Chalut mes gins ! Quo qui peut bin ch’passer dins un cervieau ? Ch’est bin chouvint eune question que j’em sus possée ! Ch’est vrai, quo ! Cha n’t’est jamais arrifé d’rêfer d’trucs pon possipes et d’t’in souv’nir à ch’rével. L’première cosse qu’te t’dis alors ch’est : Commint qu’in peut pinser à des machins parels ? Alors, ch’est vrai auchi que l’chubconschient i additionn’te des tiots détals qui n’ont pon vraiment d’importinche séparémint, mais qui, mis en combinaisson intre eux, donn’tent un scénario dine d’ches films fantastiques ou burlesques…

Mes gins, j’cros bin qu’j’ai été victime d’ech phénomène cheule nuit ! Vingt dius ! I y a eu un d’ches ramdams dins m’boîte à neurones. Cha a cauffé dur’te pou min matricule ! In plinte ch’décor d’abord. Te sais que ch’Epiphanie, qui est tradichionnell’mint l’chisse jinvier, in la fiête l’diminche l’pus près. Sot avint, sot après. Donc, ch’étot ch’diminche. T’as ch’premier détal d’min rêfe, ch’galette des Ros. Inchuite, te mélinches, infin, dins min rêfe, aveuc ches vœux présidinchiels. Te chaupoutes aveuc eune pointe d’politiques et v’là mi’z’aute à ch’mitant d’un grind n’importé quo !
Cha ch’passot dins l’grinte salle d’récheption à ch’t’Elysée. Tertous is étotent lal pou ches vœux présidinchiels. In apporte eune imminche galette des Ros, mais in n’met jamais d’fèfe d’dins. Nin ! Ch’présidint i n’aurot qu’à querre d’chus… In n’peut pon faire Ro un Présidint. Cha n’el f’rot nin ! P’t’ête ch’i s’agissot d’Ségo, bin qu’alle eut été d’jà Royale !  Toudis i est qu’un tiot malin d’pâtichier, qui avot aidé à confectionner ch’modèle géint, i n’a rin treuvé d’miux que d’mette eune fèfe d’dins. Pou faire eune blaque. A forche d’intinte que min Nicolas i s’comportot chouvint com’ un Ro, cha a dû li donner l’idée. Mais, te parl’tes d’eune blaque, ti’z’aute, ch’est mi qui f’sos l’fèfe ! I m’avot kidnappé, indormi et mis su ch’crème fringipane in guisse d’mat’las !
L’fait d’intinte ches applaudiss’mints, quind ches pâtichiers is ont dû posser l’galette su eune grinte tape, cha a dû m’sortir de ch’sommel. J’sintos com’ un pods su mi. Après cop, j’sais, à’ch’t’heure, que ch’étot l’pâte feulletée qui m’chervot d’couvrante. Alors, ni eune, ni deusse, j’invoyos valcher ch’drap d’un cop chec pard’chus mi. Pis, d’un biond, m’v’là assisse. Ouais, j’étos assisse, mes gins. Ch’est sûr’te ! Mais j’comprenos auchi, in même timps, que je n’étos pon dins min lit ! Pis, i y avot gramint d’chpectateurs. Is étotent tertous l’bouque grinte ouverte et avotent ches zis exorbités in train d’em raviser. J’auros été eune esstra-terrestre, cha n’aurot pon été pir’te. Te m’diras, mes gins, cheule galette alle étot ronte com’ eune choucoupe ! J’auros été à leu plache, j’cros que j’n’auros pon été miux !
Dins ches cas-lal, te n’as pon l’timps d’réfléchir gramint. Nin ! Te t’sins babache et te pinses à chauver ches apparinches. J’n’iros pon jusqu’à dir’te que j’étos dins l’brein. Nin ! J’étos dins l’fringipane et ch’étot gramint pus agréape. J’n’sais pon quo qui m’a pris, mais l’première cosse qui m’est v’nue in tiête ch’est d’faire ches présintachions : « Chalut, mes gins ! Ch’est mi, Marie Toutoule ! », que j’dis in m’arlevint aveuc gramint d’difficultés. Cha glissot pon mau, ch’étot du pur bieurre, cheule crème ! J’avos l’impréchion d’ête eune patineusse qui avot loupé sin doupe salto et qui essayot d’garder l’sourire tout in pouchant su ches gambes, pou artreuver eune position pus dine. Mais m’phrasse alle avot eu un effet bœuf sins l’vouloir. Ch’étot l’panique à ch’t’Elysée. Cha courot dins tous ches sins in criant…
Quo qu’j’avos dit chi esstraordinaire ? J’em mis à acouter ches cris d’désespoir’te : « Au s’cours ! Ches ch’tis is no invahiss’tent cor’ com’ in 2008 ! » disotent ches uns. « Même ches fèfes alles sont ch’ties ! » hurlotent ches autes. « Qu’in appell’te vit’ James Cameron pou qu’i fache un Titanic deusse ! » vochiférotent cor’ d’autes. « James Cameron, quel biel homme ! » Inutile de t’dir’te qui ch’est qui a dit cha mes gins ! « Ch’est un cop d’Titine d’Lille ! Alle veut t’plache ! » criot un ministre à l’intinchion d’min Nicolas. « Nin ! Ch’est Ségo qui veut mette cha su l’dios d’Titine ! » rétorquot un aute. « A’ch’t’heure qu’alle a l’goût d’el misse in schène et du chpectaque ! » qu’i ch’impréchot d’ajouter. « Nin ! J’la connos bin ! » qu’i inchérissot Beekay. Oups ! J’ai fait un inglichisme, mes gins. J’voulos écrir’te BK com’ Bernard Kouchner. Bin, ch’est pus vraimint un biquet. Infin, i continuot ch’phrasse in disint : « Ségo alle aurot fait eune galette aux peummes aveuc eune compote d’Royale-Gala ! » T’es gintil min Bernard, mais Marie toutoule alle préfèr’te attérrir dins l’fringipane que d’querre dins ches peummes ! « Chinq conchonnes et huit voïlles, ch’est l’nom et l’prénom d’cheule ch’tie ! » comminchot à chuchurrer Carla. « Mon chéri, ch’est l’vilaine ch’tie qui s’est d’jà moquée d’mi in racontint des cacoulles » qu’alle ajoutot.
Note de mi qui t’écris et pindint que j’deschinds d’em galette royale pou artreuver ch’plinquer des vaques  : Mon chéri, cha n’a rin à vir aveuc ches origines italiennes communes d’el Première Dame et d’el bouchée du même nom. A’ch’t’heure, Ferrero i peut m’invoyer un chèque pou avoir fait d’el pub ! Ichi, ch’est l’cherviche privé, sauf ch’ti de rir’te, et j’ai cor’ l’drot d’faire d’el pub !
Pindint tout ch’capharnaüm et toutes ches déclarachions dins tous ches sins et n’importé commint. (Tiens, v’là qu’em fiction alle arjoint l’réalité politique…) Seu min Nicolas i étot ress’té stoïque. Infin, sauf ches bras qui barloquotent à tout va, com’ d’habitute. « Chers amis ! » qu’i disot d’un ton très présidinchiel du haut d’ches deusse mètes disse. Ouais, mes gins, te n’es pon in train d’halluciner. I n’étot pon cor’ dev’nu eune Barack ! J’avos juss’ oublié de t’dir’te qu’i étot grimpé su eune caïelle pou ch’faire intinte. « Laichez-me faire ! » qu’i inchaînot. «  I n’y a pon à avoir peur d’ches ch’tis ! J’ai d’jà arçu leu Ro, i y a quéque timps. Ch’est dev’nu un super pote, même qu’in ch’est raviser un film insimpe ! Bion, seu méfianche invers eux : Chi un ch’ti i t’donn’te eune tartine d’fromache, cha pu’te gramint ! Mi, j’ai goûté et j’n’ai pon réussi à faire eune baisse à Carlita pindint des jours ! Alle disot toudis qu’em bouque alle avot un drôl’te d’sintimint. »
Pis, in m’ravisint, i dit : « Alors com’ cha, ch’est ti l’ch’tie qui raconte toutes ches bêtisses su Internet et qui fait rir’te tous ches gins ? Faut qu’te vienn’tes travaller aveuc mi. J’vais t’donner l’poste d’secrétaire d’Etat anti-morosité. Aveuc ch’crisse, qui va perdurer cor’ un bion momint, t’as du pain su l’plinque, Marie ! » Mes gins, j’n’sais pon quo qui m’a pris à ch’momint-lal. Toudis i est que j’n’ai rin treuvé d’miux à faire qu’el révérinche com’ chi j’étos d’vint un Ro. Ouais, mais j’avos oublié qu’j’glissos d’partout à cosse du bieurre de ch’fringipane. Vlan, cha n’a pon loupé. J’sus quée par tierre !

Mes gins, v’là commint qu’in arsort d’un rêfe in trombe ! L’fait d’ête quée, cha m’a réveillé pou d’bon. J’m’artreuvos assisse, mais su min lit cheule fos ! Te cros qu’min rêfe i a eune significachion, ti ? Quind te sais qu’Epiphanie cha vient du grec et qu’cha veut dir’te apparichion ! I y a quind même eune drôl’te d’coïncidinche. J’apparos d’vint min Nicolas com’ cha. Infin, in fèfe et pon in Efe, j’avos mes fouffes ! Cha auchi, i parot qu’cha porte bionheur quind in a l’fèfe. Mi, un porte-bionheur ? Mes gins, j’sus sûr’te que te vas raviser t’galette aveuc des zis tout neufs. Mais i n’faut pon rêfer. I n’est pon sûr’te que j’sortirai d’lal d’vint ti ! Toutefos, chi min avinture alle t’a apporté un peu bionheur et gramint d’sourires, ch’est p’t’ête bin l’effet fèfe ! Mais ne compte pon su mi pou t’apporter d’el galette. J’sus com’ ti, ch’est l’crisse, j’in ai pus ! Ch’est Freudien tout cha, i faut qu’j’in parl’te à Sigmund !