Chalut mes gins ! Ch’est eune s’maine qui ardémarre chous un ciel gris. Cha n’armonte pon ch’moral mais i fot bin faire aveuc.  I règne eune chertaine mélincolie et in s’met à pinser à eune aute époque. Eune époque d’inchouciance d’ù qu’in avot l’impréchion que ch’monte i tournot pus rond qu’à’ch’t’heure. J’avoue même que j’sus d’eune humeur empreinte d’nostalgie…

Enfin, in n’va pon braire insimpe, j’te rassur’te. D’autint qu’in mettint un tite com’ ch’ti-lal, trinte cintimètes d’bionheur, cha n’coll’rot pon ! Oh ! J’in vos qui ont l’echprit mal tourné et qui ch’dis’tent : Cha, ch’est l’meilleu ! Marie Toutoule alle parl’te d’capotes dins sin préchédint artique et v’là t’y pon qu’alle sort trinte cintimètes d’bionheur… Nin, mes gins, ch’est vrai, j’auros pu faire l’biographie d’Rocco Siffredi mais i n’s’agit pon d’cha. D’jà, pou t’gouverne, cha n’li fait pon trinte cintimètes ! Cheuls-lal, ch’est l’diamète d’ches vinyles d’intin. Pach’qu’in a bieau ête à l’heure du tout numérique, pus qu’jamais, ches disques is arvienn’tent et in ch’les arrach’te com’ tous ches produits d’collection.

L’preuve in est, ch’est qu’cheule foire aux disques, à Marcq ch’ouiquen, com’ tous ches ins, a été un véritape succès. Ch’est tros chint mille vinyles qui attindotent ches visiteurs. Ou, pus exact’mint, leux futurs propriétaires. Ch’est chertain’mint ch’qui m’rind un peu nostalgique à’ch’t’heure. L’timps d’ù qu’in avot eune grinte pochette dins ches mains. D’jà, in avot l’impréchion d’in avoir pou sin argint ; eune bielle photo su un cartonnache épais. Pis, in faisot glicher délicat’mint eune fine pochette in papier qui cont’not l’objet. Com’ eune pierre précieusse dins eune tiote bourse in v’lours. V’not alors l’instint d’ù qu’in posot aveuc précaution ch’disque su l’platine. In ch’saisichot du bras et in posot ch’diamint su ch’bord dins ch’t’amorche du sillon. Ouais, mes gins, com’ aurot pu l’canter Marilyn, ches diamints is étotent auchi l’meilleu ami d’ches vinyles.

Alors quind ch’CD i a imposé ch’loi, in aurot pu pinser qu’ches disques is allotent faire trinte-tros petits tours et pis s’in von’tent. Bye-bye auchi ches quarinte-chinq tours ! Bonjour ches singles et ches CD deusses tites. L’ère du polycarbonate a sonné l’glas de ch’vinyle. In claironnot haut et fort qu’in avot affaire à eune nouvielle technologie qui s’ra cor’ lal bin après no. In sait, à’ch’t’heure, qu’i n’in est rin. Et que pou un CD qu’in t’a promis inusape pou bin des années, chouvint tu t’artreuves aveuc un tiot miroir rond, au bout disse ins, qui finira ch’vie in d’chous d’verre. Pach’que, lorch’qu’in n’sait pus lir’te du numérique, in n’a pon l’drot à quéques craqu’mints supplémintaires com’ avint, quind ch’disque i étot usé. Nin, in a l’drot à un gros plintache d’lecteur qui n’sait pus à quel bit ch’vouer !

Pindint cheule longue traversée du désert, ch’vinyle i n’a jamais quitté l’mémoire d’ches vrais collectionneurs et d’ches vrais amateurs d’musique. In les a chouvint laichés dormir au fond d’un placard mais in n’les a jamais vraimint oubliés. I fallot garder très précieus’mint ches platines ch’i t’prenot l’invie d’acouter ches viux disques. Pach’que, à part pou ches DJ, in n’fabriquot pus ches viux apparels et ch’étot bin l’problème. Mes gins, ch’est eune époque révolue. Ch’qui prouv’te bin l’regain d’intérêt pou ches galettes.

A’ch’t’heure, in t’proposs’te même d’pus in pus d’nouvielles platines. L’technique alle a évolué, chertes, com’ tout l’ress’ d’el technologie. Ches nouvieaux modèles proposs’tent des connexions USB que te peux brincher su tin manicraque informatique. Pach’que ch’est très souvint li qui est l’cintre nerveux d’tin système audio. Mais in peut égal’mint treuver des platines vinyles aveuc un graveur CD intégré et même un convertisseur em’pétros. Eune fachon com’ eune aute d’régler ch’conflit d’ches générations. Ainchi, tes viux disques, te peux in faire eune copie numérique que te peux imm’ner n’importé d’ù aveuc ti. Et cha, même chi te n’es pon un as d’l’informatique.

Mes gins, te fermes ches zis… Te les intinds ches viux groupes des années soissinte qu’in a oubliés. Ches tubes populaires com’ ch’ti aveuc lequel j’cache chouvint ches pids à min inquêtriche Bridget Columbo à qui j’dédie Georgette Plana et ch’Riquita. A n’in pon douter, ches sillons is von’tent cor’ no importer dins ch’monte merveilleux d’el musique pou un biout d’timps. A’ch’t’heure, ch’bionheur i n’tient pus seul’mint dins dousse cintimètes. I li in fot trinte et trinte-tros tours et pis s’in arvienn’tent…