Chalut mes gins ! Dins toutes ches informations qu’in peut treuver un peu partout, d’timps in timps, te quées su eune qui artient tin attinchion. Pou eune fos, ch’est pon pach’que cha va t’coûter des ronds cor’ in pus. Nin ! Quind t’in lis ch’tite, te t’dis : In n’est pourtint pon ch’premier avril, quo qu’ch’est que ch’truc ? Alors, te comminches à raviser d’pus près d’quo qu’cha parl’te…

Quind i s’agit d’avoir des idées loufoques, à tin avis, mes gins, d’ù qu’ch’est qu’te dos aller vir ? Dins ch’pays d’ù qu’in vot tout in grind, même ches bêtisses, ches USA ! Alors, j’ai quind même ravisé à deusse fos avint d’t’in parler, pou ête sûr’te que cha n’étot pon du pipo. Te veux cor’ eune idée d’cadieau pou offrir à Noël ? J’vais t’in donner eune. T’as cor’ l’timps d’el comminder such’ Net. Pach’que, pou l’momint, in in treuve qu’à New York ! Te connos chertain’mint eune marque d’imburguère plus connue qu’cheule qu’in treuve ichi : Burger King. Mes gins, is ont fait eune étude à partir de ch’burger qui étot l’pus vindu, l’Whooper. Eh bin, j’te l’donn’te in mille, is ont sorti un parfum pou ches hommes qui arprind ches fragrinches d’leu célèpe burger !
Alors, forcémint, te t’doutes bin qu’is ont élaboré un Big, nin, cha n’va pon, ch’est l’concurrinche. Un grind argumint commerchial pou in vinter ches mérites. J’te l’lifre com’ j’l’ai lu : « Com’ ches Américains is raffol’tent d’Burger King, in pinse qu’chertains is apprécieron’tent d’avoir su eux, toute l’journée, ch’sintimint d’leu burger préféré. D’autint que ch’parfum i est respecté ! In pourrot résumer par un sintiment d’séduction aveuc un soupçon d’viante grillée ! » Ah ! J’allos oublier de t’dire que ch’parfum i s’appell’te « Flame », qui com’ te l’sais, puich’que te n’étos pon au biout d’el clache pindint ches cours, veut dir’te flamme !
Comique, te n’treuves pon ? Mi, j’avoue que j’ai été morte d’rire in lisint cha ! In pus, appeler ch’parfum flamme. Ches flammes de ch’barbecue qui grill’tent l’viante, cha dot ête cha l’messache subliminal ! A’ch’t’heure, mes gins, intre quéqu’un qui n’sint pon bion du côté d’ches d’chous d’bras et quéqu’un qui sint l’viante grillée, i n’y a pon photo ! Mi, j’sus pus à l’aise aveuc Mister Steak ! D’lal à dir’te qu’cha va séduire ches femmes, i y a gramint d’quemin à faire ! T’imagines auchi cheule tiote annonche dins ches chites ou magazines chpécialisés : Mister Steak arquerque ch’Miss Salate ou ch’Miss Frites. Et chi ch’est un grind coquin, ches deusse in même timps ! J’espèr’te que tout ch’bieau monte i ch’sintira bin dins sin achiette… Seu ompe à ch’tablieau, imagine qu’el nénette alle est végétarienne... Mister Steak i va argretter d’avoir acaté ch’parfum et d’avoir organissé sin rindez-vo à ches tiots oignions. I aurot miux fait d’chosir Bouquet Garni d’chez Ducros, au moins, i n’se s’rot pon décarcaché pou rin !
Te dos bin t’douter, mes gins, que mi, auchitôt, j’ai fait marcher m’boîte à neurones. In peut même dir’te qu’alle a fait eune churcauffe très rapid’mint. Ch’est p’t’ête dû à ches flammes. Fot toudis ête très prudint aveuc un barbecue. Toudis i est qu’cha m’a donné des idées pou faire eune gamme d’nouvieaux produits ! Ch’est fachile, te vas arconnaîte d’ù qu’is vienn’tent ches gins à leu sintiment à’ch’t’heure. Un marseillais, in li vindra Rascasse, à ch’doux parfum exotique et invoûtint mélingé à ch’t’odeur d’bouillabaiche et relevé d’eune pointe salée com’ ch’t’ieau d’mer. In a intérêt, com’ ch’plat, à ch’que l’pichon i sot frais pou qu’in n’el confond’te pon aveuc Relent d’Egout. Chinon, j’n t’raconte pon ! D’jà com’ cha, Mister Bouillabaiche i risqu’te d’avoir tous ches cats du quartier à ches basques alors qu’i a mis ch’parfum pou attirer ches minettes… 
Un Alsacien, in li vindra Choux-Choux. Eune douche pointe d’choucroute agrémintée d’el délicate odeur d’eune bionne cochonnaille et d’un soupçon de Riesling. Et pou mette toutes ches chinces d’sin côté, in f’ra eune verchion halal et eune casher. Bion, dins tous ches cas, chi i est végétarien, in est dans l’brein ! Quoqu’in puiche auchi faire sins viante. Infin, i faudra qu’in mette cha au point aveuc ch’cherviche marketinge. Bion, j’n’vais nin faire l’tour d’France. Chi t’as eune bionne idée, te peux m’el faire savoir dins ches commintaires. In pus, cha permettra à tertous d’savoir quo qu’in peut minger à défaut d’savoir quo qu’in va sintir !
A’ch’t’heure, in va arv’nir ichi, dins l’région Nord-Pas d’Calais. Quo qu’in va bin pouvoir treuver com’ parfum à faire ? J’sais bin, mes gins, tertous i est in train d’pinser, com’ mi, à ch’Maroilles. Ving dius, cha va dégager sec dins ches rues ! Pis, dins ches trinsports in commun, cha va dégager tout court ! Nin, in n’peut pon faire cha. In oublie ch’fromache ! Chicon, p’t’ête, mais cha n’a pon gramint d’odeur. A moins qu’in axe tout cha su l’vinaigrette qu’in va mette pou les faire in salate. Parinthésse : T’armarqu’ras, quind j’écris axe, que je n’parl’te pon d’el concurrinche à ch’produit. Ch’est juss’ l’présint d’el trossième perchonne du chingulier du verpe axer !
In peut auchi chosir l’chicorée. Cha, ch’est bin arprésintatif. Pis pou chertains qui ress’tent d’vint ti sins bouger, te pourras leu dir’te : T’as mis d’el chicorée, cha n’est pon eune raison pou printe racine ! Oups ! Mes gins, j’cros que j’viens cor’ d’avoir eune churcauffe… Bion, in arvient à cheule chicorée qu’in va agréminter d’eune note un tintinet boisée. Ch’est bin com’ sintiment, ch’bos. Cha fait mâle. Cha fait mal auchi, quind te t’prinds eune bûque su l’pied ! Millard, j’ai vraimint un problème d’thermostat à’ch’t’heure ! Allez, j’vais quind même réussir à finir su ch’chicorée aveuc ch’note boisée. In pus, in n’a ch’nom tout treuvé : Chic Orée.
Alors, quo qu’i ress’ ? Ches frites, cha, ch’est eune idée, mais cha va à l’incontre d’el verchion marseillaisse qui proposse ch’ti-chi pou ches files. Pis, tertous i sait qu’ch’est un sintimint qui tient bin su tes fouffes ! Te n’as qu’à t’in faire eune porchion dins t’cuissine pou in ête convaincu ! Pis, même, cha va ête arvindiqué par ches Belges. Eh bien ! J’doute frinch’mint qu’is aill’tent s’accaparer d’ches moules ! I ress’ l’bière, ch’est pon mau. Quoqu’i y in ait chertains qui n’int pon attindu ch’parfum pou in avoir l’sintimint. Te vos quo que j’veux dir’te…

Mes gins, te n’pourras pon dir’te que j’n’em mets pon in quate pou t’treuver des idées d’cadieaux pou ches fiêtes. I n’ress’t’ra pus qu’à treuver eune gamme pou ches femmes. J’te l’dis toud’chuite, in évite ches crevettes ! J’n’veux même pon qu’t’y pinses… Et pou cheuls qui veul’tent vir ch’produit, v’là ch’lien : http://www.firemeetsdesire.com/. Pach’que, ch’est pon tout cha, mais tout ches sintimints d’viantes grillées, cha m’a donné ches crocs…