Chalut mes gins ! Cha y est, in est arrifé à ch’bion timps dins l’année d’ù qu’ches rues à Lille alles von’tent fleurer bion d’sintimints. D’sintimints d’moules-frites, pardi ! Ch’est l’momint du grind déballache, in va vider tous ches greniers et toutes ches caves pou proposer des trésors. In va, l’timps d’un ouiquen’ s’printe ches uns, pou des vindeux, ches autes, pou des marchindeux. Cha, ch’est d’jà pus courint par ches timps qui cour’tent…

Vingt dius ! Qu’i est bieau ch’tabouret in plachtique oranche direct’mint inspiré par un jueu d’diabolo qui avot dû arcevoir l’chien such’ tiête. Et ch’bieau lustre aveuc plein d’rondelles in aluminium. Cor’ un adepte d’Paco Rabanne ; ch’ti qui fait pleuvoir ches satellites. Et cor’ cheule bielle pindule d’ù qu’ches heures alles ne pass’tent pus pach’qu’i n’y a pus l’tiote aiguile. Bin, ch’est cha, quind te ravises tout ch’déballache, t’as imprechion que l’timps i ch’est arrêté régulièr’mint ! Te peux artracher, au fil des kilomètes que te fais, chint ins d’histoire et d’mote !
Te t’armets à pinser à un timps d’ù qu’ches publicités alles étotent simpes, su eune plaque in fer blanc. D’ù qu’i n’fallot pon avoir fait chinq ins d’philo et d’psycho pou comprinte l’sens du messache publicitaire. L’rapport intre l’imache et l’produit dont in t’vinte ches mérites. Eune époque d’ù qu’ches fers à arpacher is étotent auchi lourds que des enclumes. Cha, i fallot bin écrasser d’un cop ch’tissu qui tenot d’bout tout seu ! Ch’étot auchi l’timps que, quind te voulos un bion jus, i fallot d’abord avoir du jus dins tes coudes. I fallot l’moute ch’café dins ches moulins in fer ou in bos que t’es in train d’raviser su l’couverture de ch’vindeux d’opérette. Ah, ch’doux grinc’mint d’el manivelle qu’in a progressiv’mint rimplaché par le vrombiss’mint d’un moteur électrique. Pou arrifer, à’ch’t’heure, au pchit de l’air qui rintre dins l’paquet sous-vide de tin café préféré quind te l’oufres.
Que dir’te cor’ su ches landaus pou bébés qu’in dirot prechque l’taille d’eune carette sins permis d’à’ch’t’heure. Te pourros in mette tros, des bébés. I n’y avot pon ches problèmes de stationn’mint com’ à’ch’t’heure. Te pouvos fachil’mint pacher intre ches carettes ! Ch’est in partie pou cha qu’in a fait des passaches protégés. Nin seul’mint pou éviter de s’faire écraser mais pou pouvoir chinger d’trottoir quind te l’veux. Sins d’voir pacher aud’sus d’ches carettes.
Toutes ches vieilles fouffes. I in fallot des couches pou ête harnaiqué dins ch’timps-lal. Eune bionne carapache qui protégeot d’quo ? D’el froidure qu’i faisot à ch’t’époque-lal. Ch’est p’t’ête pou cha qu’in parle d’réchauff’mint climatique. Pach’ qu’in in a d’moins in moins such’ dios. Nin, ch’qui est sûr’te, ch’est que cha n’servot à rin pou un homme d’faire d’el muscu. In n’voyot pon ches musques chous tout ch’t’attiral d’fouffes. Même s’i étot gaulé com’ un sprat, t’avos l’imprechion d’raviser un athlète. Pou eune file, ch’étot parel. Bin serrée dins ch’gaine, alle n’avot pon b’soin d’mette toutes ches crèmes qui fon’tent disparaîte ches cintimètes in trop. Churtout dins l’tiête, pach’qu’in voudrot t’faire croir’te à ches miracles. Mais ch’qui est sûr’te, ch’est qu’cha fait disparaîte ches sous dins tin porte-monnaie !
Pou ches meupes, ch’est pon parel. I n’y a pon d’époque pou cha. Chacun i a querre à un chtyle. In peut juss’ se d’minder chi dins chint ins, in verra su ches étales d’fortune ches meupes d’ù, quind te les acates, i fot avoir fait des hautes études techniques pou arrifer à les monter. Pach’ que ch’est quind même cha, l’grinde innovation : A’ch’t’heure, quind t’acates un meupe, ch’est à ti d’faire l’finition. D’monter ches planques d’bos qui vont arsimper, chi te ne t’trompes pon, à ch’que t’as vu dins ch’magasin. In espérint qu’is ont mis tous ches tros au bion indrot ; quind is n’in ont pon oublié un !

Mi, ch’que j’préfère, ch’est l’technologie. Quind te ravises cha, te t’dis que ch’timps i a drôl’t’mint paché vit’. Quind te vos ches postes d’radio, l’TSF. Eune grosse caisse d’chinquinte su chinquinte su chinquinte cintimètes. A’ch’t’heure, ch’est l’livraison pou l’mos d’lecteurs empétros d’un grind magasin qui tient dins un volume parel. Te t’imagines, ti, chi te d’vos aller faire un jogginge aveuc un truc parel. D’un, t’es obligé d’el mette su des roulettes. Pon question de l’intiquer dins t’poque à moins d’avoir eune méga-poque kangourou. Pon question, nin pus, d’el mette autour d’tin cou. Chinon, te cours l’tiête in avint, vers l’bas. Te n’vos pus ches potieaux ! Deusse, quind bin même t’arrives à l’trinsporter. T’es obligé d’treuver eune rallonche électrique ultra longue pach’que pon question d’mette des piles ! T’es obligé d’courir in line drote ; de n’pon pacher autour d’ches arpes pour faire des nœuds com’ tin quien aveuc ch’laiche à inrouleur. Et j’te pache l’intenne qui fallot déployer à ch’t’époque chi te voulos arcevoir sins trop d’problèmes.
I fot que j’t’avoue un truc, mes gins, j’ai quind même l’nostalgie d’ches galettes noir’tes, ches vinyles. Ch’qu’in appelot un grind disque comparé à un quarinte-chinq tours qui faisot d’jà disse-chept cintimètes d’diamète ! Ch’bras du Teppaz qu’i fallot d’abord tirer su l’drote pou que cha démarr’te. Pis, t’intindos t’musique accompagnée d’musichiens in pus qui s’étotent invités et qui s’contintotent d’faire des craques, des cheees pindint ches passaches pus calmes. Jusqu’à ch’claque bin retintissint, com’ un clap final, t’annonchant qu’tin disque i étot fini et que ch’étot l’momint de t’bouger ches fesses pou l’chinger. Bin, à l’époque, un grind disque i durot vingt à vingt-chinq minutes, nin pus ! Pou intinte l’chuite, i fallot, com’ in cuit eune crêpe, l’artourner !
Pis, t’as eu cheule révolution du laser qui permet d’lir’te des tros microscopiques su eune galette qu’in dirot un miroir. A peine pus grind que ch’ti d’un poudrier. A’ch’t’heure, in n’a même pus b’soin d’galette pou mette cheule musique. Eune puce électronique et l’tour i est jué. In pus, te peux in mette des heures d’long et même mette l’imache aveuc !
Tiens, in parlant d’imaches. Ch’est parel pou ches tévés. Tros personnes pou faire ches poussières derrière. Ouais : deusse qui la bougeotent et l’trossième qui pachot ch’ramon ! Des boutons énormes alors qu’i n’y avot qu’peu d’chaînes. A’ch’t’ch’heure, t’as gramint d’programmes et pus d’bouton. In a invinté ches commindes à distinche qu’in appell’te zappettes. Et auchi d’autes noms d’ojieaux quind te n’armets pon l’main d’sus ! In appelot cha l’tiot écran. Ch’étot vrai. T’avos un meupe et un tiot morcieau d’verre bombé, com’ ch’hublot d’un avion. I fallot attinte quéques minutes après l’allumache, com’ tin diesel, pou vir apparaîte eune imache in noir’te et blanc. Après is ont quind même compris que, dins l’vie tout i n’est pon noir’te, tout i n’est pon blanc. In a eu l’drot à ches couleurs. Ches écrans is ont comminché à grindir. Mais t’as vu ches talles à’ch’t’heure ? T’as ches présintateurs in grindeur réelle. Y a cor’ que leu ego qui n’tien’te pon lad’dins.
Tiens, li, i s’est fait eune chpécialité in téléphone. Cha, ch’est un viux coucou in bakélite noir’te aveuc ch’cadrin. I fallot presque deusse dogts pou l’faire tourner. A ch’t’époque, in avot ches dogts musqués. Ch’est p’t’ête pach’qu’in les faisotent travaller pus qu’à’ch’t’heure ! Oh ! Et pis ch’ti-lal ! D’ches années soixinte. In dirot eune poignée qui tient toute seu et ch’cadrin i est muché ind’sous. Cha, ch’est l’premier PTT gris moche aveuc un clavier déchimal. Pouquo in les faisot in gris moche. J’in sais rin. In n’faisot pon appel à un designer, in n’savot même pon que ch’métier i existot. Ch’est p’t’ête, auchi, pach’que ch’étot l’colorint l’moins quer. Ou cor’, i n’fot nin l’oublier, in t’el louot, tin téléphone. Is avotent chertain’mint peur qu’in l’vole. Alors, vraimint moche, is avotent des chinces de n’pon l’vir disparaîte. Te m’diras, is in ont fait, après, in vert caca d’oie et un oranche ; l’pus célèpe couleur d’ches années septante. Cha, ch’est pou mes lecteurs belges. Cha ne s’volot gramint pus… L’différince aveuc ches portapes d’à’ch’t’heure, ch’est que, même aveuc des gros dogts, t’arrifos à téléphoner !
In arrife à un étalache d’apparels photo. Cheuls d’ù qu’te d’vos printe racine chi te voulos avoir t’guiffe such’ photo. Pinse à tous ches photographes qui voyotent l’vie à l’invers ! Merchi monsieur Kodak qui no a permis d’faire clic-clac sins attinte trinte secondes après clic pou avoir l’clac. Pach’qu’in in aurot vit’ eu marre d’attinte cor’ auchi long et cha fait gramint d’timps qu’in aurot pris no cliques et no claques pou aller vir ailleurs ! Et com’ in est toudis pus pressé, in a invinté cheuls d’ù, quind te prinds l’photo, qu’alle sort et qu’alle apparôt chous tes zis. Tiens, ravises, ch’est mémé Janine. Alle apparôt in premier pach’ qu’alle a mis sin insimpe rouche aveuc des grosses marguerites blanches…

Vingt dius, mes gins ! Que d’souv’nirs dins cheule Braderie d’Lille. In va aller s’armonter un cop pach’que l’marche, cha creusse. Moules-frites et eune bionne pinte d’Jenlain pou faire pacher tout cha ! Pis ch’est cha, auchi, l’Braderie. Ches sintimints d’moules qui sont, à’ch’t’heure, in concurrinche aveuc ches sintimints d’kebabs et d’merguez. Mais avint, mes gins, j’vais immortaliser ch’timps pou ches années à v’nir. J’vais printe quéques photos d’tout cha aveuc min apparel numérique à disse millions d’pixels ! In pourra inl’ver ch’mec qui a ch’dache aveuc min logiciel d’artouches su min manicraque informatique. J’vais invoyer ches photos par maiye à tous mes amis qui ont Internet à travers ch’monte ! Aux autes, in f’ra un CD-photo qu’in ravis’ra p’t’ête un jour su min écran Elcédé ou Plasma, j’n’sus pon raciste. Je n’auros qu’à les prév’nir d’el soirée par un essémès ou un émémès…