Toutoul'Academy, acte I

Mercredi 24 septembre 2008 3 24 /09 /Sep /2008 14:54

Toutoul'Academy, acte I

Chalut mes gins ! A’ch’t’heure, in va parler musique. Te sais que j’ai querre à cha. J’acoute tout ch’qu’i quée chous dins m’orelle. Et com’ j’in ai deusse, j’acoute in stéréo ! Cha, ch’est pou rigoler, mais j’acoute gramint d’trucs. Pon forcémint des canchons qu’in intind partout. Car, mes gins, i y a gramint d’jonnes talints qui méritent qu’in parl’te d’eux.

Te vas m’dir’te : Ouais, Marie Toutoule, no auchi, in aime bin découvrir des nouvieaux canteurs. Ch’est pou cha qu’in ravise l’Star Ac. Ch’est bin, te fais grimper l’chiffe d’affaires d’Endemol. Is von’tent pouvoir payer un treissième mos à Nikos pou s’louer l’concours d’un coach in diction.
Je n’sais pon quo qu’t’in pinses mais in n’peut pon dir’te que ch’est vraimint fait pou découfrir des jonnes talints. Du moins, chertainement pon quind in t’dit qu’ch’est par casting. I suffit d’lir’te politique, pardon j’voulos écrire à drote et à gauche, pou apprinte que Mickels, ch’est l’auteur, compositeur, interprète du groupe Rive Despleen. I a été un élève d’Alice Dona. Pou mémoire, ch’est l’mère de Raphie, même chi alle n’est pon lal cheule année. Maryline, Malou, ch’est sin nom d’scène, alle cante et a d’jà fait des premières parties. Harold, te sais, ch’ti dont toutes ches mères alle voudrotent com’ fils et ches bielles-mères com’ bieau-fils. Math Sup, math Spé et ingénieur in informatique, cha fait monter tin fan club familial. Ch’est l’canteur du groupe Anesa. Joanna qui, alle-auchi, a d’jà fait les premières parties de Emma Daumas et Eve Angeli. In va s’arrêter lal, pou l’momint, car in n’sait pon cor’ tout !
In peut juss’ argretter qu’is no prenn’tent uniqu’mint pou des clients à pub. I vaudrot miux qu’in no disse, tout simpl’mint, qu’ch’est eune émission d’variétés, nin un vrai-faux concours d’nouvieaux talints ! Ah, qu’i est loin l’timps d’ches variétés à la Française de Maritie et Gilbert Carpentier ! Ch’est chinquinte-chinq minutes d’ù te n’pinsos pus à rin ; te l’laichos importer par ches canteurs qui résonn’tent cor’ dins l’tiête com’ Georgette Plana et sa Riquita. Marcel Amont et son mexicain, etc. A’ch’t’heure, t’as auchi chinquinte-chinq minutes intre deusse pages d’pub ! Car ch’est cha l’finalité de ch’ginre d’émissions.
Alors, mes gins, j’ai voulu t’faire un cadieau in t’accuellant aveuc eune canchon qui t’met du biaume au cœur. Quind j’ai acouté cha, j’ai toud’chuite eu ch’moral qui armonte. Quo qu’t’in pinses, ti ? Cha s’appell’te : I’m Free. Ch’est in chaque spire parlage, j’sais bin mais cha parl’te d’liberté. Donc, in s’en fout, cha n’a pon d’parlage particulier, l’Liberté ! Cheule canteuse alle s’appell’te Nickie, alle vient des Yvelines. Alle est sympa, dynamique et alle invoie dur’te ! Alors, j’ai déchidé d’faire m’propre Toutoul’Academy. In n’a pon b’soin d’voter, j’ai nin ingagé un huissier pou ches résultats.

Com’ un bionheur i n’arrife jamais seu, in cadieau, te peux même télécharger gratuit’mint et légal’mint sin tite, ch’lien i est ind’sous. Alle a donné sin accord ; ch’est pou ti, mes gins. Com’ cha, te pourras l’mette dins tin empétros, tin portape et d’ù qu’te veux tint qu’cha va dins t’orelle pou mette l’ambianche dins tes neurones. Et com’ t’in as deusse auchi, t’l’auras in stéréo !!!

Pou ti télécharger sin tite, te buques such' photo...