Chalut mes gins ! Souvint cha arrife d’raviser dins un aute pays pou savoir commint qu’is font pou résoute un problème. Souvint, auchi, in prouve à tertous qu’in n’a pon d’quo s’plainte pach’qu’ailleurs ch’est pire. Pourtint quind te ravises bin, ch’qui fonctionne dins chertains pays, in ne l’fait pon in France pach’qu’in part du principe que cha n’march’ra pon ou, auchi, pach’qu’in va déclincher eune révolution. Ch’est bin connu partout dins l’Monte, in est eune sacrée binde d’râleux !

Chi, in France, in n’a pon d’pétrole, com’ i disot un viux slogan, in a des idées. I fot bin admette, mes gins, que ches idées alles sont toudis ches mêmes : Mette une taxe et cha ira miux ! Dins cheule série bin françésse qu’in no arjue tous ches jours su nos écrans : « Pus taxe la vie ! » Je n’pouvos pon pacher à côté de ch’qui no pind au nez et qui, pou eune fos, a été inspiré par eune taxe belge. Ch’est sûr’te, chi in t’dit qu’ch’est pou l’écologie, t’as tindinche à dir’te : Alors ch’est un mau pou un bin. I fot bin qu’in pinse à ches jonnes qui vont hériter d’eune Tierre in désolation pach’qu’in a fait n’impoté quo. Chertes, ch’est vrai et j’sus d’accord. Mais, cor’ eune fos, à quo i va servir vraimint cheul argint ? Et churtout, d’ù qui va aller ? J’n’sus nin sûr’te que min inquêtriche préférée, Bridget Columbo, alle arrif’ra à artracher ches méindres budgétaires pou treuver d’ù qu’i s’muche l’argint d’el taxe écolo. In s’ra obliger d’ajouter eune chpécialité : après l’blinchimint d’l’argint, in verra l’verdiss’mint d’l’argint ! Eune sorte d’tenue d’camouflache pou ches billets, pou dir’te d’eune fachon poétique que ch’t’argint i ch’est évaporé dins l’nature…
In récapitule rapid’mint quo qu’in a d’jà annonché et fait. Quind t’acates eune carette, t’as ch’bonus-malus in fonction du degré d’polluchion. Quind t’as eune grinde carette aveuc un malus pach’que t’as quate gamins, tint pis ! A’ch’t’heure, t’in acat’ras eune tiote aveuc un bonus mais te f’ras deusse voyaches ! In va faire l’même cosse su ches frigos, ches tévés, ches machines à laver, ches ordinateurs. Mais auchi ches détergints, ches peintures, et j’in pache.

Quind te n’voudras pon ête pénalisé in acatant eune nouvielle tévé, i faudra que te t’contintes d’un tiot écran, moins gourmint in énergie. Par conte, com’ t’auras p’t’ête l’drot à un bonus, te pourras acater eune piaire d’jumelles pou raviser tin nouviel écran au bout d’tin salon.

Quind te vas acater un frigo grind talle, parel, te paches à l’caiche ! Com’ cha i n’te ress’ra pus qu’à faire ches courses tous ches jours. Chi t’as cheule mêm famile, tin frigo i s’ra trop tiot pou eune s’maine. Mais attintion, ches courses, ch’est à pid ! Pon question d’printe t’carette, chaque fos, pach’que cha pollue pus que l’valeur d’el taxe qu’in a prisse su ch’frigo !

Te f’ras tin ménache aveuc modération. I va d’voir s’diviser ch’ti-lal. Après l’alcool, eune deussième casquette pou li. Tin détergint étant surtaxé, pon question d’laver à tout bout d’camp. In n’a pon cor’ calculé l’degré d’bactéries acceptape pou justifier un bion lavache des sols. Ches essperts is travallent d’sus ! Pou cha, in va nommer eune commission d’contrôle qu’in va rémunérer aveuc ch’taxe ! J’n’osse même pon imaginer quo qu’in va no d’minder d’faire aveuc no slips, cal’chons, petites culottes et autes, chi in no dit qu’i n’fot pon trop souvint arj’ter d’el lessife dins ches ieaux usées !

A’ch’t’heure, in parl’te cor’ d’eune nouvielle taxe. Su tout ch’qu’in nomme l’jetape. Ches gobelets, ches assiettes, ches couverts in plachtique.  Ches briquets, ches rasoirs et même ches adhésifs ! Adiu tin rouleau d’scotch ! Te v’là arv’nu au bion timps d’ù qu’te faisos d’el colle aveuc d’el farine et de l’ieau qu’in posse su eune binde d’papier. V’là l’arcette : Te mets d’el farine dins d’l’ieau et te toulles aveuc un fouet in faisant cauffer pou éviter ches grumieaux. Chi ch’est trop épais, te rajoutes d’l’ieau. Chi ch’est trop fluide, te rajoutes d’el farine. Quind t’as un bel apparel bin homogène, te peux t’in servir. T’as tin adhésif chint pou chint arcyclape mais in va oublier que, ch’gasse ou ch’t’électricité qu’i t’a fallu pou faire t’colle, cha t’a fait consommer d’l’énergie !

Oh ! J’avos oublié un truc drôl’te dins ch’liste. In parl’te auchi d’ches sacs in plachtique. Te sais, ch’truc qu’in t’donnot dins ches timps, pon trop ancien cor’, à l’caiche d’ches magasins. Seul’mint in ne t’in donne pus ; cha, t’as dû t’in rinte compte. Au cas d’ù qu’t’in auros gardés in souv’nir, in va mette eune taxe d’sus ! In n’no dit pon chi in va d’voir les déclarer in mairie ou qu’eune commission d’recins’mint alle va pacher pou in faire l’invintaire…
Heureus’mint, ch’PQ i est in papier et ch’est d’jà arcyclape. Sinon is t’aurotent d’mindé l’pire ! A’ch’t’heure, chi eune vaque alle pollue pach’qu’alle fait trop popo, in peut, à juss’ tite, se d’minder chi in n’pollue pon trop in faisant sin popo tous ches jours…

Mes gins, j’vais t’annoncher eune bionne nouvielle. In ne m’a pon cor’ d’mindé d’recinser tous ches gins qui m’lis’tent et qui rigol’tent à mes toutouleries. Pach’que, sins rin dir’te, quind te ris d’bion cœur com’ j’in vos qui l’font in ch’momint, te consommes pus d’air que quind te fais eune guiffe d’six pids d’long ! A méditer…