Chalut mes gins ! Cha y est, me v’là d’artour et in 2009 ! In est bin obligé d’conch’tater qu’cha n’ching’te pon grind cosse, mis à part quind t’écris ch’date. In a fini l’année dernière aveuc ch’t’echtomac un peu in vrac et in arcomminche cheule-chi parel ! In pus, in caill’te toudis autint. Cha s’rot très mau v’nu d’parler d’arcauff’mint climatique in ch’momint ! 

Bion, ch’est vrai que ch’frod i ch’prolonche et qu’in a gramint d’mau à cauffer ches baraques. Pis, com’ bionne nouvielle, in t’annonche que ch’prix du gasse i n’va pon augminter. Mais i n’va pon baicher, nin pus, alors que ch’pétrole i ch’est cassé l’guiffe ! In n’est sûr’te que chertains is von’tent ch’constituer un bieau tiot pactole et qu’pou eux, ch’est eune bionne année qui comminche. Déchidémint, 2009, ch’est vraimint l’continuité, in ch’fout toudis d’ches gins d’el même fachon !
T’as auchi ches tiots malins qui n’ont rin treuvé d’miux que d’mette ch’fu à ches carettes. Commint in peut pinser eune s’conde que ch’est cha qui va faire armonter ch’thermomète ! Vraimint, is n’ont rin dins l’crâne cheuls-lal ! Pis, cha met dins l’brin gramint d’gins. Pach’que cha n’est pon leux carettes qu’is brûl’tent. Bin, nin, l’plupart is s’in foutent, is n’in ont pon ! Alors, quind min Nicolas 1^er i annonche qu’in va priver d’permis d’conduir’te tous cheuls qui von’tent ch’faire arrêter, cha partot p’t’ête d’un bion sintimint, mais j’ai bin peur qu’cha n’va chervir à rin ! Cha n’les impêqu’ra pon d’rouler sins permis. Ch’est d’jà l’grind chport nachional, d’pis qu’ches points is fond’tent com’ neiche à solel.
Quo qu’te cros qui va auchi ch’pacher chi ches assureurs is doiv’tent chortir gramint pus d’pépettes d’ches tiroirs-caiche ? Bin, cha s’ra répercuté su tertous ! D’autint qu’i va y avoir un surcoût aveuc ch’mauvais timps. I y aura d’jà bin assez aveuc ches carettes qui von’tent ch’printe pou ches artistes d’Holiday On Ice. Bion, mes gins, cha f’ra l’bionheur d’ches garagistes. Is n’von’tent pon trop d’voir ronger leux freins pou savoir ch’is pourront boucler leu fin d’mos. Is von’tent commincher ch’t’année su ches capieaux d’roues !
Mi, j’ai auchi eune pinsée pou ches gins qui vintent su ches marchés. Alors, j’sais bin qu’is n’sont pon ches seux à travaller dins des condichions extrêmes. In peut auchi avoir eune pinsée à ches metteux d’PV dins ches villes. Cha n’est pon drôl’te, mes gins. Vas-t-in rimplir un PV quind l’incre d’tin stylo alle est dur’te ! Bin, n’in profit’te pon pou t’croir’te à l’abri. Is doiv’tent ête équipés d’eune incre qui n’gèl’te pon. Eune incre aveuc du glycérol com’ ch’qu’in met dins ches liquites d’arfrodiss’mint d’ches carettes ! Ichi, in garintit ches PV jusqu’à eune température d’moins vingt d’grés ! J’arviens à ches vindeux d’marché. In particulier, ches vindeux d’fruits et légumes. In n’pourra pon, in ch’momint, les accusser d’publichité minsongère quind i s’ra écrit in grind « produits frais » ! In pourrot même dir’te que ches légumes et ches fruits is n’ont jamais été auchi frais. Cha s’rot même du surgelé. « T’arviens d’chez Picard, ma poulette (ou min loulou, mais ch’est in général ches femmes qui von’tent à ch’marché.) ! Nin, t’es vraimint babache ! Te vos bin que j’sus auchi cong’lé qu’ches légumes ! »

Tout cha, mes gins, pourrot ête drôl’te, ch’est vrai. Mais, j’n’peux pon m’impêquer d’avoir eune pinsée pou tous ches gins qui sont déhors et qui n’l’ont pon vraimint chosi. D’autint qu’in annonche cor’ un frod pus grind pou l’s’maine prochaine. Pis, l’neiche. Ch’qui veut dir’te qu’in pus, is von’tent d’voir combatte l’humidité. I n’y a rin d’pir’te, mes gins ! J’sais bin, qu’in est tertous dins ch’même batieau, in timps d’crisse. In n’a d’jà pon gramint d’pépettes, alors in ch’dit qu’in n’peut pon donner. Cha n’est pon forcémint des pièches d’monnaie qu’i faut donner. Nin ! In a tertous des fouffes qu’in n’veut pus mette. Des couvertures qui n’serv’tent à rin et qui dorm’tent dins l’fond d’un placard. Ch’est d’jà cha. Te peux faire plaiji sins qu’cha t’coûte un radis ! Pis, pou combatte l’frod, i faut auchi avoir un echtomac rimpli. Ch’corps i est bin fait. Quind i a gramint d’calories à brûler, i dégache d’el caleur ! Alors, un sandouiche, des tiots pains au chocolat, des gâtieaux, des sodas auchi. Infin, tout quo qui fait gagner tin tour d’talle in cintimètes. Lal, ch’est un régime qui pou eune fos te s’ra vraimint utile. Te s’ras bin dins tin corps et te t’sintiras miux dins t’tiête, pach’que t’auras fait eune bionne action. Pis, pou cheuls qui peuv’tent, te peux auchi oufrir t’porte ! A’ch’t’heure, in a 2009 fachons d’faire un geste et d’montrer que, même ch’i fait gramint frod déhors, in a toudis caud dins ches cœurs…