Bouchons dins toute l'France !

Mardi 16 septembre 2008 2 16 /09 /Sep /2008 15:33

Bouchons dins toute l'France !

Chalut mes gins ! Te t’dis in rasivant ch’tite : cha y est ! Marie Toutoule alle a cor’ pété un fusipe. Alle no parl’te d’bouchons alors qu’in n’est pus in vacinches et que toutes ches routes alle ress’tent in vert. Ch’Bison Futé i est in arpos jusqu’à un prochain long ouiquen… Ch’est sûr’te, j’auros pu chosir un sujet pus sérieux com’ ch’lundi noir’te dins ches bourses. Mais i s’ra bin assez timps d’in parler quind in s’ra dins l’brin ! Auchi, j’préfère, à’ch’t’heure, qu’in évoque toud’chuite l’réconfortint, d’autint qu’ch’est l’périote : ches foires à vins !

Ch’est dev’nu incontournape. Quind te viens d’payer tin dernier tiers aux impôts, in arrosse cha in faisant l’foire à vins. Un tiers d’un pot, cha n’te fait pon gramint à boir’te, com’ i disot l’pilier d’l’estaminet du coin, mais, cha dépind d’el talle du pot ! Eune coïncidinche, te vas m’dir’te, hasard de ch’calindrier. Ou eune bielle manipulation commerciale pou t’armette de ch’chèque que te viens d’faire ? In n’sait pon. Dins l’vie, y a toudis des coïncidinches troublintes… Ch’qui est sûr’te, à m’mote, ch’est qu’pus l’chiffe d’tin chèque i est gros, moins t’as d’boutelles dins tin chariot ! Cha, ch’est l’principe d’ches vasses communicints que j’vais rapp’ler pou ches gins qui n’le saurot pon cor’ : Pus te mets d’liquide in un pot moins i t’in ress’ à mette dins tin gob’let !
In tout cas, cha va in faire des bouchons dins toute l’France. In prévoit même gramint d’imboutellache in pus. Imboutellache in rapport à ch’nombre d’boutelles qu’in va vit’ mette à rimplir chez ches récoltints. Imboutellache, auchi, in rapport à ch’t’incombr’mint d’chariots qu’i va y avoir dins ches allées d’foires à vins d’ches grindes churfaces ! Chi te veux faire tin stock pou ches longs mos d’hiver, t’as intérêt à t’dépêquer. Ches Inglais is ont d’jà débarqué, is connaiss’tent l’chemin, pou rimplir leux cafes. Mes gins, i fot les comprinte. In finit par s’fatiguer d’boir’te que d’el bière et du whisky. Et pis, cha leu f’ra des boutelles vides pou y mette des messaches d’dins ! Chi te ravises bin, ch’est des gins qui sont su eune île. In pus, ch’est dins leu culture : l’Poliche a sins arrêt dit qu’i fallot mette un « message in the bottle ».
I fot qu’in parl’te d’chiffes à ch’t’heure. I parôt qu’in bot in vin in moyenne chinquinte-deusse lites virgule chept par habitint. Vingt dius ! J’in vos d’jà qui s’dis’tent : ch’est nin mi ! T’es pon bin dins t’tiête, eune lessiveusse d’pinard ! Mais i fot relativiser, mes gins ! Chi j’posse chinq et que j’artiens tros, in arrife à 14,44 cintilites par jour et com’ in est in 2008, et que ch’est bissextile, in quée à 14,40 ! Un bion tiot verre d’pinard. Ch’est bion, in n’a pon b’soin d’appeler Modération !
Dins min équation, i y a eune inconnue et eune bielle. In n’sait pon combien i y a d’gins qui n’in boiv’tent pon… Cha fait toute l’différinche et cha fait gramint monter cheule moyenne ! In peut supposer qu’in dot d’jà inl’ver tous ches infints. Ches gins qui n’ont pon querre à ch’vin ou qui n’boiv’tent pon et ches gins à cosse de leu religion. Millard, min verre is déborte !

In va aller s’in j’ter un pou s’réconforter, t’as qu’à am’ner Modération aveuc ti ! In va chertain’mint tertous finir dins eune fiche chez Edvige mais in s’in fout ! Com’ i disot l’acteur Errol Flynn : « I m’suffit d’un verre pou t’nir m’dache mais j’n’peux pus m’souv’nir chi ch’est l’disse-huitième ou disse-neufième ! » Pou ress’ter in France, in va chiter Alexandre Dumas père qui disot : « Rin i n’fait vir l’av’nir d’couleur rosse com’ d’el contimpler à travers un verre d’Chambertin. » Et un trossième pou l’route de A. Nonyme qui dit checi : « In a armarqué que ches éléphints buvotent pus que ches autes animaux. Dotés d’eune grinde mémoire, is doiv’tent boir’te pou oublier… »