Chalut mes gins ! Par quo in va commincher à’ch’t’heure ? J’viens d’lir’te l’journal in long et in large. Cor’ eune fos, ch’est nin réjouissint. Cha a été l’déluche du côté d’Cimbrai. Ch’tunnel sous l’Minque i s’est imbrassé. A Bondues, in continue à attaquer ches gins à leu baraque pou leu voler ches bijoux. Et j’en pache pou éviter qu’in braie avint l’fin de ch’paragraphe !
J’vais quind même, mes gins, juss’ faire eune misse à point such’ que j’ai écrit, hier, su Bernard Tapie. J’le voyos bin dins un remèque d’Cosette dins ches Misérapes et j’apprinds à’ch’t’heure, qu’in fait, i va armontrer su ches planques pou no juer l’PDG autoritaire et paranoïaque dins Oscar. Chi j’n’avos pon d’jà vu d’autes verchions, dont eune aveuc Louis De Funès, j’auros pu croir’te qu’in a écrit ch’rôle rin qu’pou li. Vingt dius, i va avoir du mau à rintrer dins l’pieau du personnache…

Cha, ch’est fait. A’ch’t’heure, v’là quo qui a art’nu min attintion. Com’ cha, cha peut ne paraîte nin drôl’te. L’armée autrichienne alle met aux enchères un lot d’miradors dev’nus obsolètes. Bin, is n’ont pu b’soin d’raviser quo qu’i s’pache in Slovaquie et in Hongrie, pisqu’is font auchi partie d’l’eschpache Schengen. Chi te n’as pon l’bionne prononciation, te peux lir’te chaîne-gaine, cha marche ! Te vos, cha n’a rin d’drôl’te. Pou mette d’ches pots d’fleurs dins tin gardin, cha fait un peu grind com’ chellette. Par contre, com’ dins quéques mos ch’est Noël, te peux t’faire plaiji et offrir cha à l’un d’tes voisins. Cha n’te coût’ra que l’euro symbolique.
Lal, t’es in train d’te dir’te : Marie Toutoule alle s’est gourée. Alle voulot écrir’te : Te peux faire plaiji et offrir cha à tin voisin. Nin, mes gins ! Quind t’offres cha, ch’est à ti qu’cha fait plaiji pach’que te t’fous de ch’guiffe ! Je t’ess’plique. Te n’vas pon t’fâcher aveuc cheuls d’ù qu’te t’intinds bin. Mais j’sus sûr’te qu’i y in a un, nin loin d’chez ti, qui pache sin timps à raviser tertous dins l’quartier. Ch’est à li que j’pinse. Plutôt qu’i attrape un torticolis à forche d’raviser in coin à travers l’feniêtre sins bouger ches ridieaux. Pou li, cha s’ra l’grind confort. J’vais t’in faire l’démonstration com’ chi ch’étot mi, l’vindeusse.

Eune bionne hauteur, mes gins, d’ù qu’in peut raviser pard’sus ches murs. Cha va li augminter sin camp d’vision. Ah ! Qué bionheur pou li et com’ i t’in s’ra arconnaissant d’savoir que l’femme du dousse alle pind ches tiotes culottes aveuc des pinches à linche d’couleur rouche ! Que ch’quatorsse, i s’gratte ches fesses in sortant fumer dins sin gardin ! Et auchi, qu’i y a gramint d’allers et venues chez l’vingt ! Quo qui s’pache lal ? Quo qu’alle fait cheule-lal alors qu’sin mari i est parti à traval d’puis tros heures !
Un bion toit aud’sus d’el tiête, cha auchi ch’est l’confort. Ch’est prévu pou ches jours d’ù qu’i drache. Alors, y a toudis un toit. Ch’est pus pratique quind in utilisse des jumelles pach’que ches gouttes, cha amoindrit tin camp d’vision. Pis, au bout d’quéque timps, t’es trimpé com’ eune soupe même chi t’as mis un K-Way com’ Dany. Parinthésse, t’évites de mette un rouche. Te f’ros balisse d’détresse ou phare. I n’y a pon d’batieaux à proximité. Chosis plutôt un vert kaki com’ ches militaires.
In pourrot présinter ch’mirador com’ eune gloriette montée su pilotis. Te sais, ch’qu’in treuve dins ches gardins d’grindes propriétés. I fot juss’ un peu d’intraîn’mint pou arrifer à monter su ch’t’équelle in bos. Mais quind in veut, in peut ! Et l’grind raviseux d’tin coin, i est prêt à grimper sins problème pou avoir ch’vue panoramique imprenape !
A’ch’t’heure qu’in a vu insimpe l’allure générale et cha fonctionnalité esstraordinaire, i fot que j’te parl’te d’ches options. Ch’est nin vindu pou ch’t’euro, i n’fot pon exagérer ! L’première option, chertainement l’pus indispinsape, ch’est qu’in dot s’les g’ler in haut. In arrife à ches mos d’ù que l’timpérature alle quée. Pis, même, in altitute, i fait toudis pus frod ! Alors j’peux t’proposer un superbe parasol chauffant. In a fait eune finition chpéciale imitation tissu d’camouflache.
L’deussième option, ch’est un fauteul d’secrétaire, toudis in tissu d’camouflache. Ches roulettes, ch’est pratique pou ête su tous ches fronts rapid’mint. Pis, cha permet de t’arposer quind te viens d’grimper à l’équelle. I faudra qu’in pinse à faire eune option ascinseur mais ch’est nin cor’ disponipe su cataloque. Deussième fonction, ch’est quind in met sin K-Way rouche et qu’in tourne such’ fauteul, in dirot vraimint un phare. Alleumé rouche, camouflé. Alleumé rouche, camouflé. I n’y a plus qu’à attinte l’Titanic pou dir’te qu’ch’est l’double effet qui s’coule…
L’trossième option, ch’est l’contraire d’el première. Nin, ch’est pon eune clim quind même. Mais in peut t’proposer, pou ches jours d’ù qu’i y a gramint d’solel, l’kit caïelle longue et décapotape. L’toit i s’arplie sins effort, ch’est électrique, et te peux profiter d’ches rayons bin étindu su t’caïelle longue pou un bronzache. Intégral, chi te veux, à condition d’inl’ver tin K-Way chi te n’veux pon finir à l’vapeur !
Com’ t’es vraimint un bion client, mes gins, à’ch’t’heure seul’mint, j’te fais profiter d’eune promotion excepchionnelle : in t’offre in pus du kit caïelle longue et décapotape, un mini-périscope pou continuer à raviser tout in étant couché !

V’là, mes gins, quo que j’ai auchitôt pinsé in lisant qu’in mettot in vinte des miradors. Cha m’a auchitôt fait pinser à eune histoire qu’in m’a racontée, y a quéques jours. Eune voisine qui étot au courint d’tout alors qu’in n’la voyot jamais dins l’rue. In rigole d’cha mais, mi, cha n’me fait nin rir’te. Savoir qu’i y a toudis quéqu’in qui t’épie pach’qu’i a qu’cha à faire ou qu’i est vraimint curieux ! Minquerot pus qu’in arnomme ches miradors in perchoirs à corbieaux !