Chalut mes gins ! Quo ? Te n’connos pon ch’chiffe qui tue. Bin, à’ch’t’heure, j’vais t’el dévoiler. Ch’est 367.700 ! P’t’ête qu’in va mette des poussières in pus ou in moins, mais cha n’va nin chinger grind cosse. Cha n’te parl’te pon, pourtint in in a chuffisammint fait des allusions. Bion, j’vais t’rassurer, ch’n’est pon ch’que te dos au fisc. Ouf ! Te v’là soulagé… Ch’est pon nin pus ch’que cheule nouvielle carette à Carla et Nicolas alle a coûté pisqu’alle ne fait que 150.000 euros. I faudra que j’em rinseigne pou savoir chi à ch’prix-lal, is ont eu l’option cafetière !

Nin, j’avos juss’ l’invie d’faire un hommache à un grind deussième mais un Grind Premier dins ch’cœur d’vingt millions d’Françés. Ouais, t’y es, mes gins, ch’est ch’film de min Dany Boon. A’ch’t’heure, in peut lir’te, ichi ou lal, que ch’est nin eune bionne imache de ch’Nord pach’qu’in y vot trop d’misérabilisme. In peut lir’te auchi que ches gins, comme nou’z’autes, is sont tous babaches pou s’idintifier à cha. Mi, j’n’vos que des discours d’gins jaloux. Is espèr’tent qu’in dénigrint un succès, in va parler d’eux et qu’cha va armonter leu compte in binque ! In essaye toudis d’treuver des echplications à un phénomène d’société ? Com’ chi cha pouvot no rassurer d’maîtriser un élan public ! Pach’qu’i n’fot nin perte d’vue que cha n’peut pon s’calculer, un succès. Dany i n’in arvient pon li-même. Ches autes acteurs du film nin pus. Mi, j’em souviens quind j’ai été à la tévé aveuc Philippe Duquesne. In in a discuté insimpe tous ches deux, pindint du long. Rin i pouvot présager cha…

Alors, sot in est pus d’vingt millions d’babaches. Sot ch’est qu’in y a vu pus que du misérabilisme mais gramint d’tindresse, gramint humanité et gramint d’bionne humeur… Gramint d’no, quo, ches gins de ch’Nord ! In peut juss’ argretter que, su ches ch’mins d’grinde vadroulle, in n’est pon cor’ poussé pus loin pou ête numéro un ! Ch’est pon juss’ eune fierté des gins de ch’Nord. Nin, ch’est eune fierté nationale d’faire miux qu’ches Américains, aveuc un budget bien chez no. Sins ches effets chpéciaux qui pourrotent faire vifre un pat’lin intier pindint un in, rin qu’aveuc l’budget.

Mais ch’est mathématique, mes gins. Chi te posses 20.738.844 pou ches intrées de ch’Titanic et qu’te artrinches 20.371.144 intrées pou ches ch’tis, in quée su 367.700, l’chiffe qui tue et qui n’arcoule pon ch’Titanic ! Juss’ cor’ un truc pach’que, chi t’es com’ mi, t’as dû intinte qu’ch’est à cosse d’ches pirates qui télécharg’tent ch’film su Internet. Bion, j’sus d’accord pou dir’te que ch’est vraimint pon bin ! Mais, mi, j’ai auchi eune question qui m’vient à l’echprit : Qui ch’est qui a mis ch’film in « lipe-serviche » su Internet ?

Et com’ j’sais qu’min Dany i n’minque pon d’humour, in va faire eune tiote toutoulerie…