L'complainte d'el vaque...

Dimanche 31 août 2008 7 31 /08 /Août /2008 11:58

L'complainte d'el vaque...

Chalut mes gins ! In va vir à’ch’t’heure eune tiote toutoulerie que j’avos écrite, i y a deusse mos d’jà, et que j’n’avos pon eu l’coeur d’mette in line pach’que l’timps i avot viré vilain et qu’cha n’f’sot pon terripe d’parler d’barbecue quind te n’peux pon in faire à cosse d’el drache…
In pinsint à eune bielle côte à l’oche que j’avos dû mette cong’ler pach’ qu’in avot ouvert ches vannes in grind. J’avos eu l’idée d’em mette à l’plache d’eune vaque qui n’savot pon qué sort in allot li réserver, pou finir dins not’ assiette. Te vas comprite in lisant ch’poème pus bas. Eune s’maine après, in pouvot lir’te dins ches journaux qu’eune vaque alle avot faussé compagnie à ches gins d’l’abattoir in pachant par ches égouts. In avot mobilisé ches pompiers, l’poliche, pou rattraper l’biête qui n’étot pon chi biête et qui n’voulot nin finir com’ ches congénères. Eune verchion cow-boy du « Fugitif » qui arf’rot l’casse d’Nice.
Alors, v’là ch’poème. Cha s’appell’te : L’ complainte d’el vaque.

Ch’i te plaît, humain qui va finir par m’minger
Mi qui ai foulé cheule bielle herpe, in ai mingé
Pinse à mi, à tout ch’plaiji que te peux avoir
Mi qui vais t’servir d’pitinche, macabre devoir

Pou qu’min goût sot rel’vé et ma chair généreusse
J’ai couru dins ches camps su des pattes vigoureusses
Pinse à mi quind te vas commette l’irréparape
Pou m’servir in morcieaux étalés su eune tape

Pinse à ches côtes à l’oche grillées à barbecue
Ches rôtis, ches bavettes, t’in s’ras vit’ convaincu
Cha f’ra l’bionheur dins t’bouque et dins tin estomac
L’baromète des papiles bloqué su maxima

Ch’i te plaît, fait com’ chi ch’est m’dernière volonté
Tin momint d’compachion, tin momint de bionté
N’y vos churtout pon eune démonstration d’colère
Mais j’veux nin finir haché dins un inburguère.

Te m’croras chi te veux, mes gins, mais je n’avos pon fait lir’te cha à cheule vaque avint sin escapate…

Plus
- Email
- Lien
- Imprimer

Par Marie Toutoule - Publié dans : Toutoulerie - Communauté : objectif Nord
Ecrire un commentaire - Voir les 2 commentaires

Précédent : In peut rigoler mais ch’est nin... Retour à l'accueil Suivant : In pachant par l’école…

Commentaires

ben le fond de l'écran, pardi

Commentaire n°1 posté par plaskota le 01/09/2008 à 20h50

En fait, d'après le code HTML, il est gris foncé ! Enfin, voici une version avec le même fond que le centre du blog...
Heureusement que je sais traficoter un peu les codes souces des pages HTLM...
A votre service Dame brigitte !

Réponse de Marie Toutoule le 01/09/2008 à 23h46

Décidemment Marie Toutoule, t'as un véritable don, ton poème est mignon comme tout. brigitte
Au fait, pourquoi tu as mis un fond noir, c'est à la mode OK, mais c'est tristounet

Commentaire n°2 posté par plaskota le 01/09/2008 à 17h24

Merci pour le compliment !

De quel fond noir tu veux parler ?

Réponse de Marie Toutoule le 01/09/2008 à 17h58