Chalut mes gins ! J’ai eu bieau éplucher ches infos pindint l’ouiquen, in n’peut pon dir’te qu’i y ait d’quo grimper à ches ridieaux et d’crier waouh, cha ch’est eune bionne nouvielle ! Nin, in s’rot pus dins l’catégorie à s’invoyer eune tonne d’chocolat noir’te pou éviter l’grinde déprime… Alors i fot qu’in s’armonte ch’moral insimpe mais, j’t’avoue, mes gins, qu’cha n’est pon gagné d’avinche. Mi auchi, j’comminche à intamer m’réserve d’cacao à choissinte-disse pou chint ! 

Heureuss’mint qu’in a eu gramint d’cosses qui sont v’nues d’nos politiques. Cha, ch’est eune grinde nouvieauté in France. Pou armonter ch’moral des Françès, is no ju’tent un spectaque comique. Histoire qu’in n’oublie tous ches malheurs qui sont collés à not’ derrière com’ l’série d’cass’roles à l’carette d’ches jonnes mariés ! A’ch’t’heure, in peut auchi se d’minder chi pindint qu’in no parl’te d’ches essploits d’comique troupier d’ches uns et d’ches autes, in n’essay’te pon d’no indormir pou qu’in pache à côté d’ches vrais problèmes. Com’ cheule crisse fininchière ou ch’chômache qui armonte pus vit’ qu’i n’est déchindu ! Ou même, car lal auchi, mes gins, j’ai bin peur que j’fasse cor’ un artique ches prochains jours et que j’sos obligée d’te présinter l’saison tros de « Pus taxe la vie » !
Alors, in va profiter honteuss’mint d’ches comiques avint qu’in no taxe su cha auchi. Chi j’te dis qu’in a réouvert l’porte du frigidaire, te v’là auchitôt au courint d’quoi qu’in va parler. Ouais, ch’est d’jà l’arprise, com’ chi tertous is avotent fait ches rappels à ch’que j’avos écrit aveuc : politiqu’mint incorrèque. Com’ quo in peut dir’te que j’ai chertain’mint des dons d’voyanche cachés et que je n’el savos pon cor’ ! J’y avos fait allusion mais je n’m’attindos pon à ch’qu’in no fasse eune chuite auchi rapid’mint. Ch’qui est bin, ch’est que ch’est nin du récauffé ni du décongelé. Nin, in a l’drot à un nouvieau sketch, de l’inédit.
In va plinter ch’décor. Quind j’dis cha, j’in mesur’te ches mots car ch’est vraimint un spectaque qu’in a donné à ch’Zénith. Attintion mesdames z’et messieurs, dins un instint, cha va commincher. Installe-te dins tin fauteul bin gintimint. Chinq, quate, tros, deusse, un, zéro, tous ches protecteurs von’tent s’alleumer… Dame Ségo qui, j’te rappell’te, est ex-Dame d’l’aute pays du fromache, alle a voulu faire un politishow à l’américaine. Alle a quind même fait gaffe à n’pon mette eune rope rouche pou n’pon ête confondue aveuc Anne Roumanoff. Chinon, in artreuvot ches ingrédients parels : un micro sins fil, pon d’pupite et un prompteur. Te sais, ch’est com’ i fait Nikos Imagasse dins l’Star’Ac. I lit un écrin géint d’ù qu’in a écrit tout quo qu’i devot dir’te, même ches bêtisses. Alle a chertain’mint pris des cours d’théâte aveuc un prof car alle a auchi utilisé l’eschpache in marchint d’drote (rar’mint) à gauche (pus souvint) d’el scène. Alle a auchi gramint ravisé dins ch’mitan. Mi, j’n’sus pon sûr’te qu’ch’est pach’que ch’prompteur i étot lal… Ch’qu’in peut dir’te ch’est, in a querre à alle ou qu’in n’a pon querre à alle, mais alle y a mis tout sin cœur. Aveuc des slogans et un ju d’bras ponctuint cha, je n’t’explique pon ! D’ailleurs, chi t’avos eu eune coupure d’son, in aurot dit l’grind-mèche d’un pasteur télévangéliste !
Dame Ségo, royale (t’as l’drot d’rir’te au ju d’mots), alle a invité ches admirateurs et même Martine d’Lille. Et in arcomminche dins ches tiotes phrasses de ch’duo que j’avos d’jà app’lé ches VamPS. In oublie un timps ch’premier sketch du frigidaire et ches idées décongelées. Nin, à’ch’t’heure, in invite Martine in disant que ch’musique alle adouchit ses mœurs. Pou preufe, i a un concert gratuit ! Martine, qui n’a pon perdu sin sins d’l’à propos rétorque qu’alle n’savot pon pouquo alle disot cha pisque tertous qui la connaiss’tent treuvent qu’alle est quéqu’un d’doux et gintil ! A ti d’vir quelle réplique te treuves l’pus drôl’te ! Pou Dame Ségo, t’invoies un. Pou Martine, t’invoies deusse… 

In pourrot dir’te un partout, l’balle à mitan, in conclusion. Ch’est l’premier truc qui m’pache par l’tiête ! Mais mi, j’sais d’jà qui est in train d’compter ches points. Ch’est bien sûr’te Bertrand d’Paris, Empereur de ch’byclou des villes. A m’mote, i dot bin rigoler d’vir ches deusse concurrintes ch’crêper l’chignon. P’t’ête qu’i a ouvert eune guitoune pou printe ches paris, à Paris, et qu’i ch’prind pou un book. Même chi cha dot l’rinte chèvre d’vir un spectaque parel ! Allez, in misse su Gisèle ou Lucienne. Pardon, mes gins, j’em sus laiché importer par ches Vamps. J’voulos dir’te Ségo ou Martine, ches nouvielles VamPS… les jux is sont faits, rin i n’va pus ! T’armarqu’ras, mes gins, que « rin i n’va pus », cha n’a jamais été auchi vrai qu’à’ch’t’heure…