Au pain chec et à l'ieau !

Mardi 30 septembre 2008 2 30 /09 /Sep /2008 18:38

Au pain chec et à l'ieau !

Chalut mes gins ! J’ai eu gramint d’mau à m’déchider à écrire qué cosse à’ch’t’heure. J’n’savos pon quo qu’j’allos pouvoir t’raconter. D’autint que min moral i n’est vraimint pon à top ! Te sais, Marie Toutoule alle n’est pon faite aute’mint qu’ti. Mais chi, mi auchi, j’em laiche aller à l’grinde déprime, alors te vas m’faire l’guiffe. Ti qui viens ichi pou rigoler un bion cop. Donc j’ai mis in application l’princhipe d’em grinde copine Bridget Columbo, qui consiste à s’mette un grind cop d’pid dins ch’derrière. Même chi cha n’est pon simpe, com’ alle dit.

Y a plusieurs trucs qui sont quind même qués chous mes zis. Dont ch’que j’peux d’jà nommer : l’trossième saison de « pus taxe la vie ». Infin, chi in in crot ches dernières nouvielles, cha a été déminti par Roselyne, Princesse à sabots rosses. Alors in va dir’te que ch’est cor’ in tournache. Mais ch’est l’continuité, mes gins. Te t’souviens, l’boîte à rumeurs, j’avos app’lé cha ! J’n’sais pon qui est à l’origine d’cha mais is veul’tent mette eune taxe su ches produits qui fon’tent grossir. Alors, dins l’princhipe, faire que ches gamins is n’soient pon obèses, ch’est plutôt bin. In n’prévoit jamais assez vit’. Mais pacher d’eune TVA de 5.5% à 19.6% pou pénaliser ches produits riches in gras et un chuque, cha peut paraîte bizarre. D’autint que chi j’sors m’calculette et que j’ajoute 14% à ch’prix d’un paquet d’chips, par eximpe, i arrife loin derrière l’prix d’un kilo d’peummes ou d’un kilo d’tomates ! Te cros réell’mint qu’ches jonnes is von’tent préférer croquer dins eune peumme au lieu d’piquer ch’sachet d’chips dins l’placard d’el baraque. Nin, j’n’in sus pon convaincue. D’même, j’n’sus pon convaincue que ches parints, qui fon’tent ches commissions, is n’von’tent pus savoir calculer du jour à lind’main !

Après l’taxe pou rinte écologique, alors que cha devrot ête un geste naturel, ch’est l’taxe pou faire maigrir ! A t’mote, mes gins, te cros qu’in va no vinte cha par pack d’chisse, com’ ches cannettes d’soda ? P’t’ête qu’in verra cha in couverture d’ches magazines avint ches grindes vacinches prochaines. Essayez ch’nouvieau régime qui fait mincir. Ch’est l’révolution in France ! In appel’te cha l’pain sec et l’ieau. Quo, mes gins, cha n’te fait pon rir’te ? Pourtint à force d’mette ches taxes, qui ch’est qui maigrit toudis ? Ch’est tin porte-monnaie ! Alors tin budget bouffe, cha s’ra uniqu’mint pou acater du pain et d’l’ieau. In f’ra d’eune pierre plein d’cops. Ch’est écologique, in n’s’ra pon obligé d’minger dins ches assiettes in plachtique et ches gob’lets. Cha n’f’ra pon grossir. In pus, tin volume d’popos i s’ra in baiche ! Moins d’popos, ch’est miux auchi pou l’planète !

Vingt dius, mes gins, j’viens d’em rinte compte que, com’ in dit, trop d’impôt tue l’impôt. Bin, ch’est mathématique. Com’ i n’y aura pus d’vinte d’tous ches produits taxés, cha arvient à dir’te que ches sous is n’von’tent pus rintrer dins ches caiches ! Zut, flûte, caca boudin ! Chi t’es cinéphile, te sauras d’ù qu’alle sort cheule réplique !

V’là, mes gins, in n’a pus l’chox. I fot qu’in aide un tiot peu ches comiques pou treuver eune source inépuisape d’sous à piquer. Alors, Marie Toutoule alle va leu apporter eune idée à creusser. Chi in taxe l’bêtisse et l’conn’rie, j’sus sûr’te qu’in s’rot in excédint budgétaire ! A’ch’t’heure, j’vais juss’ terminer par un canteur à embonpoint, Carlos, qui s’rot chertain’mint très amusé d’vir cha. Com’ cheule idée alle a été démintie par Roselyne, in va finir par m’toutoulerie du jour in canchon aveuc m’nouvielle émission l’Politishow. Y a pon l’musique mais j’sus sûr’te que te vas savoir quo qui s’agit…