In éteint tout...

Lundi 15 décembre 2008 1 15 /12 /Déc /2008 14:03

In éteint tout...

Chalut mes gins ! Commint qu’ch’est que te vas in ch’début de s’maine ? J’sus sûr’te qu’t’as couru com’ un babache pou treuver tes cadieaux cor’ tout l’diminche. Bin, te n’pourras pon dir’te que j’ne t’ai pon aidé pou ches idées aveuc mes gadgets chpéciaux et mes Ch’tis Transats. A’ch’t’heure, j’vais t’parler d’qué cosse qui m’a fait biondir. In voudrot culpabilisser ches gins qui mettent gramint d’illuminachions su leux baraques…

Ch’débat i est linché par l’aginche d’l’invironn’mint et d’el maîtrisse d’l’énergie pou attirer ch’t’attinchion su cheuls qui trinsform’tent leux baraques in inseigne leumineusse pou ches fiêtes. In t’fait comprinte que cha crée eune churconchommation d’énergie. Par conchéquint, ch’est pon bion pou l’planète car cha crée cor’ pus d’gasse à effet d’serre. Ch’est sûr’te que, dit com’ cha, te mets l’honte su ti et te n’as qu’eune invie : Tirer su ch’fil pou tout éteinte !
Te l’as chertain’mint armarqué, com’ mi, in treuve d’pus in pus d’décors leumineux qui utiliss’tent ches LEDs plutôt que des tiotes impoules. Ca consomm’te gramint moins et in t’dit qu’cha dur’te pus long. Mais ch’est auchi gramint pus quer ! Pis, chi te ravises bin, ches décors pou mette à l’extérieur, ch’est cor’ des impoules normales, l’pus part de ch’timps. Ch’est un peu normal, mes gins, chi t’alleumes t’décor et qu’te n’vos pus rin à disse mètes, cha n’pésinte pus vraimint d’intérêt d’in mette !
Alors, chi et lal, ches munichipalités alles fon’tent machine arrière. Après avoir incouragé, d’pis quéques années, ches gins à mette l’paquet et organiser des concours d’baraques illuminées, in voudrot s’arcintrer su des baraques seul’mint décorées. Parallèl’mint, in t’dit qu’t’as l’drot d’faire à t’mode. Bion, pou mi, ch’est carrémint du comique ! In vient d’ch’aperchevoir d’cha à’ch’t’heure ? I y a tros ins, par eximpe, in n’le savot pon, p’t’ête, qu’cha f’sot du gasse à effet d’serre. Ch’est cha ? In est tertous in train d’vife eune vague d’frod. In va auchi te d’minder d’éteinte ch’cauffache pach’que cha crée eune surconchomation ?
Ok, mes gins ! J’vais mette gramint moins d’déco su m’baraque. Mais j’voudros auchi que nos élus, intr’autes, is prenn’tent conscienche qu’cha n’est pon nou’z’autes qui sommes ches pus gros consommateurs d’électricité. Te n’as qu’à pacher in ville, in pleine nuit, pou t’in rinte compte. Pouquo in braque des projecteurs su ches monumints à eune heure d’ù qu’tertous i est au pays des rêfes ? Is ont peur de ch’noir’te, ches monumints, ch’est cha ? Et combien d’guirlindes électriques in pourrot brincher aveuc l’conchommation d’un seu projecteur qui t’éclaire eune tiote plaque commémoratife ? Cha, in n’va pon te l’dir’te ! Cha pourrot t’mette ches bioules in pus d’cheules su tin sapin ! Pis, cha n’est pon pou un mos d’l’année. Ch’projecteur, li, ch’est 365 jours ! A moins qu’in ait peur qu’un car d’touristes japonais i débarqu’te in pleine nuit pou faire des photos… J’ne t’parl’te même pon d’ches limpes qu’in incruste dins ch’sol et qui éclair’tent ches ojieaux qui sont, eux-auchi, in train d’roupiller à ch’t’heure-lal ! Mes gins, j’sus biête ! J’avos oublié qu’in balisse p’t’ête pou ches extra-terrestes…

Alors, j’n’sais pon quo qu’t’in pinses, ti’z’aute. N’hésite pon à invoyer tin avis dins ches commintaires. Mais, pou mi, ches fiêtes d’fin d’année sins décorachions n’s’rotent pus parelles. D’jà qu’in n’a pus gramint d’pouvoère d’achat pou les faire in grind ! Chi in dot tout éteinte, autint les interdire eune fos pou toutes ! Cha s’rot pus honnête invers tertous. Pis, chi in cherche l’moyen d’compincher cheule surconchommation à cosse d’ches illuminachions d’décempe, mi, j’ai eune soluchion : In n’a qu’à couper tous ches éclairaches eune fos dins l’année, dins toutes ches villes. J’sus sûr’te qu’in s’rot cor’ in crédit invers ch’qu’in osse printe aveuc ches guirlindes électriques…