Chalut mes gins ! In n’peut pon dir’te que l’actualité alle ait vraiment boul’versé m’vie à’ch’t’heure. J’pourros t’parler cor’ d’cheule rintrée. Mais pou in dir’te quo ? Que d’après ch’ministre de l’éducation, tout i va bin ! Alors, qu’in fait, ches professeurs et ches inspecteurs d’académie is n’ont nin cor’ arçu ches circulaires aveuc tous ches ching’mints. Bion, rin d’neuf in France, in comminche toudis par l’fin ! In annonche qu’in chinge qué cosse mais ch’est à ti de d’viner quo…
In pourrot parler du nouvieau navigateur Internet de Google : « Chrome ». Ch’ti qui a l’intintion d’mette eune grinde claque à Microsoft et sin Internet Explorer. Après Netscape Navigator et Mozilla Firefox, in v’là un trossième qui veut cacher l’baraque ! In va révolutionner ch’monte d’Internet, i déclare l’responsape d’Google. Te peux télécharger eune version bêta d’Chrome mais com’ toudis aveuc un nouvieau logiciel, in n’sait nin ch’i fonctionne nickel-chrome ! Alors, mes gins, attention qu’ch’est nin ti qui va ête bêta dins l’histoire et qu’te n’vas nin, seul’mint, révolutionner tin manicraque informatique !

Vingt dius ! Cha n’fait pon grind cosse à dir’te mais ch’est com’ d’habitute. Quind te fouilles dins ches lines, te treuves un truc drôl’te ou deusse. Et cheule drôl’terie du jour, alle me rappell’te un viux film aveuc Jean Gabin et Louis De Funès : Le Tatoué. Jean Gabin, dins sin dios, i a un tatouache fait par Modigliani et De Funès, un collectionneur déginté, i veux à tout prix li acater ! Bin, com’ in dit l’réalité alle rattrape l’fiction. Un Suisse (in n’sait pon chi ch’est un tiot) i a dins sin dios l’tatouache d’eune Madone aveuc aud’sus eune tiête d’mort. Te vos, rin d’bin terripe pou faire l’zazou su ches plaches mais cha a été fait par un artiste belge connu à’ch’t’heure, Wim Delvoye. In pourrot baptiser cha : Pou l’pieau d’un Suisse, toudis in rapport aveuc l’cinéma et un film qu’aveuc mi, pardon, l’grind César Delon, qui s’appelot : Pou l’pieau d’un flic. Ch’est quo l’truc intre ches deusse. Bin, ch’est simpe. Un Allemind, i a proposé chint chinquinte mille euros pou li acater ch’tatouache. Mais com’ in n’peut nin inl’ver l’pieau du Suisse com’ in l’fait aveuc l’papier d’un tiot suisse, cheul Allemind a conclu un marché. In expos’ra ch’Suisse tros fos par ins. Nin, pon au rayon frais, moqueux d’gins qu’t’es ! Pis, i va attindre l’mort de ch’musée su pattes pou in hériter. Nota : Pou ches visites guidées du musée, eune salle, l’salle du serpint à poil, alle est réservée au pus d’disse-huit ins ! I est égal’mint interdit d’jeter eune pièche dins l’grotte in faisant un vœu…
Alors te t’imagines ti, aveuc un nouvieau juet à chint chinquinte mille euros et n’pon pouvoir l’utiliser. Un bieau tableau que te n’pourros pon mette aud’sus d’tin lit. Ch’est com’ quind t’étos un tiot quinquin l’matin d’Noël. Que te voyos un énorme paquet aveuc tin nom marqué d’sus et que t’mère alle t’disot : Nin, attinds qu’tertous i sot l’vé avint d’l’ouvrir. Énervint, hein ? Ch’est lal qu’in peut chupposer que l’vie de ch’tiot Suisse alle risque fort d’ête brèfe. Qu’alle arrife à péremption avint l’date prévue par l’grind manitou ! In va avoir b’soin d’un flic pou suifre l’affaire. J’t’avos bin dit qu’i y avot un lien intre ches deusse. Te t’dis, com’ mi, que César Delon, i est p’t’ête un peu viux pou inquêter même ch’i vit toudis in Suisse et qu’i a l’avintache de parler aveuc l’même devisse. Ave mes gins ! J’sus d’accord aveuc ti. D’sin timps, in n’avot pon cor’ treuvé l’ADN (qu’in peut lir’te auchi com’ suit : Alain Delon Nombrilisme) pou m’ner à bin eune inquête. Bion, j’arrête min char, l’essence alle est trop quère. Alain Delon, chi t’em lis… Ch’est nin grafe, in va invoyer su ches lieux, Bridget Columbo. Ch’est l’cousine Françésse d’madame Columbo et eune arrière-cousine d’Miss Marple. Alle a fait un stache chez ches experts à Las Vegas, à Manhattan, à Miami. Même à Paris, même chi in a moins d’manicraques électroniques pou faire ches analysses. Te pinses bin qu’aucun indiche n’li échappe ! Com’ alle a auchi d’l’humour, bin dins l’poliche, i vaut miux, alle s’écrira in ravisant ch’cadafre étindu à tierre : I n’a pon l’air dins sin assiette not’ tiot Suisse. Pas de bol !

V’là mes gins ! Ch’est pon bieau com’ début pou un roman à succès. In pourrot in faire un film à succès, li-auchi : Pou l’pieau d’un Suisse, cha fait assez noir’te. Infin, eune cosse à la fos. J’n’veux nin vinte l’pieau du Suisse avint qu’in no l’ait tué !