Chalut mes gins ! J’avos l’invie d’parler d’un sujet plus grafe, mais in arlisant un article politique, j’sus arquée su l’tiote phrasse de Dame Ségo, Première du nom, ex-Dame de l’aute pays du fromache, qui parlot d’mette au frigidaire des trucs quind i fallot les laicher d’côté ! Cheule phrasse alle m’avot d’jà bin faire rigoler quind j’l’avos intindue à la tévé. Bin, in apprind à l’école qu’in n’dot pon dir’te frigidaire, ch’est eune marque, mais réfrigérateur !

A’ch’t’heure, quind in est politique, in a l’drot d’faire des erreurs. Chi, mes gins, in in d’meure pon moins humain. Quoque… D’ailleurs, ch’est à s’d’minder chi in n’a pon l’drot d’in faire pus qu’ches gins com’ no. P’t’ête qu’in lifre un quota aveuc ch’tite d’politichien. Et ch’est proportionnel, pus qu’t’es haut dins l’équelle, pus tin quota i grimpe com’ l’rouche du thermomète in plein solel ! J’avos invie d’écrire panoplie au lieu d’tite. Bion, ch’est fait à’ch’t’heure ! Ti, te s’ras ministre. Tiens, min gars ou m’file (parité, mes gins), v’là l’cataloque in disse volumes d’ches erreurs qu’in peut faire. Commint, te n’as pon am’né t’brouette ? Tint pis pou ti, t’as des bras ! Chi t’in veux eune chpéciale, d’erreur, qui port’ra tin nom, in peut in parler. In n’est pon à quéques paches in pus pou l’prochaine édition (cha rime aveuc élection). Mais te n’essagères pon, in n’a pon ches moyens d’arfaire un onssième volume ! Ches caiches alles sont vides com’ ches poques d’ches Françès…
Bion, soyons chérieux, mes gins. Infin pon trop pach’qu’in va vit’ s’innuyer ! In n’est pon lal pou cha… Alors j’ai continué m’lecture. Cha d’vient drôl’te l’politique quind te lis aut’mint. Même chi te t’rinds compte que ch’qui t’prind au nez cha n’va pon mette du bieurre dins ches chicons braisés. Te t’plais à treuver l’situation cocache et te t’marres ! Auchi, j’ai cor’ bin rigolé quind j’ai arlu l’réponche d’Martine d’Lille, Grinde Cheftaine d’el Capitale des Flandres, qui disot qu’au momint d’ù qu’i fallot donner d’el qualeur à ches militints, alle n’étot nin sûr’te que ch’frigidaire sot eune bionne solution ! Comique, hein ? Ch’est ch’qu’in appell’te avoir un sins de l’à propos !
Mi, j’auros été Martine, j’em s’ros permisse d’poucher pus loin m’tiote phrasse in disant, toudis dins l’à propos d’el scène, qu’au momint d’ù qu’i fallot donner d’el Calor à ches militints, alle n’étot nin sûr’te que ch’frigidaire sot eune bionne solution ! Ch’est dins l’équilipe des cosses ; un caud pou un frod. In cuissine, in appell’te cha un caud-frod, ch’est in général pou l’volaille. N’y vos aucune allusion déplachée, mes gins. In parlache commercial, in peut dir’te qu’ch’est d’el pub déguisée pou l’nouvielle Princesse du grille-pain, Jessica, épousse du Prince Jean 1^er. Ches deusse marques alle sont dins ches rayons des magasins qu’alle va hériter. Nin, n’y pinse même pon… Ch’est nin l’signe d’un rapproch’mint drote-gauche qu’in pourrot dir’te in parlache politique !
Alors, j’n’sais pon ch’qu’i fot in pinser, mes gins. P’t’ête qu’alles sont in train d’no arjuer un nouvieau duo d’comiques com’ ches Vamps. Te armarqu’ras que min chox i n’est pon l’fruit de ch’t’hasard. Mi auchi, j’ai l’sins de l’à propos. Quind je chosis Vamps, in peut l’écrire VamPS et à force d’faire du bruit dins ches médias, in pourra l’écrir’te Vent PS dins un av’nir proche. Toudis i est que Dame Ségo alle n’a pon dit sin dernier mot. Cha ! Alle n’étot pon interviewée par Jean-Pierre Foucault. Chinon, alle aurot chertain’mint app’lé un ami. Ch’ti-chi li aurot chertain’mint proposé d’armonter ch’thermostat pou éviter eune banquisse in plein mitan d’el France. Alle aurot cor’ pu switcher che sketch, pach’que chi alle avot d’mindé l’avis de ch’public, nou’z’autes, in aurot plutôt zappé l’chaîne au lieu d’switcher ! Bref, alle n’in a rin fait. L’vint glacial, pach’qu’alle a final’mint laiché l’porte du frigo ouverte, i souffle intre ches deusse VamPS. Dame Ségo, qui a armis s’laine (admire l’ju d’mots, mes gins) pou n’pon avoir frod, alle armet un glachon dins ch’cocktail. Histoire d’bin réfrigérer l’verre d’Martine d’Lille. Ch’étot hier au Grind Journal, alle ajouta : In peut dégivrer l’PS à condition de n’pon utiliser des idées congelées !

Vingt dius, mes gins, j’in ai frod dins l’dios rin qu’à pinser à ch’que Martine d’Lille alle va sortir d’sin congélateur ! Quo qu’alle va no décong’ler in vitèche rapide in posant cha su sin radiateur Calor ? Du décong’lé, cha n’va pon plair’te à Jean-Pierre Coffe ni à Maïté ! Mais p’t’ête que cha f’ra ches choux-gras, pouchés in pleine nature, garintis chint pou chint bio, d’Bertrand d’Paris, Empereur du byclou d’ches villes. L’chuite dins un prochain spectaque d’ches VamPS, bintôt in tournée dins toute l’France aveuc : Du rififi à l’cintine…