Chalut mes gins ! J’n’sais pon pou ti, mais i y a des jours d’ù qu’in est d’eune humeur coquine. Cha, ch’est l’faute d’ches sondaches. A forche d’vir ches stats qui démontrent qu’in timps d’crisse, ches gins is ch’fon’tent pus d’câlins qu’habituell’mint, cha finit par t’invahir ch’t’echprit. Alors, quind, in pus, te lis un sujet qui t’présinte ches idées cadieaux pou ches fiêtes d’fin d’année et que t’artreuves des gadgets assez chpéciaux…

Cha m’a donné l’invie d’t’in parler auchi. Après tout, ch’est tous ches ins pareil, in n’sait jamais quo qu’in va offrir. Bion, ch’est sûr’te, i fot bin faire attintion à qui te l’offres, tin cadieau. Pach’qu’i  y a cor’ des gins qui pourrotent t’el j’ter à l’guiffe in t’traitint d’tous ches noms. Cha part chouvint d’un bion sintimint et, com’ in dit, ch’est l’intintion qui compte ! Pis, cha n’peut pon ête pir’te que cheule horripe cravate qu’ches hommes is arçoiv’tent. Alle va finir à ch’fond d’un tiroir, chous ches cauchettes, bin muchée, pou ête sûr’te de n’pon querre d’sus in prenint sins raviser dins ch’placard. Parel pou ches dames, l’tiot flacon d’parfum d’cocotte d’ù qu’quind te l’oufres, pou faire plaiji, t’artiens t’respiration in f’sint simblint de l’arnifler. Garde-le quind même, te l’mettras à côté d’ti quind te s’ras attaquée par ches mouchtiques ! Te verras, ch’est radical !
Alors tertous i connôt ches huiles qui permettent d’faire du tripotache. Ch’est agréape churtout pou ch’ti qui ch’fait tripoter car ch’est l’aute qui fait tout ch’boulot. A’ch’t’heure, l’tindinche alle est à ches produits alimintaires. In fait, ch’est com’ d’el peinture, mais ch’est des peintures qui ont des goûts com’ l’chocolat, l’framboisse et autes. Pis lal, j’n’vais pon faire un déchin, cha n’est pon aveuc ches mains qu’te fais ches papoulles. J’in connos gramint qui von’tent artreuver eune âme d’infint pou juer à ches indiens aveuc ches nouvielles peintures d’guerre ! Te f’ras attintion de n’pon plinter ches dints dins tin partenaire, galaffe ! In n’a pon fini d’intinte dins ches baraques : Te viens chéri(e) ! J’vais mette d’el ch’risse su tin gâtieau…
L’aute gadget à l’mote, ch’est l’sextoy. Alors même chi cha peut choquer ches bins-pinsints, i fot savoir, mes gins, qu’ches premiers is ont été invintés i y a pus d’deusse mille chinq chints ins ! Te vos, cha n’est pon nouvieau, ni même eune perversion d’euch chiècle ! Ch’est com’ dins l’ress’, cha a fait gramint d’progrès et in a abindonné ch’bos, ch’pierre ou même ch’cuir pou du plachtique ! Et l’tindinche, cheule année, alle est à ch’vert ! Nin, cha n’est pon pou arsimper à un concombre que pourrot t’vinte Manu, tin vindeux d’légumes. Cha n’est pon, nin pus, pach’qu’in a pris l’moule de ch’t’instrumint à Hulk. Te pinses bin qu’in n’va pon ch’arrêter à eune couleur. Ch’est un produit vert pach’qu’in essay’te d’faire ches trucs sins produits chimiques ! Ch’est un nouvieau concept que j’te lifre com’ cha : Bio à tous ches étaches…
Pou tous cheuls qui ont querre à ches jux d’société, in a auchi pinsé à eux. Te l’interprètes com’ te veux, mes gins. Mi, j’n’tiens pon ch’candelle ! Alors, in vrac, in treuve ches jux d’cartes d’ù qu’in dot faire des positions. Tout ch’qu’in echpèr’te, ch’est qu’is ont pinsé à mette haut et bas su ches cartes. Pach’que, ch’est bin gintil d’défier ches lois d’el gravité, mais in n’est su l’tierre et pon in apesinteur ! In treuve auchi un ju d’l’oie revisité in quemin d’ches plaijis. Même un kit d’dév’lopp’mint durape, pou ch’coupe, aveuc chinquinte-deusse s’maines d’jux ! In n’dit pon pou l’s’conde année chi in dot arcommincher à zéro, pach’que chi in dot ch’séparer après, cha n’est pon très durape…
In treuve auchi des kits tout in un com’ ch’kit Hollywood, voire au lit wood. I est livré aveuc ches huiles et ches peintures comestipes. Du chimpagne aveuc deusse coupes et un seau. Des candelles, mais sins ch’ti qui les tient, quind même ! Deusse peignoirs in satin noir’te. Mille pétales d’rosses et un CD d’musique romintique. Et pou cheuls qui sont vraimint babaches et qui n’sav’tent pon par quel biout commincher, un guide conseil. Eune notiche, quo ! Chinon, i y a auchi l’strip pintalon com’ ches Chippendale pou homme. Mais te sais ch’qu’in dit, cha n’est pon l’habit qui fait l’moine. Alors n’t’attinds pon à un miraque ! Pou femme, te peux acater l’kit d’initiachion au pole-dancing, livré aveuc ch’barre d’intraîn’mint et un DVD d’démo. Is ont même pinsé à fournir ches faux dollars et j’n’ai pon b’soinde  t’echpliquer commint qu’te dos t’in chervir ! A’ch’t’heure, chi tin bas d’laine, nin in va ress’ter dins l’même echprit. Chi tin bas résille i est plein d’vrais euros, cha marche auchi ! 

V’là, mes gins, j’echpèr’te que cha va t’oufrir d’autes horizons pou ches fiêtes et qu’cha t’a donné des idées. Lal auchi, te l’intinds com’ te veux, mes coquins d’gins ! J’auros pu auchi dir’te, qu’à’ch’t’heure, in organisse des réunions à domichile, com’ ches réunions Tupperware d’ù qu’in t’présinte tous ches produits. Bin sûr’te, te pourras découfrir l’canard vibrint waterproof. Jack the Rabbit, l’meilleu ami d’ches files et Tenga flip hole, l’meilleu ami d’ches gars. Pis eune nouvieauté, l’culotte vibrinte, livrée aveuc ch’télécomminde sins fil ! Chi, te peux rir’te, cha existe ! Com’ cha, te n’dépaches pus tin forfait téléphonique… Ravise autour d’ti, chi te vos quéqu’un pris d’el dinse d’Saint-Guy, cha s’ra p’t’ête dû à cheule révoluchion technologique. Ch’est cha avoir du sexe à piles ! Pis, pou ches célibataires, des housses d’couettes aveuc un play-boy ou eune play-mate pou qu’te t’sintes moins seu. Et ch’play-boy, li, i n’ronfle pon ! In termine par ches hommes. I existe auchi des capuchons dorés, pou harnaiquer ch’t’ingin in habit d’fiête. Mais in n’a pon cor’ fait ch’ti qui arsimpe à un sapin d’Noël et qui clignote, même chi in n’est pon obligé d’y rajouter les boules…