Chalut mes gins ! Quo qui ch’pache dins ch’monte in ch’début d’année ? Alors, bin sûr’te, in pourrot parler d’ches trucs qui énerv’tent com’ ch’conflit dins l’binde d’Gaza. In pourrot auchi parler de ch’prix du pétrole qui argrimpe auchi vit’ qu’el timpérature. Mais, tout cha, in l’sait d’jà et ch’est pon cha qui va amorcher l’début d’un sourir’te su t’guiffe ! Alors, pou mette tin moral à zéro, te n’as qu’à raviser cheule tévé. Mi, à’ch’t’heure, j’vais t’parler de ch’t’av’nir… 

Nin, mes gins ! J’n m’sus pon découverte eune âme d’voyante esstralucite. Te sais, car j’in ai d’jà parlé, qu’j’ai querre à toute cheule technologie. J’sus fan d’gadgets et j’n’pouvos pon faire aut’mint que d’te parler du CES. Ch’est pon l’école, bin intindu, mais ch’salon de ch’t’électronique grind public à Las Vegas. Alors, ch’grind public, ch’est nou’z’autes et in no promet eune véritape révoluchion. Te m’diras, ch’est chouvint ch’cas ! In ch’doute bin qu’in n’va pon arv’nir in arrière. Qu’in n’va pon arfaire ches téléphones à cadran qui étotent auchi gros qu’eune caf’tière ! Ou alors, ch’est juss’mint pach’qu’in t’proposse l’nouvieau modèle d’caf’tière qui fait téléphone. In passint un cop d’fil, te t’prinds un cop d’jus ! Ti, j’te vos arrifer aveuc tes gros sabiots. Te préfér’os pus eune pompe à bière qui fait téléphone. Bin, i t’faudra attente cor’ un peu, cha peut v’nir pou 2010 !
Dins tout ch’bazar technologique, ch’est gramint diffichile d’savoir d’quo parler sins in faire un roman. Cha s’rot même plutôt eune encyclopédie in plusieurs volumes. Alors, j’ai chosi quéques nouvieautés qui ont art’nu min attinchion. In premier, ches écrins plats qui sont cor’ pus plats. Ches fabricints is veul’tent arrifer à eune feulle d’papier, pach’qu’is ont prévu auchi qu’is d’vienn’tent souples ! Com’ cha, te peux l’rouler et l’trinsporter fachil’mint. Bion, com’ ches talles alles d’vienn’tent pus grintes cor’, mi, j’vos eune applicachion. In vindra ch’t’écrin au mète, com’ ch’tissu. Te pourras t’in chervir in nappe su t’tape. Cha s’ra génial’te quind t’as des invités. Te présintes eune bielle tape, bin décorée aveuc des plats qui fon’tent invie. Eune vraie tape d’fiête virtuelle car, in fait, t’as prévu des pizzas. Bin, quo ? Ch’est pon pach’qu’i y a d’el technologie à t’tape que te sais cuissiner pou autint !
Enchuite, mes gins, in t’proposse tout un tas d’accéchoires intelligints. Te n’auras pus b’soin d’savoir commint qu’cha ch’brinche car cha va détecter tout et ch’auto inchtaller. Ch’est à dir’te, ch’est l’inverche d’à’ch’t’heure d’ù qu’ch’est ti qui dos ête gramint intelligint. Lal, même chi te n’as pon l’gasse à tous ches étaches, te sauras t’in chervir. Ch’est ch’qu’in appell’te l’technologie à l’portée d’tertous ! Bion, ch’est vrai auchi qu’i y a chertains trucs que t’acates d’ù qu’te t’d’mindes par quel biout l’printe. T’in viens même parfos à t’posser eune question existinchielle : Est-ech que ch’ti qui l’a fabriqué i a d’jà essayé de ch’chervir d’sin bazar d’brein ? Ch’est pou cha, d’ailleurs, qu’in a invinté ches notiches. Quoque ch’t’eximpe i n’sot pon bion. Ch’est chouvint que, lorch’que te lis ch’notiche, te comprinds cor’ moins quo qu’i faut faire ! Ch’est normal auchi. Ch’est à cosse d’ches erreurs d’traduchion…
Ch’est écrit in chinois, pis traduit in inglais, pou ête adapté in français. Cha, ch’est l’verchion courte, mes gins, pach’que te peux fachil’mint imaginer qu’cha a été invinté par un japonais. Qu’ches Chinois is ont chous-traité in Inde et qu’ch’est lal qu’in a comminché à rédiger cheule notiche in inglais ! Ch’est ainchi qu’dins l’première verchion, in comminche aveuc : Brinche tin manicraque informatique su eune prisse aveuc terre. Pou finir, dins l’verchion françèsse, par : Interre tin manicraque informatique. Ch’ti qui a l’malheur d’lir’te ch’notiche, i comminche à querquer dins l’imballache d’ù qu’is ont bin pu mette l’pelle pou faire un trou pou interrer sin bazar !
Aute grinte nouvieauté : Ches montes ! Avint, eune monte alle donnot l’heure. Ch’étot d’jà pon chi mau, puich’qu’in l’a invinté pou cha. Mais, progrès obliche, in n’va pon s’arrêter lal ! Auchi, in t’proposse des montes aveuc un GPS eud’dins. Ch’est à destinachion d’ches infints, dins un premier timps. Com’ cha, te peux savoir d’ù qu’is sont à tout momint et ch’is n’ont pon paché ch’journée à faire queuette. In peut invisager cha auchi pou ches gins frivol’tes. A leu inchu, bin intindu. T’offres eune monte in cadieau, mais ch’est pou savoir quo qu’i fait d’ches journées, t’conjoint et d’ù qu’i va. Mi, j’vos quéqu’un qui n’in a pon b’soin, ch’est min Nicolas. Ch’est vrai, quo ! Carla alle sait toudis d’ù qu’i est. Sot, pach’qu’alle est aveuc li. Sot, pach’qu’i est d’vint ches journalistes. Alle n’a qu’à alleumer ch’tévé pou l’vir. Ch’est cor’ pus pratique ! Pis, i faut dir’te auchi que ch’GPS intégré i a intérêt à ête vraimint rapite. Pach’qu’à l’allure d’ù qu’i gesticul’te dins tous ches sins et qu’i voyache partout, ch’est un super calculateur qui li faut !
Deussième catégorie d’monte : ches montes téléphone. Ch’in est fini de ch’téléphone qui déform’te t’poque ou de ch’ti qui sonn’te au fond d’tin sac, et qu’t’as du mau à artreuver avint qu’i pach’te su messag’rie. Lal, ch’est cool, i est à tin poignet. Com’ t’in as qu’deusse, cha n’d’vrot pon ête trop dur’te à treuver. Forcémint, in va t’vinte cha aveuc eune orellette bluetooth. Qui, puich’que te n’es pon trop mauviais in inglais, veut dir’te dint bleue. Ch’est un fan d’ches Schtroumfs qui a invinté ch’nom ! Parinthèsse :Ch’est p’t-ête bin ch’tii auchi qui est à l’origine de t’notiche : Te brinches l’schtroumf dins l’schtroumf murale. Pis t’appuies su ch’schtroumf rouche. Lal, cha dot schtroumfer. Chi cha n’schtroumfe pon, ravise chapitre disse ; in cas d’schtroumfs… Bref, pou arv’nir à ch’t’orellette, ches fabricints is ch’sont dit qu’cha s’rot pus pratique que d’parler à sin poigné. Chinon, in n’va pus arconnaître ches gartes de ch’corps, com’ dins ches films américains ! Pis, is aurotent donné raison à Michael Youn qui parl’te à ch’main…
Alors, commint qu’cha va ch’pacher quind te croisses quéqu’un aveuc eune monte com’ cheule-lal et qu’ti, te veux savoir quelle heure i est ? Te vos, eune chituation toute bête, quo ! Mi, j’sus cheule qui veut savoir et l’aute, ch’ti qui a l’nouvielle technologie : Pardon ti’z’aute, te pourros m’donner ch’t’heure, ch’te plait ? Quo qu’te pinses qu’i va ch’pacher ? Ch’ti qui a l’monte i composse un numéro d’téléphone et i dit : « Allô, chérie(e) ! D’ù qu’t’es ? » Ch’est l’point commin aveuc à’ch’t’heure. In veut toudis savoir, in premier, d’ù qu’i ch’treuve l’perchonne qu’in appell’te… Mi, j’supposse qu’i a eune réponche qui li arrife dins ch’n’orellette pach’qu’i ajoute : « Bion, te peux m’dir’te quelle heure i est su ch’four à micro-ontes ? Ch’est pou Marie Toutoule, alle voudrot la connaîte !

Mes gins, i faudra chertain’mint prévoir eune minute d’décalache pou avoir ch’t’heure exacte. D’ù ch’t’intérêt, pus qu’jamais d’savoir d’ù qu’i ch’treuve l’correspondint. D’autint chi l’perchonne appelée alle est à sin boulot. Cor’ pir’te, dins ch’t’administration ! Vas-t-in savoir d’combien is ont avinché ch’pindule pou finir pus vit’ ! I n’y a pon à dir’te, ch’est vraimint bieau toute cheule nouvielle technologie. Cha va faire mau et ch’est vraimint aïe tech…