Chalut mes gins !  Avint d’aller faire un tiot peu d’chine d’main dins l’pus grind bazar d’France, j’vais t’raconter min rêfe de cheule nuit.  Ch’est vraimint bizarre qu’in peut pinser à des trucs parels. J’étos in train d’faire quéques exerchices su l’plache à Malo les Bains. Un tiot cop d’jogginge, eune ou deusse figures d’karaté. Infin tout quo qui fot avint d’faire ma séince d’caïelle longue. I fot bin que j’continue min intraîn’mint !

D’un cop, mes gins, j’étos poursuivie par des moules géintes qui voulotent m’avaler tout cru. L’revinche  des moules contre l’grind carnache annuelle alle avot sonné ! Une bance d’moules rebelles, qui ch’étotent piquées aux hormones d’croissance, alle invahissot l’plache pou faire l’pieau à tous ches gins qui passotent par lal. Mais j’te rassure mes gins ! Min rêfe i s’finit bin. Mi, Marie Toutoule, j’n’avos pon l’intintion d’finir m’vie intre eune roudelle d’oignon et eune feulle d’céleri ! Ni eune, ni deusse, j’te l’avos armis in place ch’banc d’moules rebelles !