Soirée tévé...

Vendredi 26 décembre 2008 5 26 /12 /Déc /2008 16:38

Soirée tévé...

Chalut mes gins ! Alors commint qu’ch’est qu’te vas après Noël ? Pon trop mau à ches queveux, j’espèr’te… Bin, ch’est tous ches ins pareil, ch’est gramint dur’te ch’lind’main. Et chi j’te dis qu’in armet cha dins moins d’eune s’maine, j’sus sûr’te que t’première pinsée ch’est : Nin ! J’in peux pus ! Bah, t’as quéques jours pou t’armette in f’sint l’régime bouillon d’légumes…

A’ch’t’heure, in n’va pon ch’printe l’tiête aveuc ches sujets qui fâchent ou qui sont trop dur’tes à traiter. Nin ! In a d’jà chuffisammint à faire aveuc sin estomac ! D’autint qu’chi te t’es affalé dins tin fauteul, hier soir, d’vint cheule tévé, cha n’t’a p’t’ête pon aidé gramint à digérer ! D’un côté, in t’proposse Robin d’ches Bos, l’Ro d’ches voleurs. D’l’aute, in t’proposse Oscar aveuc Bernard Tapie. Tindis que dins tin estomac, in arjuot ches canons d’ma marone. Nin ! J’vais apporter eune précision pou ches hommes qui m’lis’tent, in disint que j’ne parlos chertain’mint pon d’el même cosse. Mi, ch’étot pus, l’sins grind raffut, tonnerre et autes grond’mints…
Mes gins, in n’peut pon dir’te qu’ches chaînes d’tévé alles minqu’tent d’humour. Che s’rot même du pus grind comique in expliquint ch’t’hasard d’diffusion com’ cha : D’un côté t’as Robin d’ches bos qui vol’te ches riches pou donner à ches paufres. D’l’aute t’as Bernard, l’grind Nanard, qui a gramint volé ches paufres pou s’inrichir ! Bin, même chi in peut pinser qu’i a eune bionne guiffe. Churtout quind i jue Caliméro pou dir’te qu’in l’a abusé aveuc l’crinière d’un lion in peluche qui n’étot pon chertifié CE. In n’a toud’même pon oublié qu’i a racaté gramint d’boîtes pou les fermer et mette ches ouvreux à l’cour ! Infin, i est contint à’ch’t’heure. In compinse sin cop d’Adidas dins ch’cul, par eune obole d’tros chints millions d’euros, payé par l’Etat. Et ch’est qui l’Etat, mes gins ? Ch’est qui qui va payer l’note ? Quind j’te disos qui volot ches paufres ! Te vos, je n’pouvos pon mieux dir’te !
Ah, mes gins, in in finit par argretter ches bêtissiers d’el veille. Ch’est toudis ches mêmes echtraits qu’in t’pache et qu’in t’arpache tous ches ins. Mais, au moins, in n’rit pon à no dépins. Bion, j’in fais p’t’ête un peu trop. D’timps in timps, t’as un inédit d’l’année, quind même. Cha, te peux n’ête sûr’te que cha n’est pon ches bêtisses qui von’tent v’nir à minquer un jour !

Allez, ichi, chez Marie Toutoule, in va cor’ avoir l’drot à un cadieau ! Ch’est toudis Noël ! Min camarate, Mathieu Sicard, est un journaliste qui n’a pon querre à ch’printe l’tiête aveuc ches infos. Com’ mi, i préfèr’te in rir’te qu’in braire et i vient de m’invoyer un tiot court métrache fait par eune binde d’blogueurs et d’amis à li. Cha ress’ dins ch’t’echprit d’Noël et ch’est nin dénué d’humour et d’dérision. Pur régal ! Merchi min M, même chi j’te l’ai d’jà dit. J’espèr’te que tous mes gins is von’tent appréchier cheule tiote vidéo su MTTV…