Chalut mes gins ! Bion, à’ch’t’heure qu’t’as eu l’timps d’digérer gramint pus, in peut arv’nir à ches sujets chérieux. Ouais, j’sais qu’in est diminche et que d’habitute, quind j’t’écris l’diminche, in n’ch’prind pon l’tiête. Chouvint, in ravise eune tiote phrase célèpe ou un n’sait quo fachile. Mais, ch’jour i est différint et j’n’vos pon d’raison pou n’pon parler d’eune cosse grave…

Mes gins, ch’est eune catastrophe, in les a d’jà abindonnés. Au biout d’vingt-quate heures, in n’in veut pus. Pourtint, ches gins is avotent pris de ch’timps pou chosir. Treuver l’ojieau rar’te qui étot chinsé t’faire gramint plaiji ! Alors, quind in t’l’a offert ch’soir de ch’réveillon, t’as pris tin timps, ti auchi. Com’ chi ch’étot eune marque d’rech’pect pou ch’ti qui avot gramint fait travaller ch’boîte à neurone pou dénicher tin cadieau. T’as décollé un à un ches biouts d’scotch. Cheule perchonne, qui te l’a offert, alle boullot intérieur’mint pach’qu’alle étot préchée d’vir t’guiffe d’vint eune telle mervelle. Mais ti, te prenos quind même tin timps, pach’que t’essayos in même timps, aveuc ches mains, dins tracher ches contours afin d’deviner quo qu’in avot pu t’offrir. Pis, vient l’momint d’ù qu’te n’as pus l’chox. Alors t’écartes délicat’mint ch’papier cadieau…
Vingt dius ! I t’in faut d’el concentrachion et du chelf-control pou n’pon t’écrier : « Beurk ! Ch’est quo ch’t’horreur ? In dirot eune bousse d’vaque qu’in a misse in couleurs. » Mais, heureuss’mint, que t’lingue alle a eu ch’timps néchessaire pou laicher échapper juss’ un : « com’ ch’est original, Merchi ! » », d’un ton très condeschindint.  Un ton très con, chertes, ça sentot l’faux-cul à plein nez. (Note de ch’t’auteur : Pardon, mes gins d’parler d’cul et d’bouse dins l’même artique.) Et deschindint pou tin argard qui évitot d’croser l’chien !  Pis, pou bin montrer qu’t’es intéréché par eune telle curiosité, ch’est l’moins qu’te puiches in dir’te. Auchi pach’que t’es vraimint curieux d’savoir quo qu’ch’est que ch’truc. Te l’artournes dins tous ches sins pou vir d’jà chi cha in a un ! Mais te prinds tin timps auchi. Bin, t’as l’echpoir d’avoir un trait d’génie, mais intérieur’mint eune tiote vox alle te dit : « J’donn’te m’lingue à ch’cat ! »
Intervinchion divine ! Ch’ti qui t’a offert ch’cadieau i est tout ému d’vir que t’el contimples aveuc autint d’admirachion. Alors, goûtint à ch’plaiji, i dit : « J’n’ai pon hésité eune s’conde quind j’ai vu ch’chuperpe préche-papiers néo-post-moderne. Ch’est fabriqué in résine d’l’époque plachto-pétroléeum ! Ti qui ador’te ch’t’art moderne, j’ai auchitôt pinsé qu’i étot fait pou ti ! » Toudis auchi poli et diplomate, te rajoutes : « Cor’ merchi ! J’n’ai jamais vu eune oeufre auchi originale ! » Mais, dins t’tiête, ch’est eune aute canchon qui est in train de ch’juer :  « Oeufre original, te parles ! J’espèr’te qu’in n’in a pon fait eune série complète et que ch’est l’dernier churvivint d’el lignée d’ches bousses d’vaque bariolées ! Cor’ heureux, in n’a pon ch’t’odeur aveuc ! J’n’os’ro même pon l’même su l’pile d’ches factures d’brein… Allez, cor’ un cop d’oeul ! J’sus sûr’te que j’vais treuver un indrot d’ù qu’cha s’ra marqué made in China. Ch’est quo cheule griffe ichi ? J’sus sûr’te qu’in a gratté l’prov’ninche ! »

V’là commint, dès ch’lind’main, te treuves ches cadieaux abindonnés su e-bay ou su d’autes chites. In croyot pourtint t’faire plaiji et cha partot d’un bion sintimint. Cheule perchonne alle avot sincèr’mint mis tout sin cœur. Te viens chertain’mint d’rompe eune bielle amitié in t’débarrassint de ch’trésor. Te risques gramint d’avoir affaire à cheule SPC, Société Protectriche des Cadieaux. Pis, chi te m’permets d’mette min grain d’sel, dins tin histoire : A’ch’t’heure, t’es vraimint dins ch’brein pou treuver un acateux pou t’bousse d’vaque d’toutes ches couleurs !
Mes gins, ch’est quind même chouette d’avoir un cadieau pou Noëm, même chi cha n’est pon toudis ch’ti auquel t’avos pinsé, ni ch’ti qu’t’avos mis su t’liste à ch’Père Noël. Bin, i est com’ cha, li aussi. Par momints, ch’est un sacré taquin ch’ti-lal…

Dessin d'illustration : Merci à Créateur d'Emotions.