Chalut mes gins ! J’croyos bin in avoir fini aveuc l’série « Plus taxe la vie » quind j’ai mis un point final à min artique : « Commint résoute un problème ». Mais i fot bin admette que ch’sujet i est sins fond. In peut t’in armette eune couche, i n’y a qu’à d’minder !

Ch’est sûr’te, j’auros pu t’parler d’el nouvielle acquisition d’Nicolas 1^er. I n’voulot pon ress’ in artard su ches Américains, alors i vient s’offrir un Air Force One ! Un biel A330 pou rimplacher ch’ti qu’i a d’jà. Ch’est bin connu, mes gins, aveuc un A319, in n’va pon d’ù qu’in veut su cheule planète. I fot pacher à l’pompe pou faire l’plein. Quind te sais qu’i fot d’jà chinq minutes quind ti, te paches à l’pompe pou rimplir tin réservoir, j’te laiche imaginer l’timps qu’i perd aveuc sin coucou d’A319 ! D’ailleurs ches cinéastes françés is sont d’jà such’ cop. In va commincher l’tournache dins peu d’timps. Cha va s’app’ler Air Force 1^er, eune production TF 1^er aveuc César Delon. I connot bin l’pilotache, i a d’jà jué dins Airport 77 : Concorde ! Pou ch’premier rôle, un acteur complèt’mint inconnu. I fot donner eune chince aux jonnes. Ah ! Sin nom, j’allos oublier : Harry Sonnefort. (Note : j’n’savos pon qu’in avot b’soin d’un klaxon su un avion.)
A’ch’t’heure qu’in a bin rigolé aveuc nos sous qui partent in vapeur d’kérosène, in va essayer d’ress’ter zen. Cha, mes gins, in littérature, ch’est eune redondinche d’syllapes qui permet eune lecture zen ! Vlan, un d’pus ! In n’in aura pon d’trop pou ch’sujet du jour, qui com’ l’tite i l’indique, étot l’continuité dins l’ching’mint… « Plus taxe la vie » saison deusse.
In dit toudis qu’i n’y a pon d’fumée sins fu. Même chi min Jean-Louis Borloo i a déminti sin intintion d’mette un bonus-malus su ch’t’électricité, in peut supposer qu’cha n’est pon v’nu com’ cha, cheule idée, par l’opération du Chinq-Eurospris ! In va résumer vit’ quo qu’ches bruits d’couloir is avotent prévu pou inchiter ches gins, nou’z’autes, à faire attintion à ch’consommation électrique. In va accorder eune ristourne jusqu’à 20% su l’abonn’mint pou ches gins qui étal’tent leu consommation in heures creusses ; com’ faire leu lessife, par eximpe. Par contre, chi te fais n’importé quo, com’ tout mette in marche dins l’journée,  te verras eune augmintation jusqu’à 20% du prix !
Mi, première cosse que j’vos, ch’est commint qu’in va faire chi in n’a pon d’tarif jour/nuit ? Alle est bionne cheule question, hein ? Bion, pou m’démonstration, in va dir’te qu’in a tous cheul système et qu’in n’travall’te pon à EDF. Avint d’aller t’couquer, après tin popo du soir, te mettras in marche t’machine à laver l’vaisselle et t’machine à laver l’linche. Bon, y a in d’jà gramint qui font cha. Alors chi te veux vraimint ête un bion élèfe, te programm’ras tin rôti pou qu’i cuisse pindint l’nuit. Ch’est sûr’te, te ming’ras frod, mais te f’ras des économies. Ch’est bion pou tin pouvoère d’achat et pou l’planète ! De préférinche, te ravis’ras la tévé la nuit, su tin écrin géint, d’ù qu’t’as d’jà acquitté eune taxe d’malus pach’qu’i consomm’te pus. Chinon, te payes eune taxe su l’taxe. Quind in dit impossipe i n’est pon françés, in t’el proufe à’ch’t’heure ! Ches plats mijotés, te vas oublier. Vife l’cuisine micro-ontes, cha va vit’ et ch’est miux pou éviter l’taxe ! J’in vos auchi gramint qui von’tent vir ch’is n’peuv’tent pon travaller l’nuit. Com’ cha, dins l’jour, is f’ron’tent des économies. C’est ch’nouvieau précepte : Qui dort dins l’journée, s’inrichit !

Ch’est vrai qui vaut miux in rir’te, mes gins. Mi, j’vais cor’ ajouter qué cosse. Pach’ que, com’ toudis, in n’s’rind pon compte de tout quo qu’cha va chinger. Su un interrupteur, in n’mettra pus on/off ou marche/arrêt mais bonus/malus ! Axel Bauer i n’cant’ra pus : Eteint l’leumière, montre-mi tin côté sompe mais bonus l’leumière ! Su eune carette, ches clignotints, cha s’ra ches bonusmalusints. Tin sapin d’Noël s’ra équipé d’eune guirlinde bonusmalusinte. In va d’voir chingé l’esspression l’fée électricité qui va d’voir arvoir sin grimoire pou dev’nir l’sorcière d’l’électricité. Alle s’ra bien-aimée qu’in cas d’bonus ! Oh, mes gins ! J’allos oublier l’essinchiel, l’réplique mythique du pote à Nicolas 1^er, Jacouille la Fripouille. Dins s’villa in Corse, quind i juera aveuc l’interrupteur, i d’vra dir’te : « bonus/malus » au lieu de « jour/nuit » !