Chalut mes gins ! Cha y est ! In attaque ches dernières heures d’l’année. Com’ tous ches ins, ch’est l’périote d’ù qu’te t’posses l’question d’savoir ch’que te vas chinger aveuc ch’t’année qui vient. In est rimpli d’bionnes intinchions. Ch’est com’ chi in armettot ches compteurs à zéro quind is von’tent chonner ches dousse cops d’minuit. Mais, cha ress’ souvint que d’bielles promèches que te t’fais à ti-même et qu’t’as vit’ fait d’mette à ches oubliettes. Bin, j’te rassur’te, mes gins, in est tertous parels ! Pis, j’sus sûr’te que ches gins célèpes auchi. Alors, in va in vir quéque uns, insempe, pou savoir quo qui ont prévu…

In comminche par l’infint terripe d’el canchon inglaisse. Amy Winehouse alle a déchidé d’ne pus boir’te pus que d’raison. Ch’est churtout pou des raisons économiques, ch’est l’crisse. A’ch’t’heure, alle va ch’continter d’tros lites in tout su ch’journée. Sin album i li rapporte toudis des royalties mais alle picol’te pus vit’ qu’ches bénéfiches is n’rintent. Pis, com’ alle annul’te gramint d’concerts pach’qu’alle n’est pon in état de t’nir su ches gambes, cha li coûte bonbon in frais d’rupture d’contrat. In pus, com’ alle n’a toudis pon artreuvé l’clé qui oufre l’porte d’sin studio d’inregistr’mint, alle n’est pon prête d’armette un CD in route ! Alle a auchi déchidé de ch’pacher de chports d’hiver à cosse du prix exorbitint d’el poudreusse !
Chéline alle a déchidé d’baicher d’un ton quind alle fait ches vocalisses à ch’baraque. Sin René i in a marr’te d’ramacher tous ches morcieaux d’cristal et cha li coûte gramint quer. Chaque fos, quind i est in train d’siroter sin tiot whisky, v’là qu’el Diva, cha l’émoustille d’vir ch’tablieau et alle invoie un grind cop. Li, cha l’fait churchauter et i laiche querre sin verre. Bion, i ramache ches morcieaux auchitôt pou éviter ches accidints mais ch’est quind i arrife dins l’cuissine qu’cha ch’complique. I oublie toudis dins quel placard alle ch’treuve l’poubelle. Quind i a fini d’faire ches deusse chint chinquinte mètes carrés, i est trop fatigué pou ch’in archervir un aute !
Alain Delon i a déchidé de n’pus faire rir’te. Cha li a gramint coûté sin rôle d’César. Pourtint i étot bieau dins ch’tenue romaine. Mais v’là, in n’l’avot pon prév’nu d’ches sorties d’films qui allotent rintrer in concurrinche aveuc li. In li avot dit, cha s’ra l’début de t’nouvielle carrière. In va t’installer su ch’trône d’impereur à grinds cops d’effets chpéciaux. Pis, in t’donn’te eune réplique à l’hauteur d’tin talent. Te diras à tertous : Ave Mi ! Mais i n’avot pon prévu qu’el foule alle crierot pus : Avelo ! Et qu’ch’est un tiot facteur d’Bergues qui allot li voler l’vedette et arrêter sin char ! Mais ch’est nin grafe, Alain Delon est grind et li, ch’est un Ch’ti ! Alain Delon i a pus d’un tour dins sin chac ! I va arfaire un remèque d’Plein Solel. Cha va bin les immerder ches ch’tis, is von’tent in être jaloux !
Mylène Farmer alle a déchidé d’acater un tablieau lumineux pou mette su l’schène quind alle fait un conchert. Alle in a marr’te qu’in li dis’te qu’in n’comprend pon ches paroles quind alle s’égosille dins ch’micro in direct live de chez play-back. Ainchi, cha s’ra com’ qui dirot ches chous-tites. Par conte, alle va légèr’mint augminter ch’prix des plaches ! Aveuc chaque ticket, alle a prévu eune boîte d’mouchoirs in papier. Bin, d’jà qu’ch’est chouvint triss’ quind in n’comprenot  rin. Chi, in pus, te piges sin disch’cours, ch’est l’porte ouverte à ches grintes ieaux !
Julien Doré a déchidé qu’i dépach’rot toutes ches limites et qu’i n’arviendrot pon su ch’déchision de n’pon aller à ches Restos du Cœur ! Sin argumint i est simpe, in n’distribue pon toutes ches pilules d’couleurs qu’i a l’habitute d’printe in guisse d’plateau arpas. Pis, ch’est d’el piche d’âne qu’in y chert. Même chi dins ch’canchon i dit qu’i consomm’te l’pus pochipe d’liquide, i a quind même un standinge à rechpecter, à’ch’t’heure qu’ch’est eune vedette !
Cha va, mes gins, t’es toudis caud ? In va aller un cop du côté d’ches politiques. Eux auchi, is von’tent printe d’ches bionnes résoluchions pou 2009. Chertain’mint ches mêmes d’pis des années. Te n’as qu’à vir l’brein dins lequel in est… In comminche par min Nicolas 1^er qui a déchidé d’printe des cours d’maintien com’ ches mann’quins. Nin, cha n’est pon pach’qu’i a déchidé d’faire un défilé aveuc ch’femme dins ches couloirs d’l’Elysée. Ch’est pach’qu’in li arproche toudis d’gesticuler dins tous ches sins. Pis, i veut ête à l’imache d’sin héros américain. Ch’est sûr’te qu’i a gramint d’traval à faire pou ête eune « barack » li auchi. Pis, in hauteur, à moins de ch’faire greffer des gambes pus longues… Détals à part, ch’est tout sin portrait quind même ! Nin ? Te n’es pon d’accord aveuc mi, mes gins. Quo ? Ah ! Ch’est l’couleur qui n’est pon l’bionne, d’après ti. Mais pourtint Nicolas i a d’jà Bruni !
Te querques après Titine, mais d’ù qu’ch’est qu’alle est Titine ? Te ravises trop haut, com’ d’habitute ! Baiche ches zis et te la verras ! Titine d’Lille de Solferino del Paris alla a déchidé d’donner des cours d’rattrapache à tous ches mammouths et ches éléphints de ch’parti qu’alle a dû arsortir d’el naphtaline. Pou l’momint, ch’est eune joyeusse binde qui fait eune bielle cacophonie. Première lechon : Ch’est mi l’chef, qu’alle dira, et tertous i dot fermer ch’bouque quind j’l’oufre ! Deussième lechon, in est pus au timps de ch’grind Jacques, ches vieux. I faudra t’y faire. A’ch’t’heure, in est diriger par quéqu’un qui est toudis in train d’bouger dins tous ches sins. Alors, attinchion à ti. L’aute t’avos l’timps d’el vir pacher. Ch’ti-lal, te n’l’as pon cor’ vu arrifer qu’i est d’jà arparti par lal. Ch’est pir’te que ch’furet ! I faudra que tertous i sache utiliser un PDA pou ches rindez-vous aveuc mi. Finies ches vielles méthotes. A’ch’t’heure, in est dins eune nouvielle ère pou ch’parti. Nin, ches vieux ! J’ai dis un PDA, pon un PPDA ! Li, i est dins un placard à cosse d’Nicolas. Gaffe que j’ne fache pon l’même cosse aveuc l’premier qui m’suit nin !
Xavier Darcos i n’sait pon cor’ commint i va essayer d’révoluchionner l’inseign’mint. I avot bin pris eune résoluchion seul’mint i a été trop préché et cha a foutu l’brein chez ches lycéens ! Sin rêfe, ch’est que tous ches gamins is aient ch’bac. Alors i a déchidé d’mette dins toutes ches maternelles, ches collègues et ches lycées, un grind bac à sape ! Ch’est eune grinte déchision à laquelle ches préchédints ministres is n’avotent pon pinsé !
Allez, te croyos que j’allos oublier l’grinte prêtresse d’el Fra-ter-ni-té ! Nin, mes gins, alle arrife à’ch’t’heure. Cha s’ra l’ch’risse su tin gâtieau ! Ségo, ch’rebelle, alle n’a pon dit sin dernier mot. Ni à Jean-Pierre Foucault, ni à cheule Titine d’plein d’trucs. Alle a cor’ quéques amis à appeler pou organisser l’résistinche. Sin but, ch’est d’faire voter ch’public pou qu’alle sot à chinquinte/chinquinte aveuc ch’rivale dins ches sondaches. Chi sin plin i ch’déroul’te com’ prévu, alle n’aura pus qu’à switcher Titine et printe ch’plache. Pis, après, alle arf’ra ch’cop d’el meneusse d’arvue évangéliste pou prêquer ch’bionne parole. Com’ dins ches mèches télévisées, alle cant’ra ches nouvielles canchons d’sin album : « Ré-so-lu-chions 2009 ». Sin nouvieau singueule, l’premier ech’trait, ch’est eune arprisse d’eune canchon d’Claude François : « si j’avos un marteau, je tapero Titine, je tapero Nico, j’y mettros tout min cœur... J’m’install’te à l’Elysée pou in faire min foyer. Et j’y mettros min homme, mes goches, ches amis du PS. Oh, oh, cha serot le bionheur.» 

Ah, mes gins, ch’est pon tout cha, mais mi, j’ai un réveillon à préparer. Alors, in aura cor’ l’occasion in 2009 d’faire quéques vocalisses insimpe. Ch’est pus qu’eune résoluchion d’Marie Toutoule, ch’est eune promèche !
In attindint, i n’em ress’ pus qu’à t’chouhaiter un bion biout d’in, com’ is dosotent ches vieux. A n’pon confonte aveuc un bieau boudin, même ch’i y a fort à parier que ches blincs is s’ront à rindez-vous su t’tape d’réveillon ! Bisous tertous et Bionne Année !

Merci à Aa Philip pour son remix   

Music Playlist at MixPod.com