Hola mi gente ! Pardon, j’voulos écrir’te chalut mes gins, te dos bin t’in douter. Aveuc quo que j’viens d’lir’te, j’in perds min ch’ti ! Commint qu’ch’est qu’cha va ti’z’aute ? T’as p’t’ête mau à ches queveux… Cha, ch’est l’effet s’condaire du Beaujolpif quind te prinds pus qu’el dosse prescrite ! Alors, j’in vos d’jà qui s’dis’tent qu’i fot soigner ch’mau par ch’mau. Cha, ch’est ti qui vos. Mais chi te l’as armarqué, i y avot gramint d’bions hommes in bleu dins ches rues, hier soir, et i fot s’attinte à in vir cor’ à’ch’t’heure ! In appell’te cha d’el prévinchion… Mi, j’appell’te cha l’princhipe d’ches vasses communicints. D’un côté, in vid’te ches caiches d’pinard. D’l’aute, in rimplit ches caiches d’l’Etat !

Vaya, nos pagamos un paseo en España ! Cha y est, cha m’arprind cor’ ! J’voulos écrir’te : Allez, in s’pay’te eune balate in Espagne ! In a b’soin d’un tiot cop d’caud et in peut echpérer qu’i y fait gramint pus bieau qu’ichi. D’autint qu’cha cauffe vraimint de ch’côté d’Valence ! Alors, com’ in est vinderdi et que, d’main, i y in a gramint qui von’tent faire ch’fièfe du sam’di soir, in va aller vir quo qui ch’pache dins eune discothèque ! D’autint qu’cha crée des armous dins ches pouvoères publics ibériques.

In a organisé eune méga-soirée ! Cha, cha n’a rien de chpécial’te. Dins ches discothèques, in est com’ dins n’importé quel commerche. In fait d’ches cimpagnes d’promo pou attirer l’chalind ! Alors, in nomm’te cheule soirée « Pretty Woman », in hommache à ches femmes. Ichi, ch’est souvint intrée gratuite pou ches femmes. Lal, in organis’te eune tombola aveuc un prix d’intrée d’vingt euros. Et toutes ches intrées alles te donn’tent l’drot à faire partie d’el tombola. In proposs’te, in gros lot, eune chirurgie plachtique mammaire d’quate milles chinq chints euros ! Ouais, mes gins ! T’as bien lu : L’gros lot, ch’est eune paire d’lolos !

Mi, j’treuve qu’in va un peu trop loin et j’sus d’accord aveuc ches autorités qui veul’tent ouvrir eune inquête pou atteinte à l’dignité d’ches femmes. J’sus affligée qu’in puiche banaliser eune intervinchion chirurgicale à ch’point-lal, mais cha m’fait quind même rigoler ! Bin, forchémint, i n’va pon y avoir qu’des femmes à cheule soirée. Te t’imagin’tes, ti, qu’cha sot un homme qui gagn’te ch’gros lot ! Quo qui va n’in faire, d’ches lolos in plachtique ? Des serre-lifs pou mette su eune étagère. Te m’diras, in peut vir cha pratique et cocache. Churtout chi ch’est eune collection d’magazines d’charme ! Te cros, ti, qu’ches patrons d’el discothèque is von’tent accepter d’échinger ches lolos conte l’dernier modèle d’biloute à tiête chercheusse ? Ch’ti qui est livré aveuc un boution qui l’met in marche à l’d’minde ! Eune parinthésse, mes gins. Te sais commint qu’in appell’te ch’t’instrumint que ch’chirurgien i imploie pou opérer l’serviche tros pièches d’ches hommes ? Un bistouri à bistouquette ! Te t’attindos à quo ?

Pis, même ch’i n’y a qu’ches femmes qui peuv’tent participer à ch’tirache. Chi cha quée su eune copie d’Jane Birkin, cha li s’ra p’t’ête utile. Quoqu’cha li fache des frais in pus. Is aurotent pu pinser à un bonnet garni, pardon filet, aveuc ches lolos et eune série d’soutifs. In est in crisse, même in Espagne, et ch’pouvoère d’achat i n’va pon bin miux qu’ichi ! Mais chi cha quée su eune qui est d’jà bin avinchée dins l’alphabet d’ches bonnets. Nin, j’te vos d’jà pinser à M ! Te confonds, mes gins, Boney M, ch’est un groupe disco !

Quo qu’alle va n’in faire d’sin lot d’lolos ? Les mette d’côté pou ches viux jours quind cha s’ra chef d’œufre in péril ? J’echpèr’te que ch’date d’péremption alle va loin pach’que ch’est souvint disse ins avint d’arpacher à l’casse départ ! I vaut miux pou alle qu’alle sot d’jà dins l’catégorie d’ches femmes qui sont pachées des orelles d’Mickey à cheules d’Pluto ! Quo, cor’ ? Te n’vos pon pouquo j’te parl’te d’Mickey et Pluto, ch’est cha ? Pourtint, te m’connos bin, à’ch’t’heure ! Te sais que j’n’peux pon m’impêquer d’faire des allusions et des jux d’miots… I n’t’est pon v’nu à l’idée que ch’est des héros d’déchins animés. Que te pourras auchi écri’te des cheins aminés. Pisqu’is pach’tent de ch’t’état gonflés à ch’t’état plats, pis l’inverche après cheule opération !

Mi, ch’est déchidé ! Ichi, in va organiser eune grinte tombola aveuc com’ gros lot eune greffe d’cervieau ! Pach’que cha, au moins, cha risque d’servir à gramint ! Quoque min problème sot qu’i faudra que des gros lots pach’que cha n’est pon les cindidats qui minqu’tent !