Binque ! Binque !

Jeudi 18 septembre 2008 4 18 /09 /Sep /2008 17:08

Binque ! Binque !

Chalut mes gins ! Nin, j’ne vais pon arfaire eune canchon d’Sheila. Ch’est un sujet qui, a priori, n’est pon drôl’te, mais i fot bin l’aborder auchi. Cha fait chuite à l’binqu’route d’ches binques américaines et cha no arquée su l’coin d’el guiffe. Mais, dins l’fond, quo qui va cor’ payer ches pots cassés ? Ch’est nin ches dirigeints d’ches groupes fininchiers. Ches gins-lal, cha met des sous à l’abri lal d’ù qu’personne i n’va les treuver. Nin, ch’est cor’ nou’z’autes qui allons in pâtir.

Cha fait des années que ches binques alle fon’tent l’drache et bieau timps su no vies mais alles n’fon’tent pus leu traval. Quind t’as b’soin d’argint, chi t’in as d’jà, cha va. T’as quo qu’te veux et même pus ! Chi te n’in as pon, ch’est eune aute histoire. Déposse-me 10.000 euros et j’t’in prêt’rai 5.000 ! Ch’est vrai, j’sus eune moqueux d’gins. Is von’tent quind même aller jusqu’à t’in prêter 9000 ! L’ress’ ch’est pou ches frais. Bin, cha coûte quer d’avoir eune agince à chaque coin d’rue. I fot comprinte, mes gins ! In pourrot appeler cha des préteux su gages. Dépêque-te Chéri(e), i y a Jean-Pierre Pernaut qui vient d’dir’te qu’el bourse alle a pris 0.03% . In va chez Ma Tante Bis ! Cha quée bin, alle est à sin bureau au coin d’el rue. Chi, ch’est ouvert. Y a d’el leumière su sin inseigne géinte ! In va pouvoir infin acater cheule baignoire qui fait des bulles. Dins disse ins, alle s’ra à no !

A’ch’t’heure qu’alles ont mingé not’ pain blanc et avint qu’alles von’tent auchi minger not’ pain noir’te, is von’tent durchir’te ches acceptations d’crédit. Chi te veux t’acater eune baraque, i vaudra miux qu’el mitan d’el ville alle t’appartient. Chinon, te risques d’avoir un crédit à la hauteur d’el confiance qu’is ont in ti. Ch’est à dir’te pon gramint aud’sus d’zéro. Te vas t’artreuver propriétaire d’eune bielle caravane. Et, chi l’binquier i est dins sin bion jour pach’ que l’cour d’el bourse i monte, li auchi i ravise Jean-Pierre Pernaut, i t’accord’ra un superpe mobil-home. Eune résidinche d’luxe, d’quo qu’te t’plains !

Ch’est vrai qu’i fot des garinties. Ch’est tout à fait conch’vape, même pou mi. Y a tell’mint d’truinds et d’gins roublards. Mais ches truinds, is von’tent quind même réussir à les berner, ches binques. Ch’est leu « métier » ! Ti, chi t’arrifes aveuc t’bionne foi et t’guiffe pleine d’bions sintimints, t’arpars aveuc tout cha. Nin, t’guiffe alle chinge car tin sourire is von’tent l’garder !

V’là, mes gins, eune tiote phrasse de George Bernard Shaw qui avot, li auchi, eune idée su l’question. A’ch’t’heure, i fot que j’te laiche, mes gins, j’ai rindez-vous aveuc min binquier. Cha fait quarinte-huit heures que j’li ai d’mindé 1.000 euros in billets, ch’est d’jà cha qu’j’auros dins min bas d’laine ch’i ferme boutique sins crier gare. Mais com’ i n’y a pus d’caiche ! I fot qu’te prévoies cha d’long. A croir’te qu’is les fabriquent à l’deminde…