Chalut mes gins ! A’ch’t’heure, in va ête chérieux un peu. Chi, ch’est possipe ! Chi t’es, com’ mi, non-fumeux, te vas d’voir porter in permaninche un nouvieau badge. L’même qu’in met dins eune cintrale nucléaire pou vir chi te n’d’viens pon radioactif à cosse d’tin exposition trop prolongée …
Quo qu’ch’est que cheule info bizarre ? Bin, te m’connos ! Mi, j’vos toudis pus loin qu’ches lines dins un journal. Alors, cor’ un cop, j’extrapole. Mais cheule nouvielle, alle n’in d’meur’te pon pou autint dramatiqu’mint mortelle ! Te savos fort bin, même chi te fumes pus qu’el barbecue d’tin voisin, que l’cigarette alle est dingereusse. Te connaissos d’jà l’nicotine et ch’goudron qui incrass’tent t’mécanique et qui peuv’tent carrémint t’mette in raque. Quind t’es in raque, mes gins, te sais qu’in n’a pon souvint l’pièche détachée d’archinge pou t’armette d’aplomb. Lal, i n’te ress’ pus qu’à rinte ta bielle âme à Diu, ch’ti qu’te veux, et t’involer com’ un anche su tin tiot nuache (d’fumée) ! Donc, cha fait bielle lurette qu’in t’dit qu’i n’fot nin fumer mais qu’in continue à t’vinte ch’toubac !
A’ch’t’heure, te vas apprinte, in pus, que te fumes du polonium 210 ! Te n’sais pon d’quo i s’agit. Bin, ch’est eune matière radioactive. Nin, n’cache pon ! Ch’est nin l’nouvielle station d’radio, d’ù qu’in pache du heavy metal, et qui fait dinser ches verres dins tin armoire com’ ches pois sauteux de ch’Mexique !  Ch’est l’même salop’rie qui a impoisonné l’ex-agent du KGB Alexander Litvinenko ! In pourrot dir’te : Bin, personne i n’savot que cha existot dins eune cigarette, eune matière com’ cha. In va faire attintion ! Lal d’ù qu’ch’est l’pus dur’te à « digérer », te m’pass’ras cheule echpression, ch’est que cha fait quarinte ins que ches majors d’l’industrie du toubac alles le savotent ! In fait, ch’polonium 210 i vient d’ches ingrais riches in phosphates qu’in dévers’te su ches plants d’toubac et qui donn’tent à ches cigarettes ch’goût chi particulier. Et ti qui croyos que ch’étot des arômes ajoutés…
V’là mes gins. A’ch’t’heure, quind te s’ras intouré d’fumeux, i n’t’rest’ra pus qu’à mette un badge pou vérifier chi tin taux d’radioactivité i n’grimpe pon pus vit’ que ch’prix d’l’essence. Pach’ qu’i n’y a pon d’raison, vu qu’i y a l’tabagisme passif, qu’i n’y ait pon d’radiations émiss’tent par eune personne qui fum’te. Cha, in t’el dira dins vingt ins ! J’ingache, dès ch’jour, tertoutes et tertous à chinger quéques phrasses. In n’dira pus : i fum’te com’ un pompier mais i fum’te com’ eune cintrale nucléaire. Quind te verras un tiot excité aveuc eune cigarette dins l’bouque, te diras : ch’est un hyper-radioactif ! Quind te fum’ras t’cigarette après l’amour, in saura qu’ch’est pou archarger t’batterie au nucléaire. Quind in install’ra un fumoir dins un cabaret ou un restaurint, in mettra su ch’pincarte : « Attintion ! Réacteur nucléaire, port du badge obligatoire à proximité. » Désormais, dins ches paquets d’cigarettes, in rimplac’ra cheule feuille d’aluminium par eune in plomb, pou l’protection du débitant d’toubac. Bin, ch’est nin fachile d’rinte l’monnaie aveuc eune combinaison anti-radiations. Parel pou tous ches cindriers. Fini l’verre dins ta couleur préférée. Cha s’ra des tiots cont’ners in plomb aveuc un couvercle arvissape. Quind i s’ra plein, in l’vid’ra dins un pus grind. Eune collecte d’cheule poubielle chpéciale s’ra organisée in pus d’tin tri chélectif d’à’ch’t’heure.
Bin, ch’est pon tout cha, mes gins, mais j’vais aller printe eune bionne pinte, aveuc min pote Modération, avint qu’in m’dis’te que ch’t’houblon i est arrosé aveuc ches mêmes ingrais…