Chalut mes gins ! Com’ ch’est l’début d’el s’maine, je n’voulos pon traiter d’un sujet d’ù qu’in va cor’ sortir ches anti-dépresseurs. Nin ! Dins tout ch’t’imbroglio d’crisse, j’voulos eune cosse d’pus ludique. Qui no f’rot bin rigoler mais pon à nos dépinds. Pou eune fos, cha n’no coût’ra rin. In n’va pon d’voir mette l’main à l’poque pou sortir ches quéques cintimes qui y étotent cor’. Ch’est eune bionne nouvielle ! Mais mi, j’sus com’ cha, royale ! Pardon, j’ai cru que j’étos su scène de ch’Zénith.

In plinte ch’décor chez TF1^er qui comminche à perte gramint d’clients. Cha, ch’est eune grinde première. Te peux rigoler aveuc grinde première en parlant d’el première chaîne. Ch’est gratuit, ch’est offert par l’baraque ! Quind t’alleumos tin poste vers ches vingt heures, te savos toud’chuite d’ù t’étos. A tape, in général, in train d’dir’te : « Chéri(e) pache-me l’sel, ch’est poivre d’abord… » Bion, in rigole chi in veut, cheule blague alle étot facultatife. Infin, à’ch’t’heure, quind t’alleumes, te n’as pus l’poivre d’abord ! Te n’pourras pon m’contredire. Mais d’ù qu’ch’est qu’i étot pacher min Patrick ? Patrick ! Cha m’arvient tout seu ! Mes souv’nirs d’concert aveuc l’aute. Vingt dius, i fot que j’arprenn’te mes eschprits…
Donc, in zappe un tiot cop. Nin, ch’est David ch’ténébreux, ch’est l’deusse. Li, te l’arconnos fachil’mint. Ch’est l’seu qui t’annonche eune bionne nouvielle com’ chi ch’étot eune catastrophe. Infin, à s’décharge, in n’est pus trop habitué à annoncher ches bionnes nouvielles. In finit par n’pus savoir commint qu’cha marche, ches zygomatiques ! Cor’ un cop, ch’est pus bielle l’vie, cha fait tros, etc. In fait, in a découvert qu’i y avot d’autes boutons su cheule zappette.
Mais, cha posse un problème à ches gins d’TF1^er. Is avotent tout missé su eune bielle Ferrari et is s’artreuvent aveuc eune carette sins permis. Bin, in peut dir’te cha com’ cha. Cha n’avinche pon vit’ dins ches côtes d’Audimat. In peut même dir’te qu’cha arpart in arrière ! In tout cas, cha causse des soucis à ches chefs. Is vont avoir ches nerfs même chi i y in a un qui s’appell’te Dacier ! D’pis, t’as Dame Chazal ; mi, j’vos « claire » dins sin ju. Alle in profite ches ouiquen’z pou faire grimper l’Audimat. Infin, alle a trop ravisé ches émissions d’tévé réalité car alle in fait gramint. J’n’sais pon chi t’as vu sin journal aveuc ch’quemisse indiscrète… In voyot sin soutien-gorge par trinsparinche avint un arportache et après, alle ne l’avot pus. Pourtint, alle n’avot pon pou invité David Copperfield. Ch’est p’t’ête cha qui fait grimper l’bébête. Nin, j’n’pinsos pon à cha, mais à ch’t’Audimat !
I y a un adache qui dit qu’in n’ching’te pon eune équipe qui gagn’te. Cha dot bin faire rigoler ch’ti qu’in a mis à l’porte pach’qu’i étot trop viux pou chertains. Com’ i dit min camarate garagiste, un viel utilitaire bin entr’tenu, cha peut faire pus d’kilomètres qu’eune bielle Ferrari. In pus, cha t’coûte moins quer ! Mi, j’ne s’ros pon étonnée qu’in treuve bientôt eune Ferrari à vinte. Alle pach’ra cor’ par l’canal (+) d’ù qu’alle vient, pou finir perdue d’vue com’ Jacques Pradel. Ch’est nin grafe. In appell’ra Julien Courbet, qui a toudis l’même numéro d’portape, même su eune aute chaîne, pou qu’i treuve un médiateur pou l’arprinde dins sin état. In f’ra eune grinde émission d’variétés, présintée par Nikos Imagasse, d’ù qu’in li f’ra lir’te su l’prompteur que Ferrari alle étot eune deussième main. Qu’sin premier propriétaire étot un indien. Hugues ! Même chi cha n’est pon écrit ! Vu qu’i n’met pon ches leunettes que Johnny i li a offerts, aveuc sin bion d’réduction optique 2000… Invoyez ches euros, qu’i dira, par téléphone et par essémès. Ch’est pou eune bionne causse, sauver TF1^er in produisant un vrai programme. 

Ah, mes gins ! I dot y in avoir qui s’marre d’là d’ù is sont. L’grind Léon Zitrone qui doit y l’prix d’Longchamp. J’l’intinds dir’te : Mesdames, Messieurs, ch’est incroyape ! Eune Ferrari ress’ in raque alors que tous ches autes is li pach’tent d’vint ! » Auchi Pierre Sabbagh, aveuc un nouvieau au théâte ch’soir. Eune comédie d’boul’vard : « T’Ferrari alle est mal barrée ! » Même cor’ Armand Jammot aveuc ches dossiers d’l’écran : « Ferrari, viches cachés chous eune bielle carross’rie ». Com’ film, pou illustrer cha, l’corniaud, verchion 2008. Aveuc Jacouille Clavier, qui arprind l’rôle d’de Funès. I arrif’te aveuc l’carette blindée qu’i aura impruntée à sin ami Nicolas. Dins l’rôle d’Bourvil, ch’est Dacier, in personne, qui sortira d’el Ferrari à mitan bousillée in disant : Bin, à’ch’t’heure, alle va marcher gramint moins bin ! » That’s all folks ! Mes gins… Ch’est d’el tévé, quo !