Chalut mes gins ! J’viens d’inl’ver mes moufles pou pouvoir tapoter su m’planque à boutons. J’avos bin essayé d’les garder, mais j’n’arrivos pon à arlire quo qu’j’étos in train d’écrir’te ! Cha caillote cor’ gramint à’ch’t’heure, mais cha n’est pon eune journée com’ eune aute. In pus de ch’timpérature qui est quée, ch’est auchi l’grind jour d’ches prix qui deschintent pus vit’ que ch’mercure. Alors, in est prêt tertous ? Ch’est l’cop d’invoi d’ches soltes et l’echpoir d’faire des bionnes affaires…

In est tertous parels. Infin, nin ! Mi, j’diros qu’i existe plusieurs catégories d’acateux d’soltes. L’première, ch’est quind te veux vraimint faire des économies et qu’te n’as rin acaté avint, ou très peu, pou pouvoir dépincher l’minimum in t’faisint un maximum plaiji. L’deussième, ch’est à peu près parel, sauf que ch’est par nécéchité à cosse de ch’pouvoère d’achat qui est auchi bas qu’ches degrés et pon vraimint pou ch’plaiji. Pis, t’in as eune, qu’in pourrot prech’que, par ches timps qui cour’tent, conchidérer com’ héritiers fortunés ou privilégiés.
Messache perchonnel :  Avis à ches hommes qui m’lis’tent. Chi t’es l’un ou l’aute, les deusses à l’fos et qu’t’as cor’ gramint d’timps à tin horloche biologique, te peux m’invoyer tes coordonnées. J’étudie toutes ches cindidatures pou treuver min Prince Charmant. J’fais ch’castinge dins très peu d’timps. Te m’invoies t’photo quind même. Ch’est pon pach’qu’in est in périote d’soltes et qu’in est supposé treuver des fins d’série ou des produits aveuc un imballache défraîchi, que j’n’ai pon querre à savoir à quo qu’t’arsimpes ! Com’ i dit min camarate Pat’Bol dins eune d’ches canchons : Même chi t’es blonde, y a pon d’problèmes. Infin, blond, dins min cas, of soltes. Pardon, mes gins, of course ! Fin d’messache.
Donc, ch’ti-lal, même ch’i n’a pon vraimint b’soin d’un n’sait quo, i va aller raviser d’pus prêt dins ches magasins. Histoire d’treuver cheule mervelle indispinsape à ch’vie ! Ch’est com’ cha, ches mervelles. Tint qu’te n’les as pon, alles n’sont pon indispinsapes. Te n’sais même pon qu’alles existent. Pis, quind t’in vos eune, alle le d’vient ! In appell’te cheule catégorie d’gins : Acateux compulsifs.
Cha veut bin dir’te ch’que cha veut dir’te. In va faire insimpe un peu l’étymologie d’ech miot. Pulsif, cha veux dir’te que ch’est chous l’effet d’eune pulsion. De ch’style, te paches dins un rayon. Te n’fais pon vraimint attintion, te chuis l’flot d’clients. Lal, waouh ! Ch’est tout juss’ chi ch’produit, cheule mervelle, alle n’te chaute pon à ch’cou in disint : «  Acate-me ! Acate-me ! » Te n’peux pon laicher l’indifférinche t’invahir. Ravise-le cor’ un cop ! I n’attind qu’ti ! Alors, tel un bion Saint-bernard, te vas l’chauver d’el mort des invindus. Te sors tin tonnieau, chi t’es vraimint fortuné, mais pus général’mint, tin porte-monnaie, pou dispincher l’liquide sauveur ! Bion, in va dir’te qu’cha march’te auchi aveuc l’CB et même aveuc ches chèques…
A’ch’t’heure, t’as pus qu’à l’réconforter in l’mettint chous tin bras jusqu’à l’caiche. Pis, ch’t’aute partie de ch’miot, ch’est com. Ch’est pach’que d’vint un « p », ch’t’ « n » i prind eune gambe in pus. Chinon in aurot écrit con ! Tiens, i faut que j’te donn’te un truc captaintechnique pou cha. Pardon, me v’là partie à faire des jux d’miots qu’perchonne i n’va comprinte. I, va cor’ m’invoyer plein d’maiyes pou m’deminder quo qu’j’ai voulu dir’te. Alors : captain égal Némo, cha donn’te némotechnique et donc mnémotechnique ! Bion, à’ch’t’heure, i faut que j’te l’donn’te min truc pou artenir ch’règle d’vint un « p » :  Un pet i sort intre deusse gambes et ch’est ainchi qu’in rajoute un baton à ch’mitan ! Ch’est du bonus, mes gins ! Ch’est m’journée d’soltes auchi, t’in as deusse pou l’prix d’un !
In arvient à ch’con à tros gambes... Allez, in l’fait ? Ch’est un con pétant ! J’n’ai pon b’soin de t’faire un déchin. In peut dir’te, sins trop ch’tromper, que ch’est l’acateux qui est con. In pus, ch’qui est con dins ch’t’histoire ch’est, qu’après avoir acaté ch’truc chous l’effet d’eune pulsion, quind i arrife à ch’baraque, i n’sait pon quo qu’i va n’in faire ! Mais ch’est rin. I est gramint fier d’el montrer à tertous in disint qu’i a fait l’affaire de ch’chiècle ! Pis, après ches soltes, t’as ch’braderie d’ù qu’te peux treuver un aute acateux compulsif. In appell’te cha l’arcyclache !

Mes gins, i n’em ress’ pus qu’à t’chouhaiter d’bionnes soltes ! J’n’sais pon dins quelle catégorie te vas t’chituer, mais j’sus sûr’te, malheureuss’mint, qu’in s’ra gramint pus, cheule année, à ête dins cheule du nécéchaire qu’dins cheule du superflu…