Chalut mes gins ! J’n’sais pon commint qu’te la sins cheule s’maine, mais mi, j’ai l’impréchion qu’in va vifre des tiotes Paul et Mike d’un peu partout. Te m’diras, cha permettra d’rir’te un bion cop. Après tout, in n’est pon responsape d’ches bêtisses des autes. Alors, j’sais que ch’est pon bin de ch’moquer. J’ai honte et j’in ai du rouche à ches joues ! Mais comme alle dit l’pub, ch’est bion, la honte…

In va arv’nir su ch’t’élection d’Miss France juss’ un tiot cop. Pach’que cha vaut l’détour et j’avoue, qu’hier, j’em sus bin amusée in lisint tout quo qu’cha a déclinché. Alors, in n’va pon vir ch’côté politiqu’mint corrèque que chertains is ont mis in évidinche : Elire eune Américano-françèsse noir’te juss’ après cheule élection d’Obama. Cha fait du ram-dam, d’autint que gramint d’gins sont d’accord pou dir’te qu’alle n’étot pon l’pus jolie ; quel qu’in fut ch’couleur ! Mi, j’sus bin du même avis. Mais cha a auchi déclinché un tollé chez ches autes concurrintes quind Jean-Pierre i a annonché sin nom. Pach’que alle avot l’unanimité, ch’est sûr’te, mais conte alle ! Ch’est ainchi qu’ches journalistes is ont arceulli ches témoignaches des autes qui sont tertous d’accord pou dir’te qu’alle est trop arroginte. Qu’alle méprisse ches autes et qu’sin cervieau, ch’est pire qu’eune calculatriche du Texas pou gagner !
Infin, ch’qui est sûr’te, ch’est qu’el Miss in question alle s’in fout et qu’alle a dit qu’in n’peut pon plaire à tertous. Ch’est vrai. Mais com’ j’dis toudis, quind in m’sor’te cha, l’tout ch’est de n’pon déplair’te à ch’pus grind nompe ! In peut ête sûr’te qu’ches journalistes, qui sont cauds com’ des braisses, is flair’tent l’bion scoop. Qu’alle va vir ch’vie pacher à ch’peigne fin pou raviser, d’près, quo qu’alle a com’ cadafres dins ches placards ! Ou com’ photos dins sin album souv’nir… Sin premier cadafre, ch’est qu’alle avot d’jà fait l’polémique lors d’sin sacre d’Miss Albigeois, l’vingt septempe dernier. Ch’première dauphine alle avot arfusé d’mette sin écharpe in disint que ch’vote i étot truqué. Qu’i y a eu des arrang’mints intre ches gins du comité local ! Bref, eune élection qui va bin au-d’là d’el région et qui ress’t’ra eune élection Miss Terre…
Ch’est churtout l’guéguerre aveuc l’inchienne et Mémé Capieau qui vaut l’détour. Vingt dius ! Et j’pourros même rajouter : Millard ! Ch’torchon i brûl’te toudis et cha n’étot pon l’jour d’el réconchiliation ! Mais com’ rin dins ches émichions i n’est calculé d’avinche, te pinses bin, fort opportunémint, ch’Valérie alle étot à l’oche in g’lée pou un casting. Te t’rinds compte ti’z’aute. Mémé Capieau alle est tell’mint armontée conte alle qu’in a juré bion li faire traverser l’ochéin. Pach’qu’in aurot pus li treuver un casting dins ch’Larzac, mais nin. In a préféré mette d’l’ieau intre alles, in echpérint que sin capieau i n’pourrot pon li chervir d’batieau pou travercher ches flots ! Ti, j’te vos dernière tin manicraque, te te d’mindes pouquo j’ai parlé du Larzac alors que j’auros pu chiter Cannes, par eximpe. Cha m’est v’nu com’ cha, ch’Larzac, pach’qu’i y a gramint d’chèvres là-bas et qu’in intind d’partout Bêê, Bêê, Bègue… J’te l’dis, mes gins, honte su mi !
A’ch’t’heure, ch’est Jean-Pierre qui va avoir des soucis. Cha, in avot bin armarqué que d’pis ch’t’histoire d’photos, TF1^er i avot toudis fait com’ chi d’rin i n’étot et que Valérie alle étot l’Miss d’inte ches Miss. Peut ête un peu trop, d’ailleurs, et j’n’s’ros pon churprisse qu’in finiss’te par savoir que ch’est l’copine d’quéqu’in d’importint. Mais nin, ch’est vrai, cha n’peut pon ête truqué. Ch’est ches gins qui votent… Toudis i est que Jean-Pierre i a eu l’mauvaisse idée d’dir’te l’vérité chelon l’quelle is n’avotent pon réuchi à réconchilier ches deusse lal. Pis, organiser un duplex d’pis l’oche in g’lée. Jean-Pierre, Mémé Capieau alle ch’fâche tout rouche et mi, j’ai bin peur qu’alle ajoute : ch’est votre dernier mot, Jean-Pierre ! D’jà qu’alle n’peut pus la vir in peinture, cor’ moins in photo, alors, te pinses bin, qu’un duplex, cha li a tout tourn’boulé ches sings !

A’ch’t’heure, j’n’s’ros pon étonnée que Mémé Capieau alle abindonn’te sin coufe-chef pou ch’ti d’un cow-boy et ch’tenue haute couture pou du jean et des santiags ! Et voichi l’revinche d’Calamity Gen’vièfe, cheule qui n’a pon frod à ches zis. Seu conte tertous, ch’est à dir’te TF1^er, alle va clouer ch’bouque à cheule Valérie. Et d’ajouter : Alle va in perte ches miots, l’Bègue ! Pis, attintion à cheule nouvielle. Pon question qu’alle in fache à ch’mote ! Mi, j’vais la mater ! Chi alle n’fait pon tout quo qu’j’li dis d’faire, pou ête eune Miss à la hauteur, alle va vir d’quel bos j’em cauffe ! Cheule Chloé Mortaud, j’la trinsform’rai in chauchisse !