halut mes gins ! In intam’te cheule dernière line drote avint Noël. Ch’est tous ches ins parels, in pinse toudis qu’in est fin prêt(e) et qu’in est dins ches timps mais in ch’aperchot qu’in a oublié quéqu’un. Ou cor’, in n’arrif’te pon à treuver quo qu’in t’a d’mindé in cadieau. Toudis i est que j’em sus couquée aveuc cheule idée in tiête, que j’avos p’t’ête oublié qué cosse. Et com’ j’ai eu ch’malheur d’lir’te in truc politique juss’ avint, hier soir, ches neurones is ont dû ch’immêler dins m’chervieau. J’ai paché l’nuit à rêfer à ches politiques, leux listes à ch’Père Noël et quo qu’is pouvotent bin echpérer…

tout Seigneur, tout honneur ! Min premier rêfe i a été pou eune grinte meneusse d’arvue. Cheule qui ch’est fait batte d’eune plache dins ches sondaches d’el perchonnalité l’pus célèpe d’l’année, par not’ Dany nachional : Ségolène. Ch’qui est sûr’te, ch’est qu’alle est l’grinte gagninte de ch’Poulie d’Or. Deussième à ch’t’élection présidinchielle. Deussième à ch’t’élection d’ches rosses et deussième dins ch’sondache. Et tout cha, in quinsse mos ! Sin vœu l’pus quer, à ch’Père Noël, ch’est d’avoir eune poupée vaudou à l’effigie d’Titine d’Lille ! Cha, alle n’a pon digéré ch’combat et alle voudrot bin li plinter ches aiguiles lal d’ù qu’cha fait mau ! Alle a auchi commindé un grind frigidaire, pach’que les chiens is sont pleins d’trucs d’toutes chortes. Toutes ches idées qu’ches autes is ont eues et qui pourrotent bin li chervir quind alle f’ra sin come-back. Mais alle a préchisé, à Papa Noël, qu’alle préfér’rot carrémint eune chimpe frode, aveuc eune bielle serrure dine d’ches pus grinds coffre-forts. Ainchi, alle pourrot y mette tous cheuls qui l’ont laiché querre et qui ont arjoint Titine. Alle f’ra cheule qui n’sait pus d’ù qu’alle a mis l’clé, après, et pou un tiot biout d’timps : E-TER-NI-TE. Cha s’ra sin nouvieau singueule !
Alle a terminé ch’lette in disint à ch’Père Noël qu’alle a pris eune bionne résoluchion pou l’année prochaine et qu’alle évit’ra ch’fromache. Cha, mes gins, i fallot s’in douter. Alle avot d’jà du mau à raviser eune boule d’hollande sins pinser à sin ex et churtout à ch’tiête. A’ch’t’heure, i n’faut pus li chervir eune tartine au brie et cor’ moins li parler d’Maroilles. Te pinses bin ch’faire batte par un deussième ch’ti in moins d’un mos…

in deussième rêfe, mes gins, i a été pou Titine, bin sûr’te ! Bin, quind in pinse à l’eune, l’aute alle arrif’ au galiop ! Alors, in braque ch’projecteur su alle. Nin ! Pus bas, ch’projecteur, t’es in train d’éclairer ch’ti qui est derrière alle, ch’bieau Benoît ! Lal ! Cha y est, te n’boug’tes pus ! V’là commint qu’alle comminche ch’lette : « Bonjour Père Noël, min pseudo ch’est Ch’timousse. J’sus coussine de ch’Pimousse. J’sus com’ li, tiote mais costaud’te. Par conte, j’te l’dis toud’chuite, mi, j’n’ai pon quere à ch’qu’in m’dis’te que j’sus l’Pie qui cante, même chi j’sus auchi d’Lille ! L’pie, ch’est nin mi ! J’voudros eune bielle panoplie d’Cléopâte ! »
Cha, i fallot ch’y attinte, Père Noël ! Alle sait ch’faire intinte et t’as intérêt à faire quo qu’alle a déchidé pach’qu’alle va ch’fâcher tout rosse. Pardon tout rouche ! Alle n’pouvot pon comminder eune panoplie d’napoléon ch’trossième. Alle a d’jà rimporté ch’batalle d’Solferino ! Cléopâte, cha simble naturel quind in y pinse. Alle règne in reine impitoyape su ches chujets. Pis, ch’est quind même l’seu à avoir réuchi à mobiliser ches momies qui avotent disparu de ch’parti. Ch’qui est sûr’te, ch’est qu’alle n’pourra pon chosir Nicolas pou juer sin Jules. Nin ! Ou alors, cha s’ra pou faire simblint et l’amener in haut d’eune pyramide in li disint qu’in vot mieux tous ches manifestints qui râl’tent ! Pis, ins haut, Oups ! J’cros bin qu’i a gliché d’sin pid d’Estale, min Nicolas ! Bion, j’sus sûr’te qu’alle a auchi l’invie d’faire d’el scène com’ Ségo ! Alle n’peut pon printe Dominique Besnehard, ch’est l’aute qui l’a. Mais alle pinse à Kamel Ouali. Cléopâte, i connôt bin. In pus, i va avoir gramint pus d’timps à’ch’t’heure qu’el Star’Ac alle est finie…

’ch’t’heure, mes gins, i faut qu’je t’raconte min rêfe suivint. Cha, i y a gramint d’timps que j’n’chuis pon allé vir de ch’côté de ch’palais ! Allez lisez… ch’qui chuit ! Bion, j’fais quo qu’je veux aveuc ches jux d’miots ; ch’est mi qui écris ! Toudis i est qu’ch’est l’grind armue méninches pou Carlita. Quo qu’alle va bin offrir à sin mari ? « Père Noël, j’ne t’écris pon pou mi. J’sus gâtée et j’ai d’jà eu min pus bieau cadieau. Ch’est min Nicolas. Par conte, Père Noël, j’n’sais pon quo qu’te pourros bin li ram’ner. I ch’est d’jà racaté eune nouvielle carette et un nouviel avion, cheule année. Li offrir un stylo, cha n’est pon original. Pis, i fauche tous cheuls qui traîn’tent su ches tapes quind i sign’te un nouvieau traité ou eune nouvielle loi ! Eune nouvielle monte, Père Noël, ch’est parel. I in a d’jà gramint su ches bras qui n’sont nin très grinds ! Ch’est d’ailleurs pou cha qu’i les armue toudis, pou ête sûr’te qu’alles sont toutes in plache. L’heure d’chaque pays pou n’pon ch’gourer dins ch’décalache horaire !
J’avos bin pinsé à eune panoplie d’facteur. Mais pon n’importe laquelle. In oublie ch’ti qui vot toudis rouche et qui n’sait que distribuer sin courrier à ch’t’extrême gauche. Nin ! Mi j’vos pus un facteur d’Beurgues dins ch’Nord. Pach’que ch’est quind même l’première fos qu’un employé d’el poch’te i arrif’te premier dins un sondache d’perchonnalité d’vint sin patron, ch’Présidint d’el République ! Pou ch’biclou, cha n’est pon l’peine. I a tout quo qu’i faut, min Nicolas. Te sais, Père Noël, i a d’jà fait d’l’intraîn’mint aveuc gramint d’monte, com’ Michel Drucker, par eximpe. Avint, i n’avot que ches mollets qui étotent gonflés. A’ch’t’heure, i y a l’ress’ auchi et j’sais qu’sin rêfe, ch’est d’ête Présidint de ch’Monte ! Mais j’n’sais pon commint qu’i faut faire. D’ù qu’in dot l’inscrir’te ! Père Noël, te d’vros vir cha aveuc Mémé capieau. Cha march’te p’t’ête parel à ches miss. Après ête Miss France, in l’inscrit pou Miss Monte ! Vraimint, Père Noël, je m’armets à ti’z’aute pou li faire un bieau cadieau… »

t pindint ch’timps-lal, dins ch’burieau présidinchiel, l’tiot Nicolas i écrit auchi ch’lette : « Père Noël, j’n’écris pon pou mi. J’sus gâté et j’ai d’jà eu min pus bieau cadieau. Ch’est ma Carlita. Alle est tell’mint bielle, alle est tell’mint célèpe. Et qu’ech qu’alle cante bin ! Un vrai tiot z’ojieau des îles. Par conte, Père Noël, j’ai un méga problème su ches bras. J’ai cor’ un super stock d’CD d’Carlita. Cha ne ch’vind pon gramint. Alors, j’em sus dit que, p’t’ête, te pourros m’donner un cop d’main. J’te fais un prix su ch’liot, mais un bion prix ! Même in grinte churfache, is n’peuv’tent pon l’faire. Faut pon oublier qu’j’sus l’présidint de ch’pouvoère d’achat et j’ai plein pouvoère pou faire querre ches prix ! Com’ cha, su toutes ches listes que te vas archevoir, d’ù qu’in te d’minde l’CD d’l’un ou d’l’aute, te mettras ch’ti-lal à l’plache. Chi ches gins is râl’tent, cha n’est pon grafe, j’ai l’habitute !
Pis, cha li f’rot un bieau cadieau, à ma Carlita, d’savoir qu’alle est disque d’platine et qu’alle tourn’te dins toutes ches platines ! D’autint qu’alle s’est misse dins l’tiête d’in faire eune verchion techno, d’sin album ! Chi ! Ch’est cor’ à cosse des ch’tis ! Millard, cheuls-lal, is no vol’tent l’vedette ! D’pis qu’alle a lu su l’chite d’Marie Toutoule que Ch’tiDJ i avot sorti un album pou faire l’fiête et qu’cha ch’vindot miux qu’el chien ! Du cop, alle a troqué ch’guitare conte eune perruque rosse, com’ li, et alle a acaté eune rope, in dirot eune bioule à fachettes. Pis, Père Noël, i y a urginche car alle est prête à pacher un cop d’fil à Freddy, l’camarate d’ju de Ch’tiDJ, d’pis qu’alle l’a vu à ch’tévé, pou faire des armixes ! Alors Père Noël, j’m’in armets à ti. I faut d’abord qu’in écoul’te che stock avint d’arpartir pou eune nouvielle avinture musicale. Mi, j’n’ai pon ch’porte-monnaie élachtique. Ch’est qu’cha coûte l’production d’un disque et ches caiches alles sont vites ! »

près, mes gins, j’cros bin que j’sus quée dins ch’qu’in appell’te ch’sommel paradoxal pach’que ch’étot vraimint bizarre. Jean-Marie et ch’file, Marine, is étotent insimpe et Marine alle écrivot ch’lette à ch’Père Noël chous l’oeul attendri d’sin père. Cha, i n’in a pu qu’un mais ch’ti-lal i vot tout ! Alle li d’mindot chi alle pouvot comminder un tiot noir’te. Bion, in aurot pu croir’te qu’alle voulot chinger d’métier et acater un tiot estaminet dins l’6-2. Mais quind alle écrit ch’t’adrèche, au lieu cheule à ch’Père Noël, ch’étot cheule d’eune aginche d’adopchion. Te vos, ch’est pou cha que j’te parlos d’paradoxe. J’cros bin qu’j’ai ches neurones qui ont dû ch’mélinger aveuc ch’filleul à Jean-Marie, ch’garchon à Dieudonné !
Mais cha n’est pon l’seu bizarr’rie dins cheule trinche d’sommel. Nin ! J’ai churpris Rachida qui écrivot su ch’liste qu’alle voulot des couches-culottes haute couture d’chez Hermès pou sin futur bébé. Alle a auchi commindé, pou li, une pouchette Porche dins l’même teinte que ch’carette. Inchuite, j’ai vu Roselyne qui commindot eune combinaison rose fluo pou Alain Bernard, in echpliquint à ch’Père Noël qu’alle avot gramint l’habitute de ch’rosse su alle, su ches joueux d’rugby et cha s’rot pus fachile, pou alle, pou l’arpérer dins l’ieau ! Cha, ch’est eune idée à art’nir, mes gins. Chi in harnaique ches gindarmes in rosse fluo, in pourrot p’t’ête les vir d’pus loin. Merchi Roselyne, j’garde tin idée chous l’coute !
In va chiter au passache, l’bieau Benoît Hamon qui li a commindé eune panoplie d’Chippendale. Bin, i a d’jà ch’physique, i n’li ress’ pus qu’à avoir quéques accéchoires. Mi, su m’liste à ch’Père Noël, j’ai mis qu’i peut v’nir m’faire eune démo à m’baraque quind i veut, Benoît, à’ch’t’heure qu’i a bin l’habitute d’ches lilloisses ! Bertrand, li, j’ai vu su ch’liste qu’i a commindé eune paire d’leunettes com’ cheule d’Michou. Cha dot ête pou protéger ches zis quind i fait du vélip dins ches rues d’Paris. François Bayrou i a commindé eune caïelle oranche ! Nin, mes gins, cha n’est pon eune aveuc eune connexion Internet incorporée. Ch’est juss’ l’couleur ! I dot in avoir marre d’ête ch’cul intre deusse caïelles et i a déchidé d’s’assir, ch’est pus confortape ! Pis, oranche, cha fait choixinte-disse, ch’est très tindinche.

ion, in in pache quéques uns, chinon in est cor’ ichi pou ch’nouviel in. Pis, après ch’Père Noël i va printe gramint d’artard, com’ dins ch’t’administration, pou étudier tous ches dossiers in attinte. In va d’voir li payer ches heures supplémintaires et ch’t’addichion alle va ête salée ! Alors, j’espère que, ti auchi, mes gins, t’as pris t’pus bielle plume pou écrire à Papa Noël quo qu’te voulos com’ cadieau. Te n’oublies pon su t’liste avoir eune tiote pinsée pou mi auchi. Com’ i disot l’aute, ch’ti dont in oublie toudis l’nom : Cha n’coûte rin de d’minder et ti, cha n’te coûte rin d’pinser à mi, churtout chi t’ne m’acates rin ! Joyeux Noël à tertous, mes gins !