Chalut mes gins ! Vingt dius ! In ch’gèl’te toudis autint. Alors, partint su min principe que chi in rit, in ch’arcauffe, j’ai lu ches infos. Graf’ erreur que j’ai faite lal, j’ai cor’ pus frod ! Pourtint, chertaines alles sont dines d’ches meilleux comédies. L’seu différinche, aveuc ch’cinéma, ch’est qu’lal, te pay’tes égal’mint t’plache, pach’que ch’est chouvint qu’in annonche qué cosse d’pus à payer. Pis, te ris jaune, pach’que ch’est ti l’dindon d’el farche ! Infin, te quées auchi su des trucs qui n’te coûtent rin ! Ch’est d’jà pon chi mau…

Quind j’dis qu’cha n’coûte rin, j’n’sais pon vraimint. Pach’que, lorch’qu’un ministre i fait des cadieaux, in peut honnêt’mint ch’deminder : Ch’est qui qui pay’te ? J’veux parler d’el première mère célibataire d’France. Déroul’te ch’tapis rouche, in acceulle Rachida chous tes applaudiss’mints. Quo ? Nin, j’n’sus pon moqueux d’gins pus que ti, mais te m’avoueras qu’in in fait vraimint tout un plat. Com’ ch’vente i l’est ardev’nu auchitôt, d’ailleurs ! In est très contint pou alle, ch’est sûr’te. Mais cha n’est quind même pon un exploit à’ch’t’heure ! Ch’qui tiendrot pus d’l’exploit, ch’est qu’après tout ch’déferl’mint médiatique, pou savoir qui a mis ch’tiote graine, in n’sache toudis pon sin nom ! S’cret définse ! Pis, in est sûr’te qu’alle n’aura pon d’problème d’fin d’mos, alle, pou él’ver ch’file toute seu !
Bref, dins un élin d’générosité, alle a fait invoyer, à disse-neuf mères célibataires imprisonnées, eune p’luche. Pus exact’mint, un lapin ! D’jà, i faudrot qu’in m’explique commint in a chosi ches femmes plutôt qu’d’autes. Cha m’étonn’rot gramint qu’i n’y ait que disse-neuf femmes dins ch’cas-lal ! A moins qu’in ait organissé un tirache au sort dins ches prisons. Nin ! J’pinse qu’in a plutôt organissé un jeu com’ à ch’fort Boyard. Is avotent d’jà ches chellules, i n’y avot pus qu’à invinter ches épreufes ! Pis, cha n’est pon dur’te d’imaginer chertaines. L’grind concours d’crêpache d’chignons. Cheule qui va dérouler l’maximum d’roulieaux d’PQ in un timps donné. Cheule qui va réussir l’pus vit’ à croch’ter eune serrure. Et même, l’pus grinte tresseusse d’corde aveuc des draps !
Tout cha m’laiche perplexe et interrogative su un aute chox. Ti auchi, te t’posses l’même question qu’mi ? Pouquo un lapin ? Tertous i pinse in premier à un nounours. A Sophie, l’girafe qui fait pouêt-pouêt. Alors, ch’i y avot un messache subliminal dins ch’t’acte ? Un lapin, cha fait p’t’ête allusion à ch’ti qui l’a misse dins ch’t’état-lal. Un rapite qui est parti com’ un voleur et dont in querque toudis après. Pou n’pon dir’te qu’i a détalé com’ un lapin… Ch’est eune soluchion possipe, mes gins. Mais un lapin, cha minge des carottes. Est-ech que l’miot « carotter » i n’aurot pon invahi sin chubconschient ? Un messache à min Nicolas : « N’essay’te pon d’em carotter m’plache d’ministre pindint que j’pouponn’te ! » Ch’qui expliqu’rot, du même cop, qu’alle sot arv’nue à ch’traval auchitôt…
Infin, Rachida, com’ t’es dins t’périote d’bionté, te d’vros invoyer un cadieau à eune aute perchonne. I vient cor’ d’artreuver ch’chellule. Marie Toutoule alle te d’minde cha com’ un grind chervice. Bion, li, ch’est un cas particulier. Com’ l’bion client d’un hôtel à qui in réserv’te toudis l’même champe ! D’ailleurs, in a même chupprimé l’numéro à l’porte pou mette direct’mint sin nom. Pis, à ch’t’allure d’ù qu’i arvient, ch’est tout juss’ chi ches femmes d’ménaches alles ont eu l’timps d’chinger ches draps et d’pacher ch’t’aspirateur ! Alors, Rachida fait un bion geste et acate-li eune 406 Majorette. Cha li armémor’ra ch’timps d’ù qu’i f’sot rir’te in f’sint ch’fou, dins ches rues d’Marseille, aveuc sin taxi. Pach’qu’in n’peut pon dir’te que, dins l’vraie vie, i fache gramint rir’te Samy Naceri. I est à peine arsorti d’prison, toudis in condichionnelle, qu’i vient cor’ de ch’faire arrêter. Cheule fos-chi, pach’qu’i a agréché quéqu’un au coutieau !

Mes gins, i y a qué cosse qu’je n’comprinds pon ! Pus cha va, pir’te cha d’vient aveuc li. In inferm’te des gins pou des trucs minimes et li, i rinte, i sor’te. In peut même che d’minder chi in n’li a pon donné eune clé ! I va falloir invinter un miot pou dir’te pus que multirécidiviste. Samy n’assez ri, pourtint ches plaisint’ries ches pus courtes sont ches meilleux ! Quo qu’i ch’pache aveuc li ? Ch’est eune vedette alors i n’a pon l’drot à ch’même régime qu’el commin d’ches mortels ? I a des dossiers aveuc des s’crets su des pipoles ou des politiques ? Rachida, puisque t’es l’garde d’ches sceaux, j’auros querre à ch’que te sos auchi l’garde de ch’sot et qu’te ferm’tes bin ch’porte in muchint l’clé. Pach’que l’prochaine étape, ch’i arsort, cha pourrot bin finir par un mort plutôt qu’trinte points d’suture…