Chalut mes gins ! D’pis hier, j’cache d’quo qu’in pourrot parler qui, pou eune fos, t’ardonn’rot un tiot sourire au coin d’tes lèfres. Quo ? Chi j’avos invie d’t’faire braire, ch’est pon ches sujets qui minquent. J’pourros t’parler d’l’augmintation d’ches impôts locaux, par eximpe. Quoque cha peut faire rir’te pach’qu’in s’doutot bin que, sins élections en vue, cha allot forcémint monter ! J’pourros auchi t’parler qu’in risque d’piquer tin stock d’nozettes su tin livret. Nin, mes gins, à’ch’t’heure, in va faire eune pausse dins l’sinistrosse…

J’in vos d’jà qui s’dis’te : Millard ! Marie Toutoule, d’quo qu’te peux no parler d’drôl’te dins un momint d’crisse parel ? Ch’est vrai, i fot bin raviser ches tiotes lines pou treuver. Mais i y a un évèn’mint importint qui ch’pointe à l’horizon télévisuel. Un truc que, chi te paches à côté, te n’vas pus pouvoir vifre ! Mi, cha m’a fait rir’te. J’te l’annonche brut d’décoffrache : TF1^er i fiête ches vingt ans d’ches fux d’l’amour in invitant ches acteurs américains à tourner quéques épisotes à Paris. Te vos, cha révolutionne t’vie, mes gins ! Mi, min cœur i bat à chint à l’heure…
Commint qu’in peut présinter cheule série ? Pou mi, ch’est eune série fantastique ! Nin, pon fantastique pach’que j’treuve cha bin mais pach’que ch’est d’el science fiction. Au détour d’un zapping qui allot l’am’ner su TF1^er, Marie Toutoule alle les a vus. Is étotent lal et is avotent pris apparinche humaine. J’in ai cor’ frod dins l’dios ! Ch’est qui qui n’a pon arfermé ch’frigidaire ?
Allez, in va ardev’nir chérieux. Ches producteurs d’ches fux d’l’amour is ont invinté eune unité d’timps vraimint particulière. D’ailleurs, chi te veux in ête convaincu, v’là des indiches. Pou cha, j’ai eu recours à ches travaux d’investigations d’min inquêtriche Bridget Columbo, com’ d’habitute. Com’ ch’traval i étot vraimint arasint. Te parl’tes pus d’quate mille épisotes ! In a d’mindé l’concours d’sin cousin, li-auchi inquêteur, Charles Locolmèche ! V’là ch’qu’in peut dir’te pou prouver qu’ch’est pon l’même monte mais des montes parallèles, in somme.
Quind i y a deusse acteurs qui parl’tent in mingeant leu tiot déjeuner, éclairés par l’rayon d’solel du matin. L’plin suivint, t’in as d’autes qui sont au restaurint. En train d’souper aux candelles et ch’est noir’te par l’feniêtre ! Te pourros t’dir’te. Cha n’a rin d’esstraordinaire. Dins ches films, in n’peut pon montrer minute par minute. Ch’est pon l’même jour. Ouais, ch’est vrai ! Dins vingt-quate heures, Jack Bauer, i n’va jamais faire pipi. Sauf que, dins ches fux d’l’amour, l’plin d’après, in artourne au tiot déjeuner d’ches premiers et qu’ch’est l’même phrasse in cours ! In est dins l’quatième diminchion. Ch’tévé alle a pris possession d’tin eschprit… Cor’ pus drôl’te. Quind te ravises quéques minutes l’lundi, par eximpe. Sins l’faire essprès, te ralleumes t’tévé l’vinderdi, pile au momint d’ches fux d’l’amour. T’arquées su ches mêmes acteurs qui finiss’tent leu phrasse ! T’es vraimint dins l’quatième diminchion. In a invinté miux qu’l’inregistreur d’ù qu’te peux raviser in différé. Lal, te n’as rin à faire ! Ch’est automatique !
A’ch’t’heure, ches deusses limiers et mi, in a mis in évidinche aute cosse : l’vieilliss’mint. I est différint auchi in fonction d’l’âche qu’ches acteurs is ont. Su eune périote, qui pou nou’z’autes représinte eune s’maine, t’as ches gamins qui pachent d’el couche-culotte à l’université ! Incroyape ! Mais ch’est parel à l’inverse, quind t’es dins ches viux acteurs. Cha fait trinte ins au moins qu’cha existe à la tévé américaine. Cheuls qui étotent d’jà ches papis et ches mamies, à l’époque, is sont toudis lal, frais et dispos. Te n’prinds pus d’âche… I faudra qu’in s’rinseigne su l’marque du produit miracle qui impêque l’âche de v’nir !
In peut auchi armarquer des transmutations d’personnes. L’mardi, t’as l’file d’l’un qui est com’ cha et l’jour suivint, ch’est pus l’même. Alle a dû s’faire kidnapper par ches extra-terrestres d’eune aute diminchion ou d’eune aute série, et in l’a rimplachée par eune aute. Com’ in n’a pon réuchi à cloner s’guiffe, in l’a laichée dins sin état d’origine !
Infin, com’ i fot bin vinte françès quind in tourne in France. In a d’mindé à ches américains d’mette des guess stars françésses. In n’peut pon dir’te qu’cha s’ra in vedettes américaines, pisque ch’est américain et qu’ch’est des françès. A’ch’t’heure, qui qu’in peut printe pou cha ? In peut d’minder à Dame Ségo et Martine d’Lille d’faire eune apparition mais cha jett’rot un frod dins l’série pach’qu’in laich’rot l’porte du frigidaire ouverte. In peut d’minder à Carla et Nicolas 1^er, is ont d’jà gramint d’esspérïnche aveuc ches américains. Nin, cha n’est pon une bionne idée, même chi tout ch’monte-lal, ch’est des sacrés acteurs. Alors, in oufre ches placards. Te sais, lal d’ù qu’in stocke ches pipoles qu’in n’vot pus. In n’sait pon chi is sont réfrigérés. I faudra qu’in s’rinseigne pou savoir chi in n’va pon chinger cheule esspression et officialiser l’fait qu’in met au frigidaire à’ch’t’heure.

Donc, in a vit’ treuver un David Ginola, pon trop mal conservé qui étot in minque d’pub et, churtout, qui accepte d’montrer s’guiffe lad’dins. Mais I fot auchi eune femme ; ch’est miux et ch’est l’parité. Alors, ch’est lal que TF1^er i a du génie. Com’ ches fux d’l’amour is sont ravisés par l’fameusse ménagère d’pus ou moins chinquinte ins, i fot treuver l’moyen d’rajonnir l’clientèle. In n’va pon les printe aux bercieaux, ch’est pon eux qui ont ches sous pou acater quo qu’i y a dins ches pubs. Mais ches ados, cha, ch’est bin ! Is arriv’tent toudis à avoir quo qu’is veul’tent. Alors, ch’est fait, in imbauche Lorie ! In pus, ches Américains is pourron’tent la découfrir et p’t’ête qu’alle f’ra eune tournée chez eux. Alle s’ra moins loin d’sin Garou. Te pinses qui von’tent la garder ? Nin, çha, ch’est d’el science fiction ! Pindint, ch’timps-lal, mes gins, in n’est pon sauvé aveuc ches programmes tévé. Mais ch’est rin, in va quind même garder eune positife attitute !