Chalut mes gins ! Vingt dius ! I n’vaut miux nin lir’te ches infos chi te veux garder un tiot peu tin moral in plache. Te m’diras, ch’est nin nouvieau et ch’est vrai. Alors j’ai déchidé qu’in allot déprimer insimpe in faisant un résumé de quo qui m’a interpellé. Pou faire court, in va printe un seu sujet ; ch’est d’jà pon chi mau…

In va parler d’un truc qui m’pind au nez, mi, Marie Toutoule. Com’ j’sus lal pou t’faire rigoler dins cheule sinistrosse générale, j’sus sûr’te qu’in va dir’te d’mi que j’sus un acteur sochial. Infin, com’ j’sus eune file, j’sus sûr’te qu’in peut féminisser cha in disant eune actriche sochiale. Te vos d’ù que j’veux in v’nir. Ouais ! J’vais avoir l’drot à eune bielle fiche à min nom such’ basse d’données Edvige. Alors J’auro querre à ch’qu’in la choisiche in rosse. Com’ cha in saura auchitôt qu’ch’est mi et ch’est assorti à mes fouffes. Com’ j’n’voudros pon qu’alle fasse des erreurs, cheule brafe Edvige, j’vais juss’ rapp’ler min pédigré. Juss’ pou ête sûr’te qu’in n’me f’ra pon pacher pou ch’que je n’sus pon. Min nom d’abord ch’est Marie Toutoule. J’sus née le 17 juin 1972 à Lille. Ch’est dins ch’Nord ! J’habite toudis dins ch’Nord à Saint-André-Lez-Lille, la ville sympa ! Min métier ch’est, à’ch’t’heure, amusette publique. J’soigne ches tiots bobos d’el vie par eune bionne dosse d’bionne humeur. Cha n’coûte rin à l’Sécu ni à tin porte-monnaie. Te peux quind même faire un don pou mes bionnes oeufres, chi t’in as invie ; y a l’lien pour cha !

A’ch’t’heure, in arrive à ches questions pus personnelles. In y va ! Pou qui j’vote ? Cha ch’est eune bionne question, merchi de m’la poser, madame Edvige. Te armarqueras, mes gins, que j’sais faire com’ ches politiques. J’ai répondu à eune question par un truc qui m’permet d’avoir l’timps d’y réfléchir. Je diros bin que j’vote pou ch’ti qui sort l’moins d’bêtisses. A min avis, j’vais avoir du mau à treuver un camp. Cha s’ra d’pus in pus dur’te ! Mais j’pourros auchi rajouter que j’ai dins l’eschprit d’faire min parti aveuc L’Mouv’mint chtitoyen^©. Min programme i est simpe. Notez-le auchi such’ fiche : Obligation d’rir’te chinq minutes tous ches jours. Ch’est m’seu exigince dictatoriale ! Com’ cha, ches Françés is ont un meilleu moral. Is vont à traval sins traîner ches pids. I a donc moins d’bouchons et cha fait du bin pou cheule planète ! Com’ tous ches gins is traval’tent dins l’joe et l’bionne humeur, l’rind’mint i est in hauche. In va moins souvint à cheule machine à jus pou s’armonter ch’moral. Même dins ches burieaux d’ù qu’in n’vot pon ch’leumière du jour. Ches bénéfiches is suiv’tent et ches caiches alles s’rimplichent. Cheule Sécu alle est moins sollichitée par ches malates imaginaires. Bin, ch’est normal, ches gins is n’ont pus l’invie d’rester à leu baraque tout seu quind in peut rigoler in groupe ! Sin gouffre i s’arbouche auchi. L’France alle explos’te… d’rire in même timps qu’sin PIB. Rin que ch’nom i fait rir’te, d’ailleurs ! Je n’te parl’te même pon de ch’chômache qui fond pus vit’ que tin pouvoère d’achat à’ch’t’heure. Juss’ un point à arvoir, j’vais créer des nouvieaux chômeurs quind même. Bin, ches syndicalistes is n’auront pus d’traval pisque tout i l’ira bin ! Ch’est rin, in les embauch’ra com’ chauffeux d’salle dins ches burieaux. Y in a d’jà qui sont très rigolos. T’as qu’à les acouter parler pou in ête convaincu.

Quel Diu i a mes faveurs ? Cha auchi ch’est eune bionne question. In n’peut pon dir’te que ches uns ou ches autes is soi’tent très drôl’tes. Cha a même eune fâcheusse tindinche à diviser ches gins au lieu d’les rassimbler. J’auros auchi l’invie d’dir’te que l’religion l’pus fédératriche, à’ch’t’heure, ch’est ch’football, mais y a gramint d’Diux et gramint d’gins qui s’battent pou eux. Donc, ch’est nin cor’ l’bion chox. Mi, pou m’part, j’sus pus dins l’catégorie agnostique ! V’là, ch’est dit.

Mes attirinches sexuelles. Bah, Edvige, t’es vraimint eune tiote perverse ! Quo qu’te veux tenir ch’chandelle à tertous ? Te n’as pon assez d’bras pou cha. Te n’es pon l’déesse Senju Kannon qui avot des milliers d’bras. Ti, in t’arconnot à tes grindes orelles. Te veux savoir tous ches détals. Bin, mes attirinches alles vont pou ches chippendales, com’ j’ai eu l’occasion de l’raconter dins m’première avinture su ch’t’écran ! J’te rassur’te, je n’prinds pon l’lot. Un seu, ch’est d’jà bin !

A’ch’t’heure, te veux auchi savoir chi j’ai des maladies muchées ! Ouais ! J’in ai eune et eune bielle. Cha s’appel’te le Syndrome de BiTemPo NePoPe UnCa ! J’espère juss’ que cha n’est pon eune maladie orpheline et qu’i y in a gramint qui vont la déclarer. Commint Edgive, ti qui sais tout, te n’connos pon cheule maladie ? Bin, j’vais donc rimplir ches blancs qui ress’ pou que m’fiche alle sot complète ! Cha veut dir’te in françés dins l’texte : L’Syndrôme de Bion Tempéramint Pou Ne Pon Péter Un Câpe !