Chalut mes gins ! In n’peut pon pacher à côté de ch’t’évén’mint : L’rintrée des claches. In n’peut pon armonter ch’timps insimpe. Te fermes ches zis. Nin, te n’peux pon chinon te n’vas pon arrifer à lir’te quo que j’ai écrit. Te t’imagines simplemint que ch’est tin jour d’rintrée des claches…

Tin principal souci, ch’est qu’te dos te l’ver tôt. T’es dégoûté, ch’est l’fin d’ches vacinches. Te l’savos d’jà edpis quéques jours. Quind tes parints is t’avotent obligé à préparer tin cartape et ringer toutes ches nouvielles fournitures dins tin bureau. T’espéros arrêter ch’timps mais ch’est nin possipe. A’ch’t’heure, te t’artreuves d’vint l’seul d’t’baraque, tin cartape su tin dios. Ches gambes alles simpent impossipes à bouger, com’ chi t’avos un énorme chewing-gum collé ind’sous d’chaque pid. D’un cop, eune lueur brill’te dins tes zis. Te vas artreuver d’vint cheule école, cheul collèche, ches copains et ches copines que t’as laichés pindint deusse mos. Vingt dius, t’as gramint d’cosses à leu raconter ! Lal, te comminches à avincer à bions pas. I t’in est arrifé des trucs pindint ches mos. Pis, te pourras leu montrer tous ches cahiers et ches classeurs aveuc l’guiffe de tin héros préféré que t’mère alle a acatés. Et toutes ches émissions qu’t’as vues à la tévé…

Lal, cheule lueur dins tes zis alle disparot auchi vit’ qu’alle est v’nue. Te réalisses que te n’vas pon savoir chi Elisa alle va enfin avouer sin amour à Kévin. Chi l’mononque d’Kevin i va infin prouver à ch’poliche qui n’a pon pu tuer ch’voisine, ch’jour-lal. Bin, ti, te sais qu’i fréquintot à l’hôtel du coin aveuc l’secrétaire d’sin patron. Et quo qui va arrifer à Cindy quind alle va découfrir que Charles Edouard n’est pon l’propriétaire du manoir mais juss’ ch’ti qui fait l’gardin et qu’sin vrai nom ch’est Jean-Marcel ? Heureuss’mint que ches tros s’maines chez t’mamie int fait d’alle eune fan de cheule série ! Alle a même mis eune sonn’rie d’rével su sin téléphone portape pou nin oublier l’heure du début. L’momint d’ù qu’in s’précipite such’ zappette pou mette l’bionne chaîne. Te t’d’mindes même commint qu’alle pouvot faire avint tin intervintion pou ignorer eune grinde épopée humaine com’ cha ! A’ch’t’heure, alle pourra t’raconter quo qu’i s’pache pindint qu’in t’raconte d’autes cosses. Com’ ches tapes d’multiplications, alors qu’in t’a d’jà acaté eune calculette. L’orthographe et l’conjugaison alors que l’manicraque informatique d’tes parints i a un correcteur dins sin trait’mint d’textes.  Tous ches trucs aveuc tous ches viux dins l’histoire et ches pays d’ù qu’te n’mettras jamais ches pids. Toute fachon, l’jour d’ù qu’t’en as b’soin, i suffit d’un mot dins Gogole pou savoir bin assez d’cosses such’ sujet !

V’là, mes gins. Te peux arprinte l’cours d’t’vie. Qué que sot l’âche qu’i a, in a sin lot d’préoccupations et d’priorités. Ch’est com’ cha. Certaines qui paraiss’tent futiles à un âche sont importintes à un aute. T’es p’t’ête à tin traval in train d’te d’minder ch’que te vas faire à minger ch’soir. Chi t’as bin rimpli l’gamelle du quien avint d’partir. Chi t’femme ou tin mari i va pinser à pacher chez l’teinturier pou récupérer ches fouffes que t’avos déposées l’s’maine dernière. Quo qu’te vas artreuver dins t’boîte aux lettres in rintrant. Qué factures is vont cor’ arrifer aveuc eune mauvaisse surprisse ?

In n’se rind nin compte du bionheur qu’in a quind in vit ches années d’insouciance. In s’prind souvint pou Calimero et in treuve que l’décision d’ches parints alle est trop injuste. Bionne rintrée à tous ches gamins et à ches profs qui vont subir leux « fintaisies » !