momie ! Je ne sus pon Présidinte, l’aute ch’in vinte, l’aute ch’in vinte ! Je ne sus pon Dalida, pou faire l’schène à l’Olympia. Mais je serai Présidinte ! Je m’in vinte, je m’in vinte ! Je me prinds pou eune vintousse, et m’accroche à deusse mille dousse, à deusse mille dousse. »
Et dins ch’Nord, mes gins, quo qu’i y a ? Titine, ch’est sûr’te, qui cante du Bachelet : « Grâche à ches éléphints, j’ai combiné un plin, pou éliminer l’concurrint. Faire taire cheule grinte maguette, qui ch’prind pou Mistinguett, Ch’Zénith, cha n’est pon eune starlette. Bertrand évidemmint, j’li fais du rinte-dedins, pou qu’i arjoign’te infin min ring. Et pis, che tiot Benoît à qui j’fais ma grosse voix, et qui à’ch’t’heure m’minge dins ches doigts… Dins ch’Nord, j’avos eune mairie. Ch’étot pon assez pou mi. Ete l’chef de tout min parti. Ch’étot min pus bieau défi. »
A’ch’t’heure, Jacques l’artraité qui pourrot chertain’mint canter Fernand Sardou : « Bernadette est cor’ aveuc ches pièches jaunes. Levée d’pis ch’t’aurore, alle fait pou ches jonnes. Devint cheule tévé, mi j’sus débordé. J’devros bin l’aider, j’sus pon déchidé… A’ch’t’heure j’sus in r’traite, et incor’ demain. Mi, toutes ches corvées, cha m’donn’te mal à l’tiête. J’iro bin l’aider, tin : après-demain. Et même chi j’oublie de mette un pinse-biête. Cha s’ra l’grind Douillet qui ch’y coll’ra bin. I est in pleine forme, ch’est un vrai  athlète. Cha n’est pon que je sos fainéint, impoté, mais j’fais quo que j’veux pis que j’sus artraité. »

Mes gins, in vient d’faire un Top Chinq ! J’supposse que, ti auchi, t’as eune canchon qui t’coll’te à l’pieau. Alors te n’hésites pon à me l’dir’te dins ches commintaires ou par mail, chi te préfèr’tes. Alors, j’sus sûr’te qu’in pourra monter jusqu’à disse dins un prochain épisode. Mais, à’ch’t’heure, j’vais m’arrêter lal. Pach’que, même chi cha t’a fait rir’te un cop et oublier toute cheule misère et ch’brein dins lesquels in est. Cha n’est pon eune tâche fachile d’faire ches parodies : « J’m’appell’te Marie, j’ai trinte-siche ins et j’sus ch’timie. Dur’te, dur’te d’ête eune ch’timie. Dur’te, dur’te d’ête eune ch’timie. J’fais comique, pou t’faire rir’te, et bin rigoler. Oh là là Marie… Oh là là Marie… »