Chalut mes gins ! Ch’est un sujet grafe. I fot que j’t’in parl’te pach’ que t’es l’seu qui peut m’aider ! Chi, ch’est vrai, j’ai b’soin d’ti qui m’lis. Pis cha va ête très simpe com’ michion. Te vas vir, j’vais echpliquer quo qu’te dos faire un peu pus bas dins ch’t’artique…
J’n’vais rin t’apprinte mais quind te querques quéque cosse su Internet, t’utilisses ch’qu’in appell’te un moteur d’arquerque. Te tapes un miot ou eune tiote phrasse et li, i va lir’te pus vit’ qu’el vitèche d’el leumière tout quo qu’i y a dins tous ches chites, un peu partout su l’planète. Com’ d’pis plusieurs années, l’un d’ches pus grinds, Yahoo, i a publié sin clach’mint d’ches requêtes les pus d’mindées. Mes gins, ch’est eune méga cata, j’n’sus nin d’dins ! Mi qui pinsos pacher des bionnes fiêtes d’fin d’année, me v’là triss’, te n’peux pon savoir... Alors, rin i n’est perdu, in peut cor’ faire monter ches compteurs pou l’prochain clach’mint 2009. Te vos, t’michion alle n’est nin dur’te. Te tapes min nom, Marie Toutoule, chous l’moteur d’arquerque et te d’mindes à tes amis et à tertous d’faire parel !
Bion, j’arconnos, mes gins, que j’vais avoir gramint d’mau à rivaliser aveuc ch’top disse d’ches arquerques. Mais in peut toudis rêfer, cha n’coûte rin ! Pis quind j’vos quo qu’i y a d’dins, j’em dis que tout i part in coulle, même ch’culture. In va vir insimpe ches chinq premiers, cha s’ra d’jà bin. Te sais qui i est à ch’première plache ? Ch’est Secret Story. Ch’est dingue, cha ! Ches gins is sont préoccupés d’vir des guguches infermés dins un appart. In echpérint quo ? Qu’is von’tent faire des galipettes in direct ou qu’is von’tent ch’crêper l’chignon… Ches producteurs, eux auchi, i echpèr’tent car cha fait monter ch’t’Audimat. Te pinses bin que cha s’rot moins vindeux d’mette des caméras dins un club d’tricotache ou dins un d’lecture !
Alors ches autes sujets d’préoccupachions sont tout auchi culturels, mes gins. Ch’est ainchi qu’in apprind que ch’foot i arrife in s’conde et in quatrième plache. L’s’conde pou ch’t’OM et pou l’trossième, in ress’ dins l’même ville. Ch’est ch’qu’in appell’te un doublé ! Cha y est, t’as d’viné d’quo qu’i s’agit ? Ouais, mes gins, ch’est ch’feulleton qui fait d’l’ompe à ch’Ferrari : Pus bielle l’vie ! Nin seul’mint, cha cartonn’te à ch’tévé, mais cha cartonn’te auchi such’ Net. Te cros, ti, qu’ch’est pach’que ches gins is n’ont rin compris qu’is von’tent arlir’te l’histoire pou combler ches tros ? Infin, chi in peut parler d’histoire ! Bion, com’ t’as été sache jusque lal, j’vais dir’te que ch’quate, ch’est l’PSG.
In arrife à ch’chinq. In treuve l’Star’Ac ! Te t’rinds compte ! Ch’batieau i prind l’ieau d’pis l’début. Quand te sais que ch’est à cosse d’marins such’ siche, j’y treuve eune chertaine ironie ! Pourtint su TF1^er, is aurotent dû savoir que NCIS veut dir’te Naufrache Calculé et Imminint d’el Star’Ac…  Ches gins d’el prod is fon’tent n’importé quo pou essayer d’faire monter ch’t’acoute. Is von’tent jusqu’à imbaucher eune drôl’te qui fait du coach mintal, Madame Machin Machin. Alle fait sin numéro d’clown pou foute l’brein inte ches élèfes et ches professeurs. Et même cha, cha n’march’te pon. Alors, i invite eune Britney, qui cante in play-back et qui a bin chpécifié qu’alle n’voulot pon ête approcher par quiconque. Après ch’canchon, alle découfre, toudis in direct, qu’alle est dins eune académie aveuc des élèfes. Bref, alle met ch’paquet pou faire l’babache et faire grimper l’sauche, mais cha n’y fait rin nin pus. Ch’est con qu’ches arquerques d’Yahoo is n’comptent pon dins ches calculs d’Audimat et cha, Nikos, cha l’agasse…
Alors, j’n’sais toudis pon commint que j’vais faire pou rivaliser aveu eune culture auchi grinte et ête clachée dins ch’p’loton d’tiête. Mi, aveuc mes tiotes histoires in ch’ti que j’te raconte à longueur de s’maine. In attindant, j’sais commint qu’in peut faire pou avoir eune nouvielle émichion d’tévé qui décoiff’te et qui ch’trinsform’te in vrai phénomène d’sochiété. I fot qu’j’appell’te ches gins d’chez Endemol. Ainchi, is von’tent pouvoir ch’arfaire eune sinté fininchière et rattraper cheule année d’misère staracadémique. J’vais même te l’echpliquer. D’toute fachon, in n’pourra pon m’piquer ch’t’idée, mes droits d’auteur is s’ront déposés quind j’mettrai ch’t’artique in line.
La v’là. Ch’est brut d’décoffrache et i faudra chertain’mint peaufiner ches détals, pis treuver un nom. In prind deux équipes d’footballeux amateurs qu’in inferm’te dins un grind loft. Mais in révoluchionn’te ches règles et in fait eune équipe d’hommes et eune d’femmes. Après tout, i fot qu’ches tévéchpectateurs is s’y artreuv’tent tertous ! Auchi bin ches femmes que ches hommes ! Is sont filmés tout l’timps, même chous ches douches. Com’ cha, in pourra faire un produit dérivé com’ un calindrier, par eximpe. In les initie à ch’cant. I fot bin leu apprinte des canchons pou leu donner l’moral avint ches matchs. Pis, quind is sont à ch’trossième mi-timps, cha cant’ra moins faux. In in profit’ra pou leu faire réviser ch’Marseillaise. Cha peut chervir !
In imbauch’ra un prof d’sport, d’préférinche un ancien footballeu qui avot l’cote. Cha n’dot pon ête compliqué à treuver, cha n’est pon ches placards à pipole qui minqu’tent ! Ravise ! In a bin pris David Ginola pou ches fux d’l’amour… L’concept i est simpe, pon quetion d’faire trop intello à part des questions such’foot ! Pis in organiss’te des défis intre cheule équipe féminine et l’aute. Ch’ti qui gagn’te à l’fin, ch’est l’équipe qui a fait l’pus d’cops fourrés à l’aute. Ch’est ch’public qui détermin’ra ches pus tordus in attribuint des points, toutes ches s’maines. Et pou mette d’l’huile such’ fu, in arprindra Machin Machin pou foute l’brein. Ch’est cha chpécialité, après tout !

Quo qu’t’in dis, mes gins, d’min idée ? J’allos oublier un détal d’el pus haute importinche. Cha s’ra tourné à Marseille, peuchère ! Mais te l’auras compris même chi j’n l’ai pon dit. Com’ cha s’ra in studio, in ch’contint’ra d’mette des vues in arrière plin. Cha ching’ra d’ches décors kitch qu’in met habituell’mint. J’veux bin ête l’présintatriche. D’toute fachon, te n’y perdras pon à ch’chinge. Pach’qu’eune Marie Toutoule alle vaut bin mieux qu’un Benji et qu’un Nikos réunis ! Alors, merchi d’avinche pou tin soutien et pinse à ches moteurs d’arquerque…