Fachile à dir'te !

Jeudi 11 septembre 2008 4 11 /09 /Sep /2008 12:59

Fachile à dir'te !

Chalut mes gins ! I y a un bion bout d’timps qu’in n’a pon vu insimpe eune tiote phrasse d’quéqu’un d’célèpes. Aussi, com’ in n’peut pon dir’te que l’actualité est riche in évén’mints, pisqu’in parl’te toudis d’ches mêmes sujets d’puis quéques jours, in va in profiter.

Te m’diras, j’auros très bin pu parler du mariache du Prince Jean 1^er et de la Princesse du grille-pain in promotion, mais j’n’ai pon été invité à ch’mariache. Ch’est p’t’ête pon pus mau car j’n’savos vraimint pon quo leu offrir. Arriver aveuc un fer à arpacher alors qu’is ont tous ches modèles in stock. Parel pou eune friteusse électrique et j’te pache l’ress’ de l’panoplie ! D’autint que j’n’sus pon convaincu que ch’est eux qui vont s’in servir…

J’auros pu égal’mint t’parler de ch’tro d’el Sécu qui vient cor’ d’ête épinglé par l’Cour d’ches Comptes. Mais, cha, in s’y attind tous ches ins. D’ailleurs, pou aller pus vit’, in peut s’d’minder ch’is n’font pon eune photocopie du rapport d’l’année précédinte.

J’auros auchi pu t’parler de ch’dédommach’mint qu’in va faire à Bernard Tapie qui no a jué Cosette d’vint cheule commission des fininches d’l’Assimblée Nationale. I n’avot pon cor’ jué dins l’catégorie des misérapes. I avot fait l’commissaire Valence qu’in va d’voir arbaptisser cha l’commissaire Valisses, aveuc un « S » à l’fin car in n’peut pon faire t’nir tous ches billets d’binque dins eune seu valisse ! Vraimint, min Bernard, in dirot qu’t’es à côté d’tes baskets edpis qu’in t’a fauché tes Adidas ! Te t’rinds compte cor’ d’el valeur de l’argint ? Aveuc 285 millions d’euros, in pourrot arconstruire toutes ches baraques détruites à Haumont et faire cor’ d’autes cosses !

Bref, com’ i disot Pépin. Ch’est fachile com’ jeu d’mots, ch’est vrai, mais te verras ind’sous que fachile ch’est just’mint l’propos de cheule tiote phrasse. I n’y avot vraimint pon d’quo in faire des lines aveuc ches actualités. J’ai plutôt l’invie d’éteinte cheule tévé et d’mette ch’journal dins ches vécés pou l’arcycler.

Alors, mes gins, in in vient à ch’momint d’ù qu’tin eschprit i va pouvoir philosopher aveuc l’mien. Qui n’a jamais intindu d’un proche, d’un chef, cheule phrasse : « T’auros dû faire cha aut’mint » ou « Bin, ouais, ch’est pon com’ cha qu’in fait » ? Et cor’ d’autes tout auchi explicatives après cop…

Fachile à dir’te !