Chalut mes gins ! Ch’t’heure alle est grafe ! In va vit’ avoir d’ches problèmes d’organisachion in début d’année prochaine. Ches soirées alles von’tent ête différintes d’à’ch’t’heure. Alors, in bin ou in mau, cha ch’est à l’usache qu’in l’saura tertous. Ch’qui est sûr’te, ch’est qu’in va d’voir prévoir et t’nir à jour un planning, chi in n’veut pon in rater eune miette…

Bion, présinté com’ cha, t’es in train d’te dir’te : Quo qu’i li arrife cor’ à Marie Toutoule ? Alle va annoncher eune révoluchion à l’avinche ? Alle ne ch’prindrot pon pou madame Irma, par hasard… Nin, mes gins. Rin d’tout cha ! Mi, j’veux simplemint attirer l’attinchion su tin organisachion d’début d’soirée à partir d’euch chinq janvier. Cha y est ? Te vos d’quo que j’veux t’parler. Ouais, in abindonn’te cheule pub à France Télévisions à partir d’vingt heures. Alors, j’sais bin qu’in in est gavé et cha peut paraîte eune bionne idée. Mais chi in réfléchit un peu, in ch’aperchoit qu’in s’ra dins l’brein !
In premier, et pou qu’te n’aies nin l’frouche, in t’raconte que cha n’ching’ra rin su ch’que te pay’tes in ardevinche. Mais in t’dit auchi qu’alle s’ra indexée sur l’inflachion. Mi, quind in m’parl’te d’inflachion, j’ai bieau fermer ches zis, j’n’vos pon eune flèche qui quée mais eune qui grimpe ! Par extinchion, cha veut dir’te que chi ch’pétrole i argrimpe cor’ com’ un babache, com’ cheule année, in n’a pon fini d’payer ! Pach’qu’i n’fot pon rêfer, mes gins, cha n’ardéchindra pon in cas d’baiche ! Min David Pujadas i s’ra donc indexé su ch’baril d’pétrole, com’ ch’gasse !
Après cha, in t’apprind qu’in va treuver ches chous qui minqu’tent chez ches chaînes privées qui von’tent d’voir arvercher un pourcintache su ches arv’nus publichitaires. Pou qu’alles n’mettent pon ch’clé chous l’porte. Mes gins, alles von’tent d’voir ch’saigner à blinc ! Qué malheur ! In va les autoriser à coper deusse fos ches films et monter d’chisse à neuf minutes d’pub par heure. Autint dir’te que t’as intérêt à avoir souvint l’invie d’aller faire pipi ! Pis, in neuf minutes, t’as gramint l’timps d’faire aute cosse… Bah, mes gins ! Ch’est un nouvieau style d’vie !
Te grattes cor’ un peu, ch’est l’cas d’el dir’te, pou treuver ch’t’argint qui minqu’te cor’ sins l’pub, et te t’dis : Tiens, in va taxer ches fournisseux d’accès Internet et ches opérateux d’télécoms. In prind vraimint ches gins, nou’z’autes ches consommateurs, pou des nin-équipés in neurones ! Quo qu’te pinses qu’i va ch’pacher chi ches sociétés-lal alles von’tent perte du pognon in taxe ? Elles von’tent augminter ches prix, ch’est auchi simpe que cha ! Ch’est sûr’te, cha n’s’ra pon l’première année !
A’ch’t’heure qu’in a vu pou ches pépettes, in va vir dins ch’concret ! Ch’prime time i n’s’ra pus à l’même heure suivint l’chaîne que te veux raviser. Chi te ress’ su ch’t’eune ou ch’chisse, cha comminch’ra à vingt heures chinquinte, com’ à’ch’t’heure. Mais su l’deusse ou l’tros, cha s’ra à vingt heures trinte-chinq ! In va d’voir t’nir compte d’un nouvieau facteur ! Nin, pon ch’ti qui t’amèn’te ches factures. Ch’est ch’qu’in pourra app’ler décalache horaire. Chi te prinds l’habitute d’raviser l’cherviche public et qu’un jour te déchides d’raviser ch’privé, t’iras couquer gramint pus tard !
Mais ch’est auchi pou cheuls qui fon’tent l’cuissine qu’cha s’ra compliqué. Ch’qui veut dir’te que, lorch’que t’arcevras tin programme tévé pou l’s’maine, i faudra qu’t’in tienn’tes compte pou tes m’nus. Min consèle : Pou ches plats mijotés, cha s’ra l’jour d’ù qu’te choisis d’raviser ch’t’eune ou l’chisse. Puich’que t’as gramint pus d’timps ! D’pus, te s’ras synchro aveuc eux, puich’qu’i y a souvint des polars su ches chaînes, l’mijotage s’ra donc l’thème d’el soirée ! Allez, j’pouche même min plaiji ç ch’bœuf-carottes… Bon, un tiot Navarro d’mouton alors !
Chi te ravises ch’deusse ou ch’tros, te s’ras condamné à ch’surgelé ou à ches plats-traiteurs ! Là, j’avoue qu’j’ai un problème. Puich’qu’i va s’agir d’culture, j’hésite intre ches légumes surgelés, l’découverte d’l’Italie aveuc ch’pizza. L’Chine aveuc ches roulieaux d’printimps, même in hiver. Ou cor’, l’Turquie d’ches soirées Kebab et l’visite d’el baraque blinche l’jour d’ches imburguères ! J’in vos qui s’dis’tent, cha s’rot gramint pus simpe d’avincher l’heure de ch’arpas. Com’ cha, tout i est com’ avint et in n’ch’cache pon l’tiête. In a pus ou moins d’timps pou attinte l’début de ch’programme, mais in est prêt ! Ouais, mes gins, p’t’ête chi te travalles dins un bureau et qu’te rintes à t’baraque pon trop tard. Mais pou tous ches commerçints, is s’ron’tent condamnés à raviser uniqu’mint ches chaînes privées. Privé d’culture !

Mes gins, j’espèr’te que t’as mis un ou deusse inregistreux numériques su t’liste à ch’Père Noël, pach’qu’in n’est pus prêt d’raviser in direct cheule tévé. D’ailleurs, l’meilleu soluchion s’rot de n’pus la raviser du tout ! D’autint qu’in vient d’treuver un tiot génie qui vient d’comprinte que vingt heures chinquinte moins tout ch’bazar d’pub, cha fait vingt heures trinte-chinq et qu’in crée un décalache horaire. Vingt dius ! Vraimint, ch’est un balaisse, ch’ti-lal ! Et quo qu’in va faire de ch’trou ? Bin, in va faire simblint d’faire d’el culture et in va mette, su ches chaînes publiques, des tiots films qui s’ron’tent sponsorisés par ches marques. Com’ à’ch’t’heure, in fin d’compte. In aurot auchi vit’ fait d’dir’te qu’in autorisse ches chaînes privées à augminter leux copures d’pub et leux bébéfiches par l’meêm occasion. Cha aurot été pus honnête invers tertous. Pach’que lal, j’ai bin l’impréchion, même chi ch’est loin, qu’in va argretter cor’ pus cheule peumme qui f’sot : Ah… dup dup dup dup dup ! Qu’dins ch’t’histoire ches dupes, ch’est ti et mi. In no prind vraimint pou des peummes !