Chalut mes gins ! Vingt dius, ches gambes alles m’font cor’ mau d’el Brad’rie. J’in ai fait d’ches kilomètes ! Infin, in a l’imprechion pach’ qu’in fait prechque du chur-place. Te m’diras, je n’avos qu’à y aller quind i a qué des cordes diminche, j’sus sûr’te qu’in circulot miux. D’habitute, quind t’es pris dins ches bouchons, ch’est qu’t’es au volint de t’carette su ches périphériques. I fot bin l’dire, dès qu’i y in a un qui fait un pet d’travers, t’es coinché. Et lal, biêt’mint, te t’dis : « in irot pus vit’ à pid ! » Quind t’es dins l’brad’rie, ch’est eune aute piaire d’manques. T’es à pid et te n’avinches pon quind même.

Te pourros m’dire : Com’ cha, in a l’timps d’raviser ches étalaches d’fortune. Mais nin, t’es trop occupé à faire attintion à ch’flux d’gins. T’as toudis ches tiots malins qui t’bouscul’tent pou pacher d’vint ti dins l’eschpoir que ch’est ti qui fait l’bouchon. Alors que te sais que d’vint, cha n’avinche pon pus qu’derrière. Pis, t’es occupé auchi à faire attintion à nin arcevoir ches roues d’eune poussette dins ches talons. L’mayonnaisse du cornet d’frites de ch’ti qui t’suit, cha t’inquiète auchi. Un ralintiss’mint soudain et te v’là aveuc un motif in pus dins t’dios que te n’avos pon prévu !
Cha n’est pon l’seu truc qui est dingereux. T’as cheul qui s’balad’tent aveuc un sac à dios pus épais qu’eux et qui s’artourne brutal’mint. Chi t’es pus grind qu’li. Te t’prinds un cop dins ches côtes mais cha n’est pon trop grafe. Sauf chi ch’bradeux i vient d’acater un lot d’viux fers à arpacher ! Mais imagine qu’t’es pus tiot qu’li. Te t’les prinds dins l’guiffe ! Ah ! In arpach’ra des plaijis d’el brad’rie !
A’ch’t’heure, i  y a auchi eune catégorie d’bradeux qu’in n’sait pon pouquo is sont v’nus lal. Is n’ravis’tent rin, is sont aveuc leux téléphones collés à leux orelles et is racontent l’conte ! J’in ai croisé eune, mes gins, qui étot in train d’dir’te : « j’in ai marre, j’em fais poucher d’partout ! » Cha, chi alle voulot faire du lèque-vitrines dins l’calme, alle s’est gourée d’jour ! Qui alle appelot ? Sin Prince Charmint pou qu’i vienn’te la s’courir ? Dins tous ches cas, à moins de v’nir la cacher in hélico et qu’alle no arjue eune scène à la Belmondo, j’n’vos pon commint l’extraire aut’mint. In pus, in n’pouvot même pon s’infuir par ches stations d’métro. I étot in raque !
In attindant, cha auchi ch’est eune cosse d’accidint dins cheule brad’rie. Quind t’as ch’téléphone à tin orelle, t’as tin coude tindu la plupart du timps. Chi te fais eune rotation rapide, i finit s’course su l’guiffe d’quéqu’un. Ch’est simpe com’ un cop d’fil, qu’in t’disot toudis ! J’te pache cheuls qui s’croi’tent à un défilé d’mote. La mote d’ù, in n’sait pon. Cheuls qui arsimpent pus à des êtes v’nus d’eune aute planète, mais chacun i est lipe d’faire com’ i veut.

In peut auchi raviser ch’qu’in no proposse com’ bionnes affaires. Infin, bionnes, dins l’plupart d’ches cas, cha dot ête pou l’vindeux ! Y a un truc qui m’a bin amusée. Un vindeux du diminche, même chi in étot sam’di, i proposot des pneus-neiche. Trinte euros l’pneu, soixinte, ches deusse ! Vingt dius, t’as auchitôt l’invie dins acater deusse ! Te n’vos pon l’affaire que te fais, ti ? Allez mesdames, messieurs, cha n’est pon un, ni deusse, ni tros que vo import’rez à’ch’t’heure, mais quate pou le prix d’chinq ! Chi t’el dis aveuc d’el conviction, cha pache…
Qué cosse m’a auchi interpellé. Ches vindeux d’soulis. In a l’imprechion qu’i n’y avot qu’cha par indrots. Chinq euros l’piaire, ch’est nin quer ! Dins chertaines marques, te n’as pon l’ompe d’el boîte pou ch’prix. A’ch’t’heure, in peut se d’minder d’ù qu’cha vient pou faire des prix parels. A moins que ch’est des soulis d’un jour. Te les mets l’matin et l’soir te peux les mette à l’poubielle pach’ que te t’artreuves in kit. Même pon b’soin de t’abaicher pou les inl’ver, cha quée tout seu !
T’as cor’ cheuls qui se sont dit : « In va profiter de l’effet ch’ti pou vinte des biloutes du ch’ti. » T’as nin vu cha, ti ? In t’proposot des biloutes d’trinte-tros cintimètes in fourrure synthétique multicolore aveuc ches deusse orphelines com’ i disot Pierre Perret. Même Rocco Siffredi i in d’viendrot jaloux ! I n’minqu’rot pus qu’in vot chertains mette cha à leu rétroviseur. Te m’diras, ch’est com’ l’quien su ches plaches-arrières, cha barloque !

I y in a gramint qui n’ont rin compris à l’eschprit d’el Brad’rie d’Lille. Ch’est nin l’marché du diminche. Ch’est nin l’marché du n’importé quo. Brader, ch’est nin vinte pus quer que dins ches magasins. I faudrot p’t’ête qu’in arrête de donner ches implach’mints à des gins qui n’ont rin à faire lal, pach’ qu’is n’ont rin à brader. Quo qu’in va faire aveuc ch’qu’in a dins ches greniers ? Tout mette su ches trottoirs pou ches incombrints ?  Te m’diras, com’ cha, chi te argrettes un truc que t’as j’té, te pourras chertain’mint le racater l’année prochaine ; su l’stand d’un vindeux !