Chalut mes gins ! Tout i ch’oublie dins ch’monte qui n’tourn’te pus com’ i l’d’vrot. In est in train d’perte ches arpères et dev’nir des intités uniformes com’ ches extra-terrestres. Alors qu’in f’rot mieux d’ardev’nir des terrestres extra ! Infin, tout cha pou t’dire qu’in perd ches traditions et, par l’forche des cosses, auchi not’ âme…

J’ai invie d’parler de ch’barbu qui disparaît d’nos vies de ch’tis d’pis quéques années. J’auros pu faire appel à Jacques Pradel, cor’ une fos, ou bin d’minder à min inquêtriche Bridget Columbo d’artreuver ch’trache. Mais j’préfèr’te in parler à tertous pou ch’qu’in pourrot app’ler auchi : Un d’voir d’mémoire. Bin sûr’te, mes gins, te l’auras compris, j’parl’te de Saint-Nicolas. En fait, j’ai eu ch’t’invie à cosse d’min echpérienche d’hier d’ù qu’j’ai dû faire tros magasins pou treuver eune carte d’Saint-Nicolas pou m’Lolo Toutoule qui s’arconnaîtra.
Pou rafraîquir t’mémoire et l’mienne, par l’même occasion, car j’avos oublié auchi qui ch’étot. Saint-Nicolas provient de Nicolas de Myre. I est né dins ches années 250 ou 270. In n’sait pon trop, I n’y avot pon l’tévé pou filmer l’évèn’mint et cor’ moins Léon Zitrone pou in faire l’commintaire ! Ti, derrière tin manicraque, j’te vos sourir’te com’ un babache. Mi, nin pus, j’n’étot nin née ! Bion, j’arviens à Nicolas qui fut l’succécheur de ch’mononque, l’évêque de Myre. D’sin vivint, i fut l’protecteur d’ches quinquins, d’ches veufes et d’ches gins faibes.
Alors, mes gins, te m’connos. J’auros pu faire un parallèle aveuc Ch’Nicolas 1^er  et sin plin pou no sortir d’el crisse in trinsformint ch’France in énorme chintier aveuc des ouvraches tout azimut. Mais in n’va pon faire d’el politique à’ch’t’heure. Nin ! In va artreuver sin âme d’infint in arlisint sin histoire à ch’barbu. D’jà, chi in l’fiête tous ches chisse décempe, cha n’est pon un hasard. Ch’n’est pon, nin pus, pach’que ches facteurs is ont déchidé d’el mette lal su leu calindrier, te dos bin t’douter. Ch’est l’date officielle de ch’mort. Infin, cor’ eune fos, ch’est ch’qu’in a treuvé ! Pach’qu’in n’sait pon vraimint et qu’in ech’tim’te que ch’est intre 345 et 352 pou l’année. Te n’as qu’à vir ! Bion, in s’in fout, cha n’ching’te rin à sin histoire. I a été, quind même, ch’ti qui a inspiré bin des chiècles pus tard l’fameux Père.
Tout ch’qu’in dot art’nir ch’est que ch’vie d’bionté alle a aliminté gramint d’légindes au fil de ch’timps. Dont l’pus chélèpe veut que l’saint i ait ressuschité tros infints qui s’in allotent glaner à ches camps. Is sont allés et tint v’nus que su l’soir, is ch’sont perdus. Is sont allés chez l’boucher pou treuver d’quo ch’loger. Ch’boucher i les fit rintrer et auchitôt i les a tués. Copés in tiots morcieaux pis salés dins un tonnieau. (Parinthésse : in n’avot pon cor’ invinté ch’frigo !)
A biout d’chept ins, Saint-Nicolas pacha par lal et buqua auchi à l’porte de ch’boucher pou li d’minder d’el loger. Ch’ti-chi i l’fit intrer, pinsint pouvoir augminter l’capachité d’sin garde-minger. Mais dès qu’Saint-Nicolas i fut à l’intérieur, i s’imprécha d’réclamer au boucher ch’i pouvot li donner du tiot salés qu’i gardot dins sin saloir d’pis chept ins. Bion, i avot dû m’ner sin inquête pou connaîte ch’t’histoire. Mais i avot dû ch’débrouller seu pach’que min inquêtriche Bridget Columbo alle n’étot pon née nin pus ! Toudis i est que ch’boucher i prit ches gambes à sin cou et qu’i s’infuit.
Saint-Nicolas i ch’adrécha alors à ches morcieaux in étindint tros dogts et in disint : « Tiots infints qui dormoz lal, j’sus l’grind Saint-Nicolas. Et ch’est com’ cha que ches tros infints is sont arv’nus à l’vie in pinsint qu’is avotent simplemint dormis… Bion, ch’est eune léginde heureuss’mint car in a l’impréchion d’aoir affaire à ch’scénario d’un film d’horreur qu’in pache à l’invers. 
D’pis, Saint-Nicolas i vadroulle dins l’nuit du chinq à chisse pou vir chi ches infints is ont été saches. Quind ch’est l’cas, is ont l’drot à ches cadieaux et à ches suques pou les récompincher. Chi ch’est nin l’cas, gare à leux fesses car ch’barbu i est toudis in équipe avec ch’Père Fouettard. Li, tout in noir’te, i distribue des cops d’triques à ches garnemints ! Alors, ch’soir, chi t’as des infints aveuc ti, mets leux soulis quéque part in évidinche. Ouais, in ch’doute qu’t’as p’t’ête pon d’queminée. A côté, disposs’te eune carotte et du suque pou sin bodet. Puis, un verre d’vin pou arcauffer ch’grind Saint-Nicolas et n’in profite pon pou t’invoyer l’ress’ d’el boutelle !

Bionne Saint-Nicolas à tous ches infints et bionne fiête auchi à tous ches Nicolas dont l’mien…